Lukas 13 - Intas Etipup

Nuarin-tas alupas 13.

¹ AN naopan iyehki eris amen eahki nahaiji ra um asuptecnaig nupu Calili iji ehki ehelen, is pelaigpelaig inja ira ra a Pailet pan irai itai ahlap ura.

² Is tas a Iesu, um ika ehele ra, Akumu jim ika aijaua is esjilid nedo has o nupu Calili iji ehki irai edo has o nupu Calili asega, va niji ohocred iji ehki is yetpan ira ra:

³ ek idim ika ehelemia ainyak, Oʼo: ja el eka eti adumoij anliinmopomia aijaua, uhpu idim lep auahas caua asega.

⁴ Im lep atimi is eetiin iji ehki is jase neom ijinies ira ra Siloam, um atgei ra, akumu jim ika aijaua, is esjilid nedo has ura irai edo has o atimi asega eris amen Jerusalem ara:

⁵ ek idim ika ehelemia ainyak, Oʼo: ja el eka eti adumoij anliinmopomia aijaua, uhpu idim lep auahas caua asega.

⁶ ¶ Is lep ecsipece aien, um ika, Is ahoaig nateg an nekaro vaine o un natimi is ethi; is apan aien um ahilek nohoan, jam eti ecetai.

⁷ Is ika aien ehele natimi aminjinai nekaro vaine o un, Kis idim ham ainyak an mesese is eseij, um ahilek nohoan nateg ineigki, jam eti ecetai: namu acaldei aiek; et tup arih nekaro.

⁸ Is tas aien, um ika ehelen, Ak natimi alupas, ude aiek inyi lep amen an mesese ineigki, ekpu ucji arahed o un ainyak, um aheh o un:

⁹ el et oho, el et upene: ja el eti oho, napu acaldei aiek.

¹⁰ ¶ Is esege imi ra aien anliin neom alaigaheni is ethi an nadiat atumop.

¹¹ Is eteuc eahki intakata is ethi is areci aien irai mesese is eetiin va nagelo has is amen iran; is acvacva aien, is elika vai yin natidaivaig.

¹² Is wat ecet yin a Iesu, is ahlaig vai yin aien, um ika ehelen, Ak intakata ineigki, eh mun atipagki nareci iram.

¹³ Is atijai nikman iran aien: is auroauro aien um atidaijai, um imyiahpas Atua.

¹⁴ Is tas edemda a natimi alupas an neom alaigaheni va nedo o Iesu, nikavaig, is ago cehcehe yin aien an nadiat atumop, um ika ehele atimi, Et eteuc nadiat et siks eris idim ika eri auritai iran natimi: apam aijaua ira adiat iji eigki, va uhpu ago cehcehe caua, jam jim ham an nadiat atumop.

¹⁵ Is tas ehelen a Natimarid, um ika, Ak natimi efaifa, natimi ineig yek eda iramia, et eti ikni pan itac kurimatau o un aien ka nifo o un an nadiat atumop, um imyiapan ui wai?

¹⁶ ja et hal o Ebraham intakata ineigki, is arore yin a Satana irai mesese is eetiin, et upene nedo ineigki par ahiyi nitai arore yin an nadiat atumop.

¹⁷ Is wat asan tas iji eigki aien, eris ehcamai a ilpu atimi tak atimi iran asega: eris imyiacitak natimi asega va niji itai esjilid asega is ago aien.

¹⁸ ¶ Is ika aien, Et idivanhe nelcau o Atua? ekpu evecsipece ainyak par asuptecnaig?

¹⁹ et idivaig nupsi mustart, is leh natimi is ethi, um ahoaig uman: is um edel, um ohu u nitai alupas; eris amen inman irai ran.

²⁰ Is lep ika aien, Ekpu evecsipece ainyak va nelcau o Atua?

²¹ et idivaig leven, is leh intakata is ethi, um ati a flaur ehceseij asjaaicnaig iran, is um leven asega.

²² IS apan aien irai iji uari-pece esjilid, im irai uari-pece haklin, um esege ra, um atga an nefalaig pan Jerusalem.

²³ Is um ika ehelen natimi is ethi, Ak Natimarid, uhpu imyiatamaig natimi inyi ti elpat, ka oʼo? Is ika ehele ra aien,

²⁴ Akumu eriss emda aijaua an neucse nirahed ehroehro: ek asaig ehelemia ainyak mika, erupu merit atimi inyi ahinag mika eri atga iran, ja inyi elika vai ra;

²⁵ et wit atidai natimi alupas an neom, um atapanes an tapanes, aku wit atupun aijaua um aiji ijo, um etcetcei intapanes, um ika, Ak Natimarid, ak Natimarid, asalgei vai cama aiek: etpu tas aien, um ika ehelemia, Ek eti ato caua ainyak, im inuarin ineig eka ahes iran aijaua:

²⁶ akupu atupun aijaua, um ika, Ecris mun hag aijama um umwig an nuhup unyum, as esege aiek irai efalaig an nuarin-pece unyima.

²⁷ Ja etpu ika aien, Ek asaig ehelemia ainyak mika, Ek eti ato caua ainyak, im inuarin ineig eka ahes iran aijaua; akumu atga unyimia aijaua asega, ak ilpu atimi ago nedo has.

²⁸ Aku wit almoi Ebraham aijaua, im Aisak, im Jekob, im ilpu profeta asega, an nelcau o Atua, ja uhpu ahlo pan itac caua, akupu aunyauwaig aijaua um ataktit eijimia.

²⁹ Erupu ahes an ridjai o un ara, im nete o un, im narutu, im nuritoga, um ateucse an nelcau o Atua.

³⁰ Ara era apitac ara erupu uhup ara, jai ara era uhup ara erupu apitac ara.

³¹ ¶ An naopan iyehki eris apan nahaiji ilpu Farisi, ura ika ehelen. Namu atga unyum aiek, um apan an taka uarin; et ika a Herot yi atgei euc.

³² Is ika ehele ra aien, Akumu apan aijaua, um asaig ehele kuri aleg naico, mika ek idim ahlo ilpu agelo has ainyak, um ago cehcehe atimi inpeig im lep imraig, ja an vid uhpu ago ehni nauritai unyak.

³³ Ja ek et hidim ika ainyak ki atga inpeig, im imraig, im lep vid: er eti auahas tah naprofeta irai taka uarin, Jerusalem ache.

³⁴ Ak Jerusalem, ak Jerusalem, na atgei ilpu profeta aiek, um asji ra sji eigki irai hat eris abraig pan ra ehelum; kis ehcahinag merit ainyak mika ki asjapicnaig pam ilpu hal unyum et idivaig injaa et aibuthan hal o un aien, ja akis esjum aijaua!

³⁵ Et idim eteuc neom unyimia, ja et ahyuahyu: et inivaijec ineig ek asaig ehelemia ainyak mika, Akupu eti ecet nyak aijaua um uhum pan naopan iyehki, akupu ika aijaua, Et mun ahesmoij aien et ham aien an nidai Natimarid.