Levitikus 8 - Intas Etipup

Nuarin tas alupas 8.

1 Et ikni Eron, im ilpu hed o un a Moses. 14 Nitai ahlap ura va nedo has. 18 Nitai ahlap ura er atnamud. 22 Nanin atamaig va nikni ra vaig. 31 Nuarin im nopan u nikni ra vaig.

¹ IS tas a Ihova ehele Moses, um ika,

² Namu leh Eron aiek im lep ilpu hal o un, im napelumai ura, im narakei aspi, im tah kurimatau atamaig uri nitai ahlap va nedo has, im siip atamaig inyi ero, im nareto et ti leven iran an cat;

³ um asjapicnaig atimi asega an neucse neom er asjapicnaig o un.

⁴ Is ago a Moses is idivaig is asaig ehelen a Ihova; eris asjap-icnaig natimi an neucse neom er asjapicnaig o un.

⁵ Is ika a Moses ehele atimi, Is asaig a Ihova mika eri ago nitai inigki.

⁶ Is imiapam Eron im ilpu hal o un a Moses, um yiri ra an wai.

⁷ Is aso Eron a Moses an napelumai uhup, um ahid nitai ahid imi yin, um aso yin an napelumai itac, um ati efot iran, um ahid nitai ahid esjilid uri efot imi yin, um aktit ipjin iran;

⁸ um ati nitai adahpoi inriti Eron iran: is lep ati Urim im Dummim aien an nitai adahpoi inritin.

⁹ Is lep adgaig incat adgaig an nidjinin aien; um ati colt apalapal an cat adgaig an nahaijin uhup, korona itap marom; is idivaig is asaig a Ihova ehele Moses.

¹⁰ Is leh narakei aspi a Moses, um aspi neom atga im niji itai asega iran, mika yi itap.

¹¹ Is eceseven ohaig an natau aien, um aspi natau im niji itai asega iran, im lep nelcau ereuc iran im intapnes, mika yi itap.

¹² Is atladwi narakei aspi an nidjini Eron aien, um aspi yin, mika yi itap aien.

¹³ Is imiapam ilpu hal u Eron a Moses, um aso ra ira apelumai uhup, um ahid nitai ahid imi ra um adgaig incat adgaig ura; is idivaig is asaig a Ihova ehele Moses.

¹⁴ Is lep imiapam kurimatau atamaig aien uri nitai ahlap va nedo has: eris ikni ikmara an nidjini kurimatau uri nitai ahlap va nedo has a Eron im ilpu hal o un.

¹⁵ Eris wat atgei; is leh inja iran a Moses, um ati irai ipat an natau an nupsikman, um arehed mihtag, um ago upene natau, um atladwi inja an nohuun natau, mika yi itap, va uhpu ahlap iran.

¹⁶ Is leh nagako asega aien ira auitin, im inhadin et amen an mopon, im nohwanispeheg is ero, im nagako iran, is atnamud a Moses an natau.

¹⁷ Ja is atipagki kurimatau aien, im narasin, im nohun, im nohok o un, an nuarin amen u atimi, um atnamud itac; is idivaig is asaig a Ihova ehele Moses.

¹⁸ Is imiapam siip atamaig aien uri nitai ahlap atnamud: eris lep ikni ikmara an nidjini siip atamaig a Eron im ilpu hal o un.

¹⁹ Eris wat atgei; is lep ohan ja an natau a Moses, um arehed mihtag.

²⁰ Is ehtoplecoplec siip atamaig aien; is lep atnamud nidjinin a Moses, im niji uarin, im nagako iran.

²¹ Is yiri nauitin im nikman im neduon an wai aien; is lep atnamud siip atamaig asega a Moses an natau: is itai ahlap atnamud is auanipin upene, im nitai ahlap vai Ihova er ago an cap; is idivaig is asaig a Ihova ehele Moses.

²² Is lep imiapam siip atamaig is eche aien, siip atamaig va nikni ra vaig: eris ikni ikmara an nidjinin a Eron im ilpu hal o un.

²³ Eris wat atgei; is leh inja iran a Moses, um ati an tikgai Eron an matau, im lep an nupsikman meto an matan, im lep an nupseduon meto an matan.

²⁴ Is lep imiapam ilpu hal u Eron a Moses, um ati inja an tikgara an matara, im lep irai upsikmara meto an matara, im lep irai upseduora meto an matara: is lep ohan ja an natau a Moses, um arehed mihtag.

²⁵ Is leh nagako iran aien, im nilauon, im nagako asega ira auitin, im inhadin et amen an mopon, im nohwanispeheg is ero, im nagako iran, im neuhlin an matan:

²⁶ is lep leh nareto apalapal is ethi aien is ti leven iran, an cat is amen iran nareto is ti leven iran an nuhup u Ihova, im nareto acreacre is ethi is amen narakei iran, im biskit is ethi, um ikni an nagako, im lep neuhlin an matan:

²⁷ is ikni asega aien irai ikmai Eron, im lep irai ikmai ilpu hal o un, um ohaig jipe mika yi itai ahlap ohaig jipe an nuhup u Ihova.

²⁸ Is iknipagki irai ikmara a Moses, um atnamud an natau an nitai ahlap atnamud: eris ikni itai iji igki, mika yi itai auanipin upene: nitai ahlap vai Ihova nigki er ago an cap.

²⁹ Is leh neduon ritin a Moses um ohaig jipe, mika yi itai ahlap ohaig jipe an nuhup u Ihova: is ohuun nuarin inig a Moses irai siip atamaig va nikni ra vaig; is idivaig is asaig a Ihova ehele Moses.

³⁰ Is leh tah narakei aspi a Moses, im tah inja an natau, um ohaig Eron iran, im napelumai o un, im ilpu hal o un, im napelumai u ilpu hal o un; mika yi itap a Eron, im napelumai o un, im ilpu hal o un, im napelumai ura.

³¹ Is ika a Moses ehele Eron im ilpu hal o un, Akumu atho nohun aijaua an neucse neom er asjipicnaig o un: um caig eahki, um asipiaig an nareto et amen an cat va nikni caua vaig, et idivaig kis asaig ainyak, um ika, Erumu caig a Eron im ilpu hal o un.

³² Akumu lep atnamud an cap aijaua nuarin nohun im nuari areto et eled.

³³ Akumu jim alau ijo aijaua an neucse neom er asjapicnaig o un ira adiat inyi seven, um imihum pan an nopan iyehki, etpu ti pan itac niji adiat u nitap unyimia: akumu itap ira adiat inyi seven aijaua.

³⁴ Et mun ago aien an nadiat inig, et idivaig is asaig a Ihova, um ahlap vai caua.

³⁵ Va nitai inigki akumu amen aijaua an neucse neom er asjapicnaig o un, irai iji adiat im niji epig ira adiat inyi seven, um imiaiji intas alep u Ihova, va aki jim emesmas aijaua: et um uce intas alep eris asaig ehelek.

³⁶ Eris ago nitai iji igki asega a Eron im ilpu hal o un is asaig a Ihova ehele Moses.