Madius 11 - Intas Etipup

Nuarin-tas alupas 11.

¹ IS tas ehni a Iesu ehele ilpu atimi atahaijeg yin is twelv, ja par …s eahki, um atga o un, um apan …r esege imi atimi, um asuptecnaig intas irai iji uari-pece ura.

² IS wat atahaijeg a Joanes anliin neom ipjin va nauritai o Kristo, is abrai ohwat atimi atahaijeg yin is ero aien,

³ um ika ehelen, Na atimi iyehki … eris ika, Etpu ham aien, ka … aitgai yin akaija?

⁴ … tas a Iesu, um ika ehele rau, …aijaurau um asuptecnaig ehele … nitai iji eigki erau atahaijeg …au um almoi:

⁵ Et lah nesganimtai ilpu atimi …pat nesganimtara, um atga a ilpu …timi asvahteuc neduora, um adicinadicin a ilpu atimi aleprose, um ahgei itai a ilpu atimi ucjapines intikgara, um anusjai a ilpu atimi emesmas, eh lep asuptecnaig intas-upene ehele ilpu ihki atimi.

⁶ Et mun ahesmoij natimi ineig, et eti imyiehcamai nyak aien.

⁷ ¶ Erus wat atga urau arau is tas a Iesu ehele atimi is ahinag vai Joanes, um ika, Akis apan aijaua an namasacen par almoi inhe? nieg is amaamai iran nimtinjop, ka oʼo?

⁸ akis idim apan aijaua par almoi inhe? natimi is aso yin an napelumai yilyil, ka oʼo? ara era aso ra irai apelumai yilyil ara era amen ara irai eom o ilpu atimarid:

⁹ akis idim apan aijaua par almoi inhe? naprofeta is ethi, ka oʼo? Maiya, ek asaig ehelemia ainyak mika, et esjilid aien irai ilpu profeta:

¹⁰ aien aigki, eris aged intas vai yin, um ika, “Ek idim abrai naheca unyak ainyak mika yi uhup iram, etpu ahped nefalaig imi euc aien, um uhup iram.”

¹¹ Et inivaijec ineig ek asaig ehelemia ainyak mika, Is eti eteuc tah ira atimi iji eigki eris apos ra a risira nesjilidvaig irai Joanes Natimi baptiso: ja et esjilid iran aien et upoupo aien an nelcau an nohatag.

¹² Eris miakaikai emda nelcau an nohatag an naopan iyehki is ehcohos pam a Joanes Natimi baptiso, um imyihum pam naopan ineig, era miakaikai a ilpu atimi emda.

¹³ Is amen intas alep is aged a Moses im ilpu profeta asega, um esege um yetpan irai Joanes.

¹⁴ El eka merit aijaua natovaig, Elaija mun eigki, eris ika. Etpu ham aien.

¹⁵ Aien et eteuc intikgan aien par ahgei itai, etmu atahaijeg aien.

¹⁶ ¶ Inki ika ainyak, era idivanhe natimi an naopan ineig? era idivaig ilpu halav ara, era ateuc ara irai tiptag, um ahlaig vai ilpu etoara,

¹⁷ um ika, Ecra mun ahlai nau vai caua aijama, ja eka eti adikjai aijaua; ecra mun ehteigtaig imi caua aijama, ja eka eti taig aijaua.

¹⁸ Is wat ham a Joanes, is eti hag aien um eti umwig, ja eris ika ara, Et amen iran a nagelo has.

¹⁹ Is wat ham a Inhal o natimi, is hag aien um umwig, ja eris ika ara, Almoi natimi ineigki et hag alupas aien, um umni waina, et etoai ilpu atimi akwanaham aien im ilpu atimi auatatimi. Ja era ika a ilpu atimi arapakau, Et idim upene narapakau.

²⁰ ¶ Is ated nup urai uari-pece iji ehki aien is ago niji auritai esjilid o un is ahinag iran aien, va nedo ura, nikavaig, eris eti adumoij anliinmopura ara:

²¹ Aʼa, auwe vai caua, ak nupu Koresin! aʼa, auwe vai caua, ak nupu Bedseta! el eris ago nauritai esjilid iji eigki an nuhup u nupu Tairus im nupu Saiton eris mun ago an nuhup unyimia, el eris adumoij anliinmopura ara itu acen, um aso ra irai apelumai ucai, um ereuc an nohpa.

²² Ek asaig ehelemia ainyak mika, Inyi idim tintin nohocred o nupu Tairus im nupu Saiton an nadiat almoijidjid, ja etpu idim esjilid nohocred unyimia.

²³ Ak nupu Kaperneum, eris atijai caua an nohatag, ja uhpu ethainse caua sepagko an naupat: el eris ago nauritai esjilid iji eigki an pece Sotom eris mun ago iramia, el et eteuc an naopan ineig.

²⁴ Ek asaig ehelemia ainyak mika, Inyi idim tintin nohocred o nupu Sotom an nadiat almoijidjid, ja etpu idim esjilid nohocred unyimia.

²⁵ ¶ An naopan iyehki is tas a Iesu, um ika, Ek naaurineig ainyak vai euc, ak Etmak, Natimarid an nohatag im nobohtan, va nitai ineigki, nikavaig, na adenaig nitai iji eigki aiek vai ilpu atimi arapakau, im ilpu atimi esjilid an nato itai, jam asuptecnaig ehele ilpu halav:

²⁶ maiya, ak Etmak: is idim ucco inliinmopom aiek.

²⁷ Is ati niji itai asega imi nyak a Etmak: et eti ato Inhal o Atua tah, Etmak ache; um eti ato Etmak tah, Inhal o Atua ache, im lep ra et merit a Inhal o Atua naniv yin vaig ehele ra.

²⁸ ¶ Akumu ahtag pam ehelek aijaua asega, eka auritai aijaua, et lep opouc nitai ahelwei unyimia, ekpu alupai caua nitai atumop iran ainyak.

²⁹ Akumu leh nitai ahelwei unyak aijaua, um idivai nyak; et eropse inliinmopok ainyak um upoupo: akupu leh nitai atumop iran imi nesgamia aijaua.

³⁰ Et tup upene nitai ahelwei unyak, um aiheucaiheuc nitai apos unyak.