Madius 16 - Intas Etipup

Nuarin-tas alupas 16.

¹ ERIS ahtag pan ehelen a ilpu Farisi im lep ilpu Satusi, um oop yin, um ugni yin mika yi ehvaig ehele ra nitai asjaaicnaig an nohatag aien.

² Is tas aien, um ika ehele ra, Et wat jupura, wat cop nohatag, eka ika aijaua, Etpu upene nipnyin.

³ Im lep an nuhialeg, et wat cop nohatag um aimoc, eka ika aijaua, Etpu has nipnyin inpeig. Ak ilpu atimi efaifa, eka ato aijaua nesganimtan nohatag; ja eka auri aijaua par eti ato niji itai asjaaicnaig an naopan ineig?

⁴ Era merit nalmoivaig nitai asjaaicnaig a ilpu atimi auatatimi im ilpu atimi imyiisjis nahcil; ja eri eti almoi nitai asjaaicnaig ara, nitai asjaaicnaig ineig ache o Jona naprofeta. Is ude ra aien um atga o un.

⁵ Eris apan a ilpu atimi atahaijeg yin an taka uarin, ja eris eti imyiehva nareto ara par apos.

⁶ Is ika ehele ra a Iesu, Aminjinai caua aijaua, um jim leh leven o ilpu Farisi im ilpu Satusi.

⁷ Eris tas jipe ehele ra ara, um ika, Et asan tas ineigki aien va nedo uja, nikavaig, inta mun eti apos nareto akaija.

⁸ Is wat ato a Iesu, is ika ehele ra aien, Ak ilpu atimi auatialidi par imyiisjis ninivaijec, eka auri aijaua par tas jipe ehele caua, um ika, Inta mun eti apos nareto akaija?

⁹ Eka auri aijaua par eti ato, um eti imyiehva nareto is ikman, akis alaa atimi is faiv dausant aijaua, um lep asjapicnaig ineig is aled, um atohoaig irai efehcat is ehed?

¹⁰ im lep nareto is seven, akis alaa atimi is for dausant aijaua, um lep asjapicnaig ineig is aled, um atohoaig irai efehcat is ehed?

¹¹ eka auri aijaua par eti ato, nikavaig, kis eti tas ehelemia ainyak va areto, kis wat ika ehelemia ainyak aki aminjinai caua aijaua vai leven o ilpu Farisi im ilpu Satusi?

¹² Eris ato ara, nikavaig, et mun eti ika ehele ra aien, eri aminjinai ra ara vai leven uri areto, ja va nesege o ilpu Farisi im ilpu Satusi.

¹³ 11 Is wat yetpan a Iesu an pece Sisaria Filipai, is ahodaig ilpu atimi atahaijeg yin aien, um ika, Era ika natimi, ainyak di aigki, Inhal o natimi?

¹⁴ Eris ika ara, Era ika nahaiji ra, Nai Joanes aiek Natimi baptiso: um ika nahaiji ra, Elaija; um ika nahaiji ra, Jeremaia, ka tah et ethi irai ilpu profeta.

¹⁵ Is um ika ehele ra aien, Eka ika aijaua, ainyak di aigki?

¹⁶ Is tas a Saimona Pitrus, um ika, Nai Kristo aiek, Inhal o Atua umoh.

¹⁷ Is tas a Iesu, um ika ehelen, Na mun ahesmoij aiek, ak Saimona, inhal o Jona: eris eti asuptecnaig ehelum natimi, jai Etmak an nohatag;

¹⁸ ek lep ika ehelum ainyak, Nai Pitrus aiek, ekpu atijai nakalasia unyak ainyak an heteuc ineigki; inyi ti esjilid iran nemda an pece has:

¹⁹ ekpu alupai euc ainyak kii an nelcau an nohatag: nitai ineigki napu arore aiek au nobohtan, uhpu lep arore an nohatag; im lep nitai ineigki napu aihiyi aiek an nobohtan, uhpu lep aihiyi an nohatag.

²⁰ Is acaiji ilpu atimi atahaijeg yin aien mika eri jim asuptecnaig ehelen tah, um ika, Et Iesu Kristo aien.

²¹ ¶ Is atupun a Iesu an naopan iyehki um asuptecnaig ehele ilpu atimi atahaijeg yin, um ika, Ek et hidim ika ainyak ki apan Jerusalem, etpu ahinag nohocred unyak vai ilpu atimi tas alep, im ilpu atimi ahlap esjilid, im ilpu atimi esege, erupu atgei nyak ara; ja et wit ti pan itac nadiat inyi eseij ekpu lep nusjai ainyak.

²² Is asjiraig yin a Pitrus, um ated imi yin, um ika, Kaiheuc vai euc, ak Natimarid: inyi ti yetpam iram nitai iji eigki.

²³ Ja is ahidai yin aien, um ika ehele Pitrus, Apan aiek an nidjik, ak Satana: nai itai epihtau imi nyak aiek: na eti aktaktai aiek niji itai o Atua, jam aktaktai ache niji itai o atimi.

²⁴ ¶ Is ika ehele ilpu atimi atahaijeg yin a Iesu, El et ahced nyak tah natimi, etmu ude nedo ineig aien et merit vaig aien, etmu alcacse nauincai atgeig o un aien, um ahced nyak.

²⁵ Aien et imyicoho yin aien, inyi mas aien: aien inyi mas aien vai nyak, etpu leh nitai umoh iran aien.

²⁶ Et eti upene vaig tah natimi inlehvaig nobohtan asega,um auahas nesgan: inyi auanimtan nesgan tah natimi anhe?

²⁷ Etpu yetpam a Inhal natimi an natimi alupas o Etman im lep ilpu agelo o un; etpu ago neruvaig imi atimi asega aien yi idivaig nauritai ura.

²⁸ Et inivaijec ineig ek asaig ehelemia ainyak mika, Era aiji igcaki nahaiji atimi eri upyi hup ara um ecet Inhal o natimi napamvaig an nelcau o un, ja par emesmas.