Madius 15 - Intas Etipup

Nuarin-tas alupas 15.

¹ ERIS ahes Jerusalem a ilpu atimi esege im ilpu Farisi, um apan ehele Iesu, um ika,

² Era auri a ilpu atimi atahaijeg euc par imyipalea intas alep o ilpu atimi tas alep? era eti upyi ahisjim ara, ja par hag.

³ Is tas aien, um ika ehele ra, Eka auri aijaua par imyipalea intas alep o Atua an tas alep unyimia?

⁴ Is tas alep a Atua, um ika, “Namu eccen vai etmam im risum aiek:” im lep ineig, “Aien et asan tas has aien vai etman im risin, etpu idim mas aien.”

⁵ Ja eka ika aijaua, Aien et ika ehele etman aien ka risin, Et itaup vai euc niji itai unyak;

⁶ um eti eccen vai etman ka risin, inyi ti mas aien. Eka imyipalea intas alep o Atua aijaua an tas alep unyimia.

⁷ Ak ilpu atimi efaifa, et inivaijec intas is upyi asaig vai caua a Aiseya, um ika,

⁸ “Era eteuc ubutpotet ehelek a nup igcaki an nipjineucsera; ja et itac acen inliinmopora ara vai nyak.

⁹ Et takitai nimyiahpas nyak ura, era esege tas alep o atimi ache ara.”

¹⁰ ¶ Is ahlaig va atimi is ahinag aien, um ika ehele ra, Akumu atahaijeg aijaua, um ato:

¹¹ et eti auahas atimi niji itai et apan an nipjineucsera; ja et auahas atimi niji itai et ateucrad an nipjineucsera.

¹² Eris apan ehelen a ilpu atimi atahaijeg yin, um ika, Na mun ato aiek, ka oʼo, nikavaig, eris wat atahaijeg intas iyehki a ilpu Farisi, eris edemda ara?

¹³ Is tas aien, um ika, Uhpu auorohos nefelelicai asega is eti ahoaig a Etmak an nohatag:

¹⁴ akumu ude ra aijaua: era aupat ara, um atau ira ra era aupat ara: el era atau irai ilpu atimi aupat nesganimtara a ilpu atimi aupat nesganimtara, erupu eropropse ara asega an nehpanitai.

¹⁵ Is tas a Pitrus, um ika ehelen, Asuptecnaig ehelema aiek nesgan tas ecsipece ineigki.

¹⁶ Is ika a Iesu, Et echamecha inliinmopomia aijaua?

¹⁷ eka ato aijaua, nikavaig, nitai iji eigki era ikni an nipjineucsera atimi et asuol an nipjinetgara, er erekhaig an nuarin ikni niji itai has iran.

¹⁸ Ja et ehlohos anliinmopoi atimi nitai iji eigki et ateucrad an nipjineucsera, um auahas ra.

¹⁹ Et ehlohos anliinmopoi atimi naktaktai has, natgei atmas, ingaijid, nedo has, nehneg itai, intas ahcil, intas has:

²⁰ et idim auahas atimi nitai iji eigki: jam eti auahas atimi neti ahisjim ja par hag.

²¹ ¶ Is ahes eahki a Iesu um atga o un, um apan irai iji uari pece Tairus im Saiton.

²² Is ahes an pece iyehki intakata Kenan is ethi, um ahlaig vai yin, um ika, Ak Natimarid, Mapoi Tevit, aiheuc vai nyak aiek; et ohocred alupas inhalav atahaig unyak va nagelo has.

²³ Ja is eti tas aien. Eris apan ehelen a ilpu atimi atahaijeg yin um ugni yin, um ika, Abrai yin mika yi atga o un; et ahlaig vai caija aien.

²⁴ Ja is tas aien, um ika, Eris eti abrai nyak vai tak atimi, ja vai siip ahnag irai nupu Isreel ache.

²⁵ Is apan aien, um atpuse an nuhup o un, um ika, Ak Natimarid, aiheuc vai nyak aiek.

²⁶ Is tas aien, um ika, Et eti upene inlehvaig nitai caig o ilpu halav, um alayi kuri.

²⁷ Is ika aien, Et idim inivaijec, ak Natimarid: ja era hegaig nahri itai kuri, et etjose an nitai hag o natimi ohuun ra.

²⁸ Is tas a Iesu, um ika ehelen, Ak intakata ineigki, et esjilid nimyiisjis ninivaijec unyum: namu leh nitai ineig aiek nai merit vaig aiek. Is um cehcehe a inhal o un an nuarin-nadiat iyehki.

²⁹ ¶ Is ahes eahki a Iesu, um apan ubutpotet u injop Calili; is aridjai aien an nedoon is ethi, um ateucse.

³⁰ Eris ahtag pan ehelen natimi is ahinag, um apos ilpu atimi asvahteuc neduora, im ilpu atimi aupat nesgaimtara, im ilpu atimi pop, im ilpu atimi ighin, im hal ra is ahinag, um ikni ra u eduei Iesu; is ago cehcehe ra aien.

³¹ Eris imyiali natimi is ahinag, eris wat alum ilpu atimi pop ara intasvaig, im ilpu atimi ighin nupene vaig nohura, im ilpu atimi asvahteuc neduora natgavaig, im ilpu atimi aupat nesgaimtara nalum itai vaig: eris um imyiahpas Atua o nupu Isreel ara.

³² ¶ Is asjapicnaig ilpu atimi atahaijeg yin a Iesu, um ika, Ek aiheuc va atimi et ahinag ainyak, eris amen ehelek ara an nadiat is eseij, et ti nitai caig ura incara: inki ti abrai ra ainyak mika eri atga ura ara nehtele ra vaig, va yi jim isji ra numlaig an nefalaig.

³³ Eris ika ehelen a ilpu atimi atahaijeg yin, Inti leh nitai caig eda akaija an namasacen ineigki yi ahinag par alaa atimi iji eigki, era ahinag acen ara?

³⁴ Is um ika ehele ra a Iesu, Et ehed nareto unyimia? Eris ika ara, Et seven, im inhakli numu et eti elpat.

³⁵ Is um ika ehele atimi aien, eri ateucse ara an nobohtan.

³⁶ Is leh nareto is seven aien im numu, um naaurineig, um iswoplecoplec, um alupai ilpu atimi atahaijeg yin, eris um alaa atimi is ahinag a ilpu atimi atahaijeg yin.

³⁷ Eris hag ara asega, um gaije: eris asjapicnaig nuari itai hegaig ara eris eti ahtahni, um atohoaig irai cat is seven, is um ohua.

³⁸ Ara eris hag ara um gaije, eris for dausant ara, um aled ilpu takata im ilpu halav.

³⁹ Is abrai atimi iji ehki aien mika eri atga ura ara, ja is apan aien an nelcau, um apahai an pece Mactala.