Madius 1 - Intas Etipup

Nuarin-tas alupas 1.

¹ NITASVITAI vai ilpu retpoi Iesu Kristo, mapoi Tevit, is mapoi Ebraham aien.

² Is apos Aisak a Ebraham; is apos Jekob a Aisak; is apos Juta im ilpu etoan a Jekob;

³ erus apos Feres im Sera a Juta im Temar; is apos Esrom a Feres; is apos Eram a Esrom;

⁴ is apos Aminatab a Eram; is apos Neson a Aminatab; is apos Salmon a Neson;

⁵ erus apos Boos a Salmon im Rehab; erus apos Obet a Boos im Rud; is apos Jese a Obet;

⁶ is apos Tevit natimarid a Jese; is apos Solomon a Tevit natimarid im lep aien is ehgai Uraia aien;

⁷ is apos Rihoboam a Solomon; is apos Abaija a Rihoboam; is apos Esa a Abaija;

⁸ is apos Jihosofat a Esa; is apos Jihoram a Jihosofat; is apos Usaia a Jihoram;

⁹ is apos Jodam a Usaia; is apos Ehas a Jodam; is apos Hesekaia a Ehas;

¹⁰ is apos Manasi a Hesekaia; is apos Emon a Manasi; is apos Josaia a Emon;

¹¹ is apos Jekonaia im ilpu etoan a Josaia ubutpotet u naopan iyehki eris imyiapan ra Babelon:

¹² eris wat amen Babelon ara, is apos Sialtyel a Jekonaia; is apos Sirubabel a Sialtyel;

¹³ is apos Abaiut a Sirubabel; is apos Elaiakim a Abaiut; is apos Esor a Elaiakim;

¹⁴ is apos Setok a Esor; is apos Ekim a Setok; is apos Elaiut a Ekim;

¹⁵ is apos Eliesar a Elaiut; is apos Matdan a Eliesar; is apos Jekob a Matdan;

¹⁶ is apos Josef natamnyu Mere a Jekob, is risi Iesu aien, eris anvi nidan par ika Kristo.

¹⁷ Eris fortiin a ilpu retpon asega ahes irai Ebraham um yetpan irai Tevit; eris lep fortiin a ilpu retpon ahes irai Tevit um yetpan u nimyiapan ra Babelon; eris lep fortiin a ilpu retpon ahes u nimyiapan ra Babelon um yetpan iran Kristo.

¹⁸ IS um ucce napos Iesu Kristo: Is aminjinai Josef a Mere risin, ja erus eti fi ehramen arau; is um opouc aien vai Nesgan Upene.

¹⁹ Is atoh nedo o Josef natamnyu un, is esjum aien nasuptecnaigvaig, is um ika aien yi atipagki yin, jam eti asaig.

²⁰ Is wat aktaktai nitai iji eigki aien, is ehcohos pan ehelen a nagelo o Ihova an numjeg ahnag o un, um ika, Ak Josef, mapoi Tevit, jim imtitaig aiek inlehvaig Mere ehgam: et opouc aien vai Nesgan Upene:

²¹ etpu apos inhalav atamaig aien, napu anvi nidan aiek par ika Iesu; etpu imyiatamaig ilpu atimi o un aien va nedo has ura.

²² Eris ago nitai iji eigki asega, mikaeriehneijid intas ineigki o Ihova is upyi asaig a naprofeta, um ika,

²³ “Etpu opouc intakata eti ato natamaig inyi ethi, um apos inhalav atamaig, erupu anvi nidan ara par ika Emanuel,” nesgan tas ineigki, Atua eheleija.

²⁴ Is wat aiji a Josef, is ago aien nitai ineig is asaig ehelen a nagelo o Ihova, ura leh yin ehgan:

²⁵ is eti ato yin aien, um uhum pan naopan iyehki is apos inhalav atamaig o un aien inmetto: is anvi nidan aien par ika Iesu.