Lukas 23 - Intas Etipup

Nuarin-tas alupas 23.

¹ ERIS atidai ara asega, eris ahinag ara, um imyiapan yin ehele Pailet

² Eris atupun ara um atijai itai iran, um ika, Ecris ecet nat eigki aijama nauahas vaig inliinmopoi atimi an pece, is acaiji ra aien mika eri jim ahtai mune imi Sisar, um ika, Ek Kristo ainyak Natimarid.

³ Is ahodai yin a Pailet, um ika, Na atimarid u nupu Jutaia aiek, ka oʼo? Is tas ehelen aien, um ika, Na mun asaig aiek.

⁴ Is ika a Pailet ehele ilpu atimi ahlap esjilid im lep atimi asega, Ek mun eti ecetai tah nedo has o natimi ineigki ainyak.

⁵ Is esjilid acen nedemda ura ara, um ika, Et auahas inliinmopoi atimi aien, um esege an pece Jutaia asega, is atupun aien Calili um yetpam igcaki.

⁶ Is wat atahaijeg vaig Calili a Pailet, is ahodai ra aien, um ika, Et upu Calili a natimi ineigki, ka oʼo?

⁷ Is wat ato aien, nikavaig, is up uran nelcau o Herot aien, is imyiapan yin ehele Herot aien, is amen Jerusalem aien an naopan iyehki.

⁸ ¶ Is wai ecet Iesu a Herot, is imyiacitak alupas aien: is merit aien itu acen necet yin vaig, is atahaijeg niji itai is ahinag vai yin aien; is lep ika aien yi almoi tah: nauritai ehka yi ago aien.

⁹ Is ehcahinag ahodai yin aien vai itai; ja is eti asuptecnaig tah nitai a Iesu.

¹⁰ Eris aiji a ilpu atimi ahlap esjilid im ilpu atimi esege, um atijai emda itai iran.

¹¹ Is ika a Herot im ilpu eucsupo i o un et takitai aien, um imyiafakahcil yin, um aso yin an napelumai esjilid, um lep imyiapan yin ehele Pailet.

¹² An nadiat iyehki erus pah tas arau Pailet im Herot: erus upyi hup arau um edemda jipe vai rau.

¹³ ¶ Is asjapicnaig ilpu atimi! ahlap esjilid a Pailet, im ilpu atimi alupas, im atimi asega,

¹⁴ um ika ehele ra, Eka mun imyiapam natimi ineigki ehelek aijaua, um ika, Et auahas inliinmopoi atimi aien; ja ek mun idim ahilek nedo o un ainyak an nuhup unyimia, jam eti ecetai tah nedo has o natimi ineigki et idivaig i nitai iji eigki eka mun atijai iran aijaua:

¹⁵ um lep ucce a Herot: ek mun abraig pan caua ehelen ainyak; ja is eti ago tah nedo ineig aien uhpu atgei yin vaig:

¹⁶ ekpu aredei yin ainyak, um ahiyi yin.

¹⁷ (Eris idim ika yi ahiyi natimi is ethi imi ra aien irai iji asjapicnaig.)

¹⁸ Eris ehlis nahlaig ijinies ara asega, um ika, Imyiapan nat eigki aiek, um ahiyi Barabas imi cama:

¹⁹ (natimi iyehki eris upyi ati yin an neom ipjin, va nehtauo o un an nuarin-pece itaup, im natgei atmas.)

²⁰ Is merit a Pailet nahiyi Iesu vaig; va nitai ineigki is lep tas ehele ra aien.

²¹ Ja eris lep ahlaig ara, um ika, Atgei yin aiek an nauincai atgeig, atgei yin aiek an nauincai atgeig.

²² Is ehceseij tas ehele ra aien, um, ika, Auri? is ago nev edo has aien? ek mun eti ecetai tah nedo has ineig ainyak is ago aien uhpu atgei yin vaig: ekpu aredei yin ainyak, um ahiyi yin.

²³ Ja eris tas emda ara, um ahlaig ijinies mika eri atgei yin an nauincai atgeig. Is esjilid intas ura, im intas o ilpu atimi ahlap esjilid.

²⁴ Is ika a Pailet eri ago yi idivaig intas ura:

²⁵ is ahiyi natimi iyehki imi ra aien, eris ati yin an neom ipjin va nehtauo im natgei atmas o un, eris merit vai yin ara; ja is ati Iesu ehele ra aien mika eri algei yin et idivaig inmerit ura.

²⁶ ¶ Eris wat imyiapan yin ara eris asjiraig natimi is ethi ara nidan Saimona, nupu Sairini, is ahes an tah anuarin aien, eris atijai iran nauincai atgeig ara, mika yi ahelwei nilpun aien, um apitac Iesu.

²⁷ Eris apitac yin atimi is ahinag, im lep ilpu takata, eris ehtigtaig ara, um imyitaig yin.

²⁸ Is ahidaig pan yin ehele ra a Iesu, um ika, Ak ilpu takata Jerusalem, akumu jim imyitaig nyak aijaua, akumu imyitaig caua aijaua, im ilpu hal unyimia:

²⁹ etpu yetpam naopan iyehki eru wit ika ara, Era mun ahesmoij ara eris eti asvalav ara, um eti alidai ilpu halav.

³⁰ Erupu ika ara an naopan iyehki, Etmu eropse niji edoon irama; etmu adahpoi cama niji edoon.

³¹ El eh ago nitai iji eigki an nauincai mat, uhpu ago inhe an nauincai mese?

³² ¶ Eris ehrimyiapan yin im natimi auatatimi is ero, eris ika ara eri atgei ehtaij.

³³ Eris wat yetpan ara an nuarin iyehki nidan Kalvare, eris atgei yin ara an nauincai atgeig, im lep natimi auatatimi erahki, is ethi an matan, im lep is ethi an moun.

³⁴ Is ika a Iesu, Ak Etmak, jim aru nedo has ura aiek; era eti ato ara nitai ineig era ago ara. Eris ahai apelumai o un ara irai itai asjaaicnaig.

³⁵ Eris aiji atimi um almoi. Eris imyiafakahcil yin ara, im lep ilpu atimi alupas, um ika, Is imyiatamaig tak atimi aien; el et Kristo aien natimi is ati yin a Atua, etmu imyiatamaig yin aien.

³⁶ Eris lep imyiafakahcil yin a ilpu eucsupo, um apan ehelen, um aluman vinecar,

³⁷ um ika, El et atimarid u nupu Jutaia aiek, namu imyiatamaig euc aiek.

³⁸ Eris aged nitasvitai an tas Crisi, im Roma, im Jutaia, um ati ijinies ithan, um ika, NATIMARID U NUPU JUTAIA INEIGKI.

³⁹ ¶ Is atuh yin natimi auatatimi is ethi ira rau eris atgei rau, um ika, El et Kristo aiek, namu imyiatamaig cataij aiek.

⁴⁰ Is tas a etoan, um ated yin, um ika, Nai eti imtitai Atua aiek? et tup ethi ache nimtan imi cataij:

⁴¹ eh mun idim ago nedo atoh vai caijau; intau mun leh nimtan nedo ujau akaijau: ja is eti ago tah nedo has natimi ineigki.

⁴² Is ika aien ehele Iesu, Ak Natimarid, namu imyiehva nyak aiek, na wit apan an nelcau unyum aiek.

⁴³ Is ika ehelen a Iesu, Et inivaijec ineig ek asaig ehelum ainyak mika, Napu amen ehelek aiek a paratais an nadiat ineigki.

⁴⁴ ¶ Is wat adiatadiat is asuol inmehcim an pece asega um yetpan an jupki.

⁴⁵ Is aupat nagesega, um ahpati juju natcai apelumai anliin neom ahlap.

⁴⁶ Is ahlaig ijinies a Iesu, um ika, Ak Etmak, ek ati nesgak ainyak an nikmam: is wat ucce intas o un, is edekjai nesgan aien.

⁴⁷ Is wat almoi nitai iji eigki a natimi alupas u ilpu eucsupo, is imyiahpas Atua aien, um ika, Et idim atimi upene natimi ineigki.

⁴⁸ Eris wat almoi nitai iji eigki a ilpu atimi asjapicnaig par almoi nitai iyehki, eris ahpoijirai ritira ara, um atga ura.

⁴⁹ Eris aiji itac acen a ilpu etoan asega, im ilpu takata eris ahes Calili ara um ahced yin, um almoi nitai iji eigki.

⁵⁰ IS eteuc natimi is ethi nidan Josef; is atimi tas alep aien, um atimi upene, um atoh nedo o un.

⁵¹ (Is eti atau an tas alep ura aien im nedo ura:) is upu Arimadia aien, nuarin-pece is ethi o nupu Jutaia; is aitgaig nelcau o Atua aien.

⁵² Is apan a natimi ineigki ehele Pailet, um ugni nohui Iesu.

⁵³ Is atise nohun aien, um aso an napelumai yilyil, um ati an mun nij eris ahti, eris pam eti ati tah natimi mas iran.

⁵⁴ Is adiat imyecrei itai iran yehki, um ubutpotet u nadiat atumop.

⁵⁵ Eris lep apitac a ilpu takata iji ehki eris ahes Calili ara um ahced yin, um ecetai inmun nij im nati nohun iran.

⁵⁶ Eris atga ura ara, um ago nitai aspi auanipin upene; eris atumop ara an nadiat atumop et idivaig intas alep.