Madius 18 - Intas Etipup

Nuarin-tas alupas 18.

¹ AN naopan iyehki eris apan ehele Iesu a ilpu atimi atahaijeg yin, um ika, Inyi esjilid a di an nelcau an nohatag?

² Is ahlaig vai inhalav is ethi a Iesu, um ati yin an nuhup ura,

³ um ika, Et inivaijec ineig ek asaig ehelemia ainyak mika, El eka eti ahidai caua aijaua, um idivaig ilpu halav, aki ti apan aijaua an nelcau an nohatag:

⁴ aien et upoupo inliinmopon aien um idivaig inhalav ineigki, inyi esjilid aien an nelcau an nohatag:

⁵ aien et leh tah inhalav aien, et idivaig inhalav ineigki, va nidak, et leh nyak aien:

⁶ el et ago nedo oop vai ilpu halav iji eigki tah era asgeig irak ara, el et upene vai yin el er athai inhat irara flaur an nauinwan, um atise yin an namilvai ubou acen.

⁷ ¶ Aʼa, auwe va nobohtan ineigki va nedo oop iran! et elika intivaig nedo oop atimi; ja aʼa, auwe va natimi ineigki et ago nedo oop aien!

⁸ El et itai epihtau imi euc nikmam ka neduom, anum acaldei aiek, um ethaig: etpu upene vai euc napanvaig an nuarin umoh, um alkalka um ighin; jam has nethaig pan euc vaig an cop inyi ti lep opos, el et eteuc ero nikmam im neduom.

⁹ El et itai epihtau imi euc nesganimtam, anum atipagki aiek, um ethaig: etpu upene vai euc napanvaig an nuarin umoh, um ethi ache nesganimtam; jam has nethaig pan euc vaig an cop an pece has, el et eteuc ero nesganimtam.

¹⁰ Akumu jim amcel vaig tah natimi upoupo iji eigki aijaua; ek asaig ehelemia ainyak mika, Era almoi nesganimtai Etmak an nobatag a ilpu agelo ura irai iji adiat an nohatag.

¹¹ Is ham a Inhal o natimi mika yi imyiatamaig ra er auahas ra.

¹² Eka ikha aijaua? el et eteuc siip et wun huntret o un tah, jam melga et ethi ira ra, et ude nainte im nain aien, um apan irai lola edoon, um ahilek ineig et melga.

¹³ Et inivaijec ineig ek asaig ehelemia ainyak mika, El et ecetai aien, et esjilid nimyiacitak o un va siip iyehki, ja et tup ekliin upene inliinmopon aien va siip is nainte im nain eris eti melga.

¹⁴ Et idim ucco et eti merit a Etmamia an nohatag, mika uhpu auahas tah ira atimi upoupo iji eigki.

¹⁵ ¶ Im lep ineig, el et ago nedo has vai euc a etoam, apan aiek, um tas ehelen va nedo has o un echim aijaurau ache: el et atahaijeg intas unyum aien, na mun leh etoam aiek.

¹⁶ Ja el et eti atahaijeg intas unyum, aien, namu leh natimi inyi ethi aiek ka inyi ero, eru ahced euc arau, mika yi ipjin intas asega an nuhup o atimi et ero ka et eseij.

¹⁷ El et eti atahaijeg aien, anum asuptecnaig ehele nakalasia aiek: el et imyipalea nakalasia aien, inyi idivaig natimi aupat vai euc aien, im natimi auatatimi.

¹⁸ Et inivaijec ineig ek asaig ehelemia ainyak mika, Nitai ineig akupu arore an nobohtan aijaua, uhpu lep arore an nohatag: nitai ineig akupu aihiyi an nobohtan aijaua, uhpu lep aihiyi an nohatag.

¹⁹ Im lep ineig, ek asaig ehelemia ainyak mika, El et tup ethi ache inliinmopoi natimi inyi ero iramia an nobohtan vaig tah nitai erupu ugni arau, etpu alupai rau a Etmak an nohatag.

²⁰ El et asjapicnaig natimi et ero ka et eseij an tah anuarin va nidak, ekpu idim amen ehele ehtaij ainyak.

²¹ ¶ Is apan ehelen a Pitrus, um ika, Ak Natimarid, inyi ago nedo has vai nyak a etoak um ehcehed, ja ekpu eti aru ainyak? inyi yetpan irai seven, ka oʼo?

²² Is ika ehelen a Iesu, Ek eti ika ehelum ainyak, Inyi yetpan irai seven ache: ja, Inyi yetpan irai ehcesevente a seven.

²³ ¶ Nelcau an nohatag et idivaig natimarid is ethi, is ika aien yi ahilek nedo o ilpu aheca o un.

²⁴ Is wat atupun aien um ahilek nedo ura, eris imyiapan ehelen tah is ethi is eti aru tollar is ten milyun o un aien:

²⁵ is ti tah nitai ineig o un yi aru iran, is tas a natimi alupas o un, um ika yi ahtai yin, im ehgan, im ilpu hal o un, im niji itai asega o un, va uhpu leh neruvaig imi yin:

²⁶ is atpuse a naheca iyehki um ugni yin, um ika, Ak natimi alupas, etmu eropse inliinmopom aiek vai nyak, ekpu aru ehni ainyak.

²⁷ Is aiheuc vai naheca iyehki a natimi alupas o un, um atceijai yin, um eti aktaktai neruvaig imi yin.

²⁸ Ja is apan a naheca iyehki um ecet etoan naheca is ethi, is eti aru tollar is fiftiin o un aien; is arop iran aien um asjirai nauinwan, um ika, Namu aru neruvaig unyum imi nyak aiek.

²⁹ Is atpuse u neduon a etoan naheca, um ugni yin, um ika, Etmu eropse inliinmopom aiek vai nyak, ekpu aru ehni ainyak.

³⁰ Ja is ipjin aien: is apan aien um ati yin anliin neom ipjin, um uhum pan naopan iyehki inyi leh neruvaig aien.

³¹ Eris wat almoi nedo ineigki a ilpu etoan aheca, eris imyitaig yin ara, um apan, um asuptecnaig ehele natimi alupas ura nedo asega ineigki.

³² Is ahlaig vai yin a natimi alupas o un, um ika ehelen, Ak naheca auatatimi, kis eti aktaktai ainyak neruvaig imi nyak, vai intas ugni unyum:

³³ na auri aiek par eti aiheuc vai etoam naheca um idivai nyak, ek mun aiheuc vai euc ainyak?

³⁴ Is edemda vai yin a natimi alupas o un, um ati yin ehele ilpu atimi aredei yin, um uhum pan naopan iyehki etpu aru ehni aien.

³⁵ Etpu ucco nedo o Etmak an nohatag vai caua, el et eti eropse inliinmopomia aijaua va nedo has o ilpu etoamia vai caua.