Lukas 20 - Intas Etipup

Nuarin-tas alupas 20.

¹ IS esege imi atimi aien anliin neom ahlap, an naopan iyehki an nadiat is ethi, um asuptecnaig intas-upene, eris apan ehelen a ilpu atimi ahlap esjilid, im ilpu atimi esege, im ilpu atimi tas alep,

² um tas ehelen, um ika, Na ago nitai iji eigki aiek vai intas alep u di? asuptecnaig ehelema aiek; is alupai euc nemda ineigki a di?

³ Is tas ehele ra aien, um ika, Ekpu lep ahodai caua ainyak va nitai inyi ethi ache; asuptecnaig ehelek aijaua:

⁴ Is ahes nabaptiso o Joanes an nohatag, ka ehele atimi?

⁵ Eris tas jipe ehele ra ara, um ika, El ta ika akaija, Is ahes an nohatag; etpu ika aien, Akis auri aijaua par eti imyiaiji intas o un?

⁶ Ja el ta ika akaija, Is ahes ehele atimi; erupu asji caija irai hat atimi asega: era ika ara is idim aprofeta a Joanes.

⁷ Eris tas ara, um ika, Ecra eti ato aijama nuarin ineig is ahes iran.

⁸ Is ika ehele ra a Iesu, Inki ti asuptecnaig ehelemia ainyak nohu nemda ineig ek ago nitai iji eigki vaig ainyak.

⁹ ¶ Is atupun aien um asan tas ecsipece ineigki ehele atimi, um ika, Is ahoaig vaine natimi is ethi anliin nekaro o un, um atceijaig imi ilpu atimi ahapol, um atga o un, um apan an pece itac acen, um amen is itu iran.

¹⁰ Is wat metto nohoan, is abraig pan naheca is ethi o un aien ehele ilpu atimi ahapol, mika eri alupai yin nahaiji ohoai itai an nekaro vaine o un: ja eris aredei yin a ilpu atimi ahapol, um abraig pan yin, um eti alupai yin tah nitai.

¹¹ Is lep aketo aien um abraig pan naheca o un is ethi is eche: eris lep aredei yin ara, um ago nedo has esjilid vai yin, um abraig pan yin, um eti alupai yin tah nitai.

¹² Is um lep aketo aien um abraig pan is ethi is eche: eris ati inmacop iran ara, um ethaig pan itac yin.

¹³ Is ika a natimi alupas ohuun nekaro vaine iyehki, Inki ago inhe ainyak? ekpu abraig pan inhalav cop unyak ainyak: eru wit ecet yin ara, kit erupu ago nedo eccen vai yin ara.

¹⁴ Ja eris wat ecet yin a ilpu atimi ahapol, eris tas jipe ehele ra ara, um ika, Natimi ineigki etpu isjipigmoig etman aien: ti apan akaija um atgei yin, va yi upu uja uman.

¹⁵ Eris ethaig pan itac yin ara an nekaro vaine, um atgei yin. Etpu ago inhe ira ra a natimi alupas ohuun nekaro vaine?

¹⁶ Etpu idim han aien, um atgei ilpu atimi ahapol iji ehki, um atceijaig nekaro vaine o un imi tak atimi. Eris wat atahaijeg intas ineigki ara, eris ahras ara um ika. Oʼo.

¹⁷ Is alum ra aien, um ika, Inhe neigki eris aged, nikavaig, “Inhat ineig eris esjum vaig a ilpu atimi acta neom, et hat esjilid ineigki an nesvi va neom”?

¹⁸ Aien inyi eropjai an hat iyehki aien, etpu auhoig yi oplecoplec yin aien; aien inyi etjojai iran inhat ineigki, etpu ehtoplecoplec yin inhat.

¹⁹ An nuarin-nadiat iyehki eris merit a ilpu atimi ahlap esjilid, im ilpu atimi esege, narop iran vaig; eris imtita atimi ara: eris ato ara, nikavaig, is asan tas ecsipece ineigki aien vai ra.

²⁰ Eris imyiiris yin ara, um abraig pan atimi efaifa, mika eri aminjinai yin, jam idivaig atimi inivaijec, um tasehlek tas o un; eris ika ara eri atceijai yin ehele natimarid an pece, mika yi tas alep vai yin aien.

²¹ Eris ahodai yin ara, um ika, Ak natimi esege, ecra ato aijama mika et inivaijec intas unyum im i nesege unyum, na eti imtita atimi aiek, jam esege inivaijec nedo o Atua:

²² Et itaup vai cama nahtaivaig mune imi Sisar, ka oʼo?

²³ Ja is ato nefaifa ura aien, um ika ehele ra, Eka auri aijaua par oop nyak?

²⁴ leh pam aijaua ehelek mune yi ethi, ki almoi ainyak. Nalmui di ineigki, im nidai di eris aged iran? Eris tas ara, um ika, Sisar.

²⁵ Is ika ehele ra aien. Alupai Sisar niji itai o Sisar, jam ahtai imi Atua niji itai o Atua.

²⁶ Is ehka vai ra inlehvaig intas o un an nuhup o atimi: eris imyiali intas asuptecnaig o un ara, um eti tas.

²⁷ ¶ Eris apan ehelen nahaiji ilpu Satusi, atimi iji eigki eris ika ara eri eti lep anusjai atimi emesmas; eris ahodai yin ara,

²⁸ um ika, Ak natimi esege, is aged eheleija a Moses, um ika, El et mas etoan tah natimi, um ude ehgan, jam eti eteuc inhal urau, el etmu leh ehgan a etoan, um asvalav vai etoan.

²⁹ Eris amen ilpu raimu is seven: is leh ehgan a inmetto, um mas, is um eti eteuc inhal urau:

³⁰ is lep leh yin a etoan is ethi ehgan, um mas, is um eti eteuc inhal urau:

³¹ is um lep leh yin a etoan is ethi is eche; eris um leh yin a ilpu raimu is seven, um emesmas: is um eti eteuc inhal o un tah ra:

³² is par apitac a intakata, um mas:

³³ ja an nadiat anusjai inyi ehgan tah ra sji eigki a di aien? eris leh yin ehgara a ilpu raimu is seven.

³⁴ Is tas a Iesu, um ika ehele ra, Era atmehgan a nup uran nobohtan ineigki, um asanlai:

³⁵ ara uhpu ika eri upene ara um apan an pece iyehki um anusjai, eri eti atmehgan ara, um eti asanlai:

³⁶ eri eti lep emesmas ara: erupu tup idivaig ilpu agelo ara; erupu hal o Atua ara, im ilpu halav anusjai.

³⁷ Im lep ineig, is asuptecnaig a Moses an cai, mika erupu anusjai a ilpu atimi emesmas, is wat anvi nidan aien Ihova par ika “Atua o Ebraham, im lep Atua o Aisak, im lep Atua o Jekob.”

³⁸ Et eti Atua o ilpu atimi emesmas aien, ja et Atua o ilpu atimi umumoh ache aien: era umumoh atimi asega vai yin.

³⁹ Eris tas nahaiji ilpu atimi esege, um ika, Ak natimi esege, na mun asuptecnaig upene aiek.

⁴⁰ Is wat ti pan itac intas iyehki, eris lep imtitaig ara inlep ahodai yin vaig vaig tah nitai.

⁴¹ ¶ Is ika ehele ra aien, Era auri ara par ika, Et mapoi Tevit a Kristo?

⁴² Is um ika a Tevit an nitasvitai Ohranitai, “Is ika a Ihova ehele Natimarid unyak, Namu ateuc aiek an matak,

⁴³ um uhum pan naopan iyehki ekpu ikni ilpu atimi tak atimi iram ainyak mika eri itai atijai neduom iran.”

⁴⁴ Va nitai ineigki et anvi nidan a Tevit par ika Natimarid; et echamecha et pali mapon aien?

⁴⁵ ¶ Is tas aien ehele ilpu atimi atahaijeg yin an nuhup o atimi asega, um ika,

⁴⁶ Akumu aminjinai caua aijaua vai ilpu atimi esege, era merit ara naso ra vaig irai apelumai opra, um era lep merit ara mika eri aiheuc vai ra atimi irai uarin asjapicnaig atimi iran, era lep merit ara va niji itai ateuc esjilid irai eom alaigaheni, im ep niji uarin esjilid u inhag o atimi;

⁴⁷ era atoraliak inpadiaig o ilpu takata eris emesmas a ilpu atamnyura ara, um alaigaheni opra par adahpoi nedo ura: etpu esjilid nohocred ura.