Lukas 7 - Intas Etipup

Nuarin-tas alupas 7.

¹ IS tas ehni aien irai tas asega o un ehele atimi, ja par apan Kaperneum.

² Is emehe naheca o natimi alupas o ilpu eucsupo is ethi, um ubutpotet o unmas o un, is aiyu inliinmopon aien vai yin.

³ Is wat atahaijeg vai Iesu aien, is abrai ilpu atimi tas alep u nupu Jutaia aien, mika eri apan ara um ugni yin, mika yi han aien um ago cehcehe naheca o un.

⁴ Eris apan ehele Iesu ara, um ugni emda yin ara, um ika. Et atimi upene aien mika an ago nitai ineigki aiek vai yin:

⁵ et aiheuc vai nup uran pece uja aien, um ago neom alaigaheni vai cama.

⁶ Is ahced ra a Iesu. Is wat ubutpotet pan u neom aien, is abraig pan ilpu etoan a natimi alupas o ilpu eucsupo ehelen, mika eri ika ehelen ara, Ak Natimarid, jim imyidohalav euc aiek: ek eti upene ainyak, mika an apam aiek anliin neom unyak:

⁷ ek idim ika ainyak, ek eti upene ainyak napamvaig ehelum: namu tup asan tas ache aiek, etum umoh a naheca unyak:

⁸ ek aheca ainyak, eris ati nyak, ja era imyiaiji intas unyak a ilpu eucsupo: ek ika ainyak ehelen et ethi, Apan aiek, et um apan aien; im lep ehelen et eche, Apam aiek, et um apam aien: im lep ehele naheca unyak. Ago nitai ineigki aiek, et um ago aien.

⁹ Is wat atahaijeg intas ineigki a Iesu, is imyiali yin aien, um ahidai yin, um ika ehele ilpu atimi ahced yin, Ek asaig ehelemia ainyak mika, kis eti ecetai tah nimyiisjis ninivaijec esjilid ainyak, et idivaig ineig, an pece Isreel asega.

¹⁰ Eris wat lep apan an neom ara sji ehki eris abrai ra, eris ecet naheca iyehki ara is emehe aien numohvaig.

¹¹ IS wat lahlah an tak apnyin, is apan aien an nuarin-pece is ethi, nidan Nein; eris ahced yin a ilpu atimi atahaijeg yin is ahinag, im lep atimi asega.

¹² Is wat apan aien ubutpotet u neucse nathatahau an nuarin-pece iyehki, eris ahlisahlis natimi mas is ethi, is halav atamaig is ethi ache o risin aien, is mas natamnyu un: eris ahced yin natimi is ahinag an nuarin-pece iyehki.

¹³ Is wat alum yin a Natimarid, is aiheuc vai yin aien, um ika ehelen, Namu tinau aiek.

¹⁴ Is apan aien um atcei pan nahat; eris aiji a ilpu atimi ahlisahlis yin. Is ika aien, Ak intakuras ineigki, ek ika ehelum ainyak, Namu atidai aiek.

¹⁵ Is um atidai natimi mas iyehki, um tas. Is ati yin aien ehele risin.

¹⁶ Eris imtitaig ara asega: eris imyiahpas Atua ara, um ika, Et mun atidai eheleija naprofeta esjilid et ethi; um lep ika, Et mun ateghe ilpu atimi o un a Atua.

¹⁷ Is apaahni intas ineigki vai yin an pece Jutaia asega, im lep irai iji uari pece asega marahed mihtag.

¹⁸ ERIS asuptecnaig ehele Joanes nitai iji eigki asega a ilpu atimi atahaijeg yin.

¹⁹ Is ahlaig a Joanes vai ohwat atimi atahaijeg yin is ero, um abrai rau mika eru apan ehele Iesu, um ahodai yin, um ika, Na atimi iyehki aiek eris ika, Etpu ham aien, ka intupu aitgai yin akaija?

²⁰ Erus apan ehelen natimi erahki, um ika, Et abrai cumrau a Joanes Natimi baptiso, mika ecru ahodai euc, um ika, Na atimi iyehki aiek eris ika, Etpu ham aien, ka intupu aitgai yin akaija?

²¹ Is um ago cehcehe atimi is ahinag aien an nuarin-nadiat iyehki va nauatialidi ira ra, im nemehe has, im ilpu agelo has; um ago lah nesganimta atimi is ahinag is aupat nesganimtara.

²² Is tas a Iesu, um ika ehele rau, Apan aijaurau um asuptecnaig ehele Joanes nitai iji eigki erau mun almoi aijaurau um atahaijeg vaig; nikavaig, et lep lah nesganimtai ilpu atimi aupat nesganimtara, um atga a ilpu atimi asvahteuc neduora, um adicinadicin a ilpu atimi lepros, um ahgei itai a ilpu atimi ucjapines intikgara, um anusjai a ilpu atimi emesmas, eh lep asuptecnaig intas-upene ehele ilpu ihki atimi.

²³ Et mun ahesmoij natimi ineig, et eti imyiehcamai nyak aien.

²⁴ ¶ Erus wat atga urau a natimi erahki is abrai rau a Joanes, is tas ehele atimi a Iesu vai Joanes, um ika, Akis apan aijaua an namasacen par almoi inhe? nieg is amaamai iran nimtinjop, ka oʼo?

²⁵ akis idim apan aijaua par almoi inhe? natimi is aso yin aien an napelumai yilyil, ka oʼo? ara era aso ra ara irai apelumai esjilid, um leh nitai caig upene, era amen ara irai eom o ilpu atimarid:

²⁶ akis idim apan aijaua par almoi inhe? naprofeta is ethi, ka oʼo? Maiya, ek asaig ehelemia ainyak mika, et esjilid aien irai ilpu profeta:

²⁷ aien aigki eris aged intas vai yin, um ika, “Ek idim abrai naheca unyak ainyak mika yi uhup iram, etpu ahped nefalaig imi euc aien, um uhup iram.”

²⁸ Ek asaig ehelemia ainyak mika, Is eti eteuc tah naprofeta ira atimi iji eigki eris apos ra a risira, nesjilidvaig irai Joanes Natimi baptiso: ja et esjilid iran aien et upoupo aien an nelcau o Atua.

²⁹ Eris aktaktai upene Atua atimi asega eris atahaijeg yin ara, im ilpu atimi akwanaham, eris upyi leh nabaptiso o Joanes ira ra ara.

³⁰ Ja eris ahcaijaig intas o Atua vai ra a ilpu Farisi im ilpu atimi esege, eris eti fi leh nabaptiso o un ira ra ara.

³¹ ¶ Is um ika a Natimarid, Inki ehve tas ecsipece ainyak va atimi an naopan ineig? era idivanhe ara?

³² era idivaig ilpu halav ara, era ateuc ara irai tiptag, um ahlaig jipe vai ra, um ika, Ecra mun ahlai nau vai caua aijama, ja eka eti adikjai aijaua; ecra mun ehteigtaig imi caua aijama, ja eka eti taig aijaua.

³³ Is ham a Joanes Natimi baptiso um eti caig nitai caig aien, um eti umnyi waina; ja eka ika aijaua, Et amen iran a nagelo has.

³⁴ Et mun ham a Inhal o natimi, um hag um umwig; ja eka ika aijaua, Almoi natimi ineigki, et hag alupas aien, um umnyi waina, et etoai ilpu atimi akwanaham aien, im ilpu atimi auatatimi!

³⁵ Ja era ika a ilpu atimi arapakau asega, Et idim upene narapakau.

³⁶ ¶ Is imyiacaij yin a Farisi is ethi mika yi apan aien um hag ehelen. Is apan aien anliin neom o Farisi iyehki, um ateuc um hag.

³⁷ Is amen an nuarin-pece iyehki intakata auatatimi is ethi, is wat ato aien, nikavaig, is ateuc a Iesu um hag anliin neom o Farisi, is leh nipjinitai alabaster aien is amen iran nitai aspi,

³⁸ is aiji u neduon aien an nidjin, um taig, um yiri neduon irai idi imtan, um yiri mese irai umri idjinin, um ajumnyi neduon, um aspi an nitai aspi iyehki.

³⁹ Is wat ecetai a Farisi iyehki is imyiacaij yin aien, is aktaktai inliinmopon aien, um ika, El et aprofeta natimi ineigki, el et mun ato intakata ineigki aien et atcei pan yin aien, im nedo o un; et takata auatatimi aien.

⁴⁰ Is tas a Iesu, um ika ehelen, Ak Saimona, ek merit ainyak intasvaig ehelum. Is ika aien, Ak natimi esege, namu tas aiek.

⁴¹ Is ika aien. Is eteuc natimi ahtai itai is ethi, erus eti aru mune: o un natimi is ero: is eti aru nuarimune is faiv huntret natimi is ethi, um eti aru nuari-mune is fifte natimi is ethi.

⁴² Is wat eti eteuc tah nitai urau nimtan, is um eti aktaktai nimtan; urau aien. Asuptecnaig ehelek aiek, um ika, inyi esjilid naiyu u inliinmopon tah rau a di vai yin.

⁴³ Is tas a Saimona, um ika, Ek ika: ainyak natimi ineig is eti aktaktai nimtan alupas o un aien. Is ika ehelen aien, Et inivaijec intas unyum.

⁴⁴ Is ahidaig pan yin ehele intakata iyehki aien, um ika ehele Saimona, Almoi intakata ineigki aiek; ek mun ham anliin neom unyum ainyak, ya nai eti alupai nyak inwai yiri neduok aiek: ja et mun yiri neduok irai idi imtan aien, um lep yiri mese irai umri idjinin.

⁴⁵ Na mun eti ajumnyi nyak aiek: ja ek wat ham inliin neom ainyak, et mun ajumnyi neduok intakata ineigki um eti atumop.

⁴⁶ Na mun eti aspi nipek unyak aiek: ja et mun aspi neduok a intakata ineigki an nitai aspi.

⁴⁷ Va nitai ineigki, ek asaig ehelum ainyak mika, Eh mun iknipagki nedo has is ahinag o un; va nedo ineigki et aiyu alupas inliinmopon aien vai nyak; aien er iknipagki nedo has eti elpat o un, et aiyu tintin inliinmopon aien vai nyak.

⁴⁸ Is ika ehelen aien, Eh mun iknipagki nedo has unyum.

⁴⁹ Ara eris ateuc um hag ehelen ara, is ika inliinmopura ara, Di neigki, et lep iknipagki nedo has aien?

⁵⁰ Is ika ehele intakata aien, Eh mun imyiatamaig euc va nimyiisjis ninivaijec unyum; atga unyum aiek an neigpa.