Levitikus 9 - Intas Etipup

Nuarin tas alupas 9.

1 Niji itai ahlap uhup u Eron vai yin, im lep vai nup Isreel. 8 Nitai ahlap va nedo has, 12 im nitai ahlap er atnamud vai yin. 15 Niji itai ahlap va atimi. 23 Erau asan tas acis yi alwai atimi a Moses im Eron. 24 Et ahes ehele Ihova incap um asuol an natau.

¹ IS wat lahlah an nadiat eetd, is ahlaig a Moses vai Eron im ilpu hal o un, im ilpu atimi alupas u nup Isreel;

² is ika ehele Eron aien, Namu leh inhakli kurimatau yi ethi aiek uri nitai ahlap va nedo has, im siip atamaig yi ethi et ti nitai has iran, uri nitai ahlap atnamud, um ahlap iran an nuhup u Ihova;

³ um tas ehele nup Isreel, um ika, Akumu leh inhakli nanin yi ethi aijaua uri nitai ahlap va nedo has; im lep inhakli kurimatau yi ethi, im inhakli siip yi ethi, et eteuc inmesese et ethi ira rau, um ti nitai has ira rau, uri nitai ahlap atnamud;

⁴ im lep kurimatau atamaig yi ethi, im siip atamaig yi ethi uri nitai ahlap naaurinig, um ahlap iran an nuhup u Ihova; im nitai ahlap an nareto er aplamod pelaig an narakei: etpu idim ehcohos pam ehelemia a Ihova an nadiat inigki.

⁵ Eris imiapam nitai iji igki ara is asaig a Moses an nuhup u neom er asjapicnaig o un: eris apam ubutpotet natimi asega, um aiji an nuhup u Ihova.

⁶ Is ika a Moses, Is tas alep a Ihova, um ika, Akumu ago nedo inigki aijaua: ja akupu ecetai natimi alupas u Ihova aijaua.

⁷ Is ika a Moses ehele Eron, Namu apan u natau aiek, um ahlap an nitai ahlap unyum va nedo has, im nitai ahlap atnamud unyum, va uhpu adahpoi nedo has unyum, im nedo has u atimi: um ahlap an nitai ahlap u atimi va uhpu adahpoi nedo has ura; is idivaig is asaig a Ihova.

⁸ Va nitai inigki is apan a Eron u natau, um atgei inhakli kurimatau mika yi itai ahlap va nedo has o un.

⁹ Eris imiapan inja iran ehele Eron a ilpu hal o un: is ahtaijuli nupsikman an ja aien, um ati irai ipat an natau, um atladwi inja an nohuun natau:

¹⁰ ja is atnamud nagako an natau aien, im nohwanispeheg et ero, im inhadin et amen an mopon an nitai ahlap va nedo has; is idivaig is asaig a Ihova ehele Moses.

¹¹ Is lep atipagki nohun im narasin aien an nuarin amen u atimi um atnamud itac an cap.

¹² Is atgei nitai ahlap atnamud aien; eris imiapan inja iran ehele Eron a ilpu hal o un, is ohaig an natau aien, um arehed mihtag.

¹³ Eris imiapan ehelen nitai ahlap atnamud ara, im niji uarin o un, im nidjinin: is atnamud an natau aien.

¹⁴ Is yiri nauitin aien im nikman im neduon, um atnamud ijinies an nitai ahlap atnamud an natau.

¹⁵ Is imiapam nitai ahlap u atimi aien, um leh nanin iyehki, is itai ahlap va nedo has u atimi, um atgei, um ahlap iran, is idivaig iyehki uhup.

¹⁶ Is lep imiapam nitai ahlap atnamud aien, um ahlap iran is idivaig intas alep.

¹⁷ Is imiapam nitai ahlap an nitai caig aien, um leh nahaijin an nikman, um atnamud an natau, im lep nitai ahlap atnamud va nuhialeg.

¹⁸ Is lep atgei kurimatau atamaig aien, im siip atamaig mika yi itai ahlap naaurinig u atimi: eris imiapan inja iran ehele Eron a ilpu hal o un, is ohaig an natau aien, um arehed mihtag,

¹⁹ im nagako irai kurimatau atamaig im siip atamaig, im nilauon, im nilvahilva ira rau, im nohwanispeheg ira rau, im inhadin et amen irai moporau:

²⁰ eris atijai nagako irai neduon ritrau ara, is lep atnamud nagako an natau aien:

²¹ is lep ohaig jipe neduon ritrau im neuhlirau an matarau a Eron mika yi itai ahlap ohaig jipe an nuhup u Ihova; is idivaig is asaig a Moses.

²² Is adan nikman a Eron itha atimi, um acis yi alwai ra, is wat ahlap iran an nitai ahlap va nedo has aien, im nitai ahlap atnamud, im niji itai ahlap naaurinig, is ahes an natau aien, um asuol.

²³ Erus apan a Moses im Eron anliin neom er asjapicnaig o un, um lep alau ijo, um acis yi alwai atimi: is lep ehcohos pan natimi alupas u Ihova ehele atimi asega.

²⁴ Is ahes incap an nuhup u Ihova, um atnamud nitai ahlap atnamud an natau im lep nagako: eris wat almoi natimi asega, eris ahlaig ijinies ara, um atpuse.