Madius 3 - Intas Etipup

Nuarin-tas alupas 3.

¹ AN naopan iyehki is apan an namasacen an pece Jutaia a Joanes Natimi baptiso, um tas,

² um ika, Akumu adumoij anliinmopomia aijaua: et mun ubutpotet nelcau an nohatag.

³ Aien aigki is tas vai yin a Aiseya naprofeta, um ika, “Nohran tah et ethi etpu ahlaig aien an namasacen, um ika, Akumu ahped nefalaig vai Ihova aijaua, um ago yi atoh efalaig vai yin.”

⁴ Is aso yin a Joanes an napelumai alau irai kamela, um ahid narasi kurimatau, um caig inheled im hune.

⁵ ¶ Eris ahtag pan ehelen a nupu Jerusalem, im nupu Jutaia asega, im nup urai uari pece asega u nofowai Jortan,

⁶ is baptiso ira ra aien an wai Jortan, eris asuptecnaig nedo has ura ara.

⁷ ¶ Is alum ilpu Farisi is ahinag aien im ilpu Satusi napanvaig u nabaptiso o un, is um ika ehele ra aien, Ak ilpu imyiv, et mun ated caua a di, mika aki aha aijaua vai intavaitap etpu yetpam?

⁸ akumu ohoai itai aijaua yi idivaig nadumoij u inliinmopomia:

⁹ akumu jim aktaktai anliinmopomia aijaua, um ika, Et etpoija a Ebraham; ek asaig ehelemia ainyak mika, Et emda a Atua par imyiatidai ilpu halav imi Ebraham irai hat iji eigki:

¹⁰ eh mun ati inpas u nohu auicai an naopan ineig: uhpu acaldei nauicai asega et eti upene nasau iran, um erekhaigjai an cop:

¹¹ ek idim baptiso iramia ainyak an wai mika aki adumoij anliinmopomia aijaua: ja aien inyi ham aien um apitac nyak inyi idim esjilid irak aien, ek eti upene ainyak par apos incedpun eduon: etpu baptiso iramia aien an Nesgan Upene im lep incop:

¹² et apos nitai ucjucjai itai o un aien, etpu idim ago adicinadicin nuarin ikni sito o un aien, etpu ikni hwiit o un aien anliin neom ikni hwiit iran, ja etpu atnamud narasin aien an cop inyi ti lep opos.

¹³ ¶ Is ahes Calili a Iesu um apan Jortan ehele Joanes, mika yi baptiso iran aien.

¹⁴ Ja is acaiji yin a Joanes, um ika, Eris idim ika apu baptiso irak aiek, na auri aiek par apam ehelek?

¹⁵ Is tas a Iesu, um ika ehelen, Jim imyiisjis aiek an naopan ineig: eris idim ika ti imyiaiji intas alep asega akaija. Is eti lep imyiisjis aien.

¹⁶ Is wat leh nabaptiso iran a Iesu, is ahes u inwai aien, um atga o un: is asalgei nohatag vai yin, is ecet Nesgai Atua aien nasuolvaig is idivaig nalaupa, um ateuc iran:

¹⁷ is ahes an nohatag nohran tah, um ika, Inhalav cop unyak ineigki, ek imyiacitak yin ainyak.