Levitikus 7 - Intas Etipup

Nuarin tas alupas 7.

1 Intas alep va nitai ahlap va nedo ahnag, 11 im lep va niji itai ahlap, 12 ra naaurinig, 16 ka vai intas upyi asaig, ka vai intup merit o un tah. 22 Eri jim, caig nagako, 26 im inja irai itai. 28 Nuarin imi ilpu atimi ahlap irai itai ahlap naaurinig.

¹ INTAS alep va nitai ahlap va nedo ahnag nigki: et idim itap.

² Erumu atgei nitai ahlap va nedo ahnag ara an nuarin inig er atgei nitai ahlap atnamud iran: etmu lep ohan ja iran aien an natau um arehed mihtag.

³ Etmu ahlap aien an nagako asega iran; etmu lep iknipagki nilauon aien, im nilvahilva et adahpoi nauitin,

⁴ im nohwanispeheg et ero, im nagako iran et amen an nijihgan, im inhadin et amen an mopon, im lep nohwanispeheg et ero:

⁵ etmu atnamud a natimi ahlap an natau mika yi itai ahlap atnamud vai Ihova: nitai ahlap va nedo ahnag nigki.

⁶ Erumu caig a ilpu atamaig asega irai ilpu atimi ahlap: uhmu caig an nuarin itap: et idim itap esjilid.

⁷ Et idivaig nitai ahlap va nedo has nitai ahlap va nedo ahnag: et tup apapa intas alep vai nitai iraigki: etmu ohuun a natimi ahlap inig et ahlap iran aien.

⁸ Et wat ahlap a natimi ahlap an nitai ahlap atnamud o un tah natimi, etmu ohuun narasin nitai ahlap atnamud a natimi ahlap inig et ahlap iran aien.

⁹ Etmu lep ohuun nitai ahlap an nitai caig asega er ahen, im nitai caig asega er atho an nipjiuru, im lep a pani a natimi ahlap inig et ahlap iran aien.

¹⁰ Erumu lep ohuun niji itai ahlap asega an nitai caig, et amen narakei iran, um mese, a ilpu hal u Eron, um ahaig jipe ira ra.

¹¹ Intas alep nigki va niji itai ahlap naaurinig, etmu ahlap iran aien vai Ihova.

¹² El et ahlap iran aien va naaurinig, etmu lep ahlap aien yi tup ethi ache pan an nitai ahlap va naaurinig ira areto apalapal et ti leven iran er aplamod an narakei, im biskit et ti leven iran er aspi an narakei, im nareto acreacre irai flaur upene, er aplamod an narakei um ahen.

¹³ Etmu lep ahlap aien ira areto apalapal, im nareto et ti leven iran yi tup ethi ache pan an nitai ahlap naaurinig o un va nigpa.

¹⁴ Etmu leh nahaijin aien irai iji itai ahlap asega, mika yi itai ahlap alcacsei vai Ihova, etmu lep ohuun a natimi ahlap inig et ohan ja nai iji itai ahlap va naaurinig aien.

¹⁵ Uhmu caig nohui niji itai ahlap naaurinig o un, er ago naaurinig iran, an nadiat inig et ahlap iran; etmu jim udei tah nuarin aien um yetpan an nuhialeg.

¹⁶ Ja el et ahlap aien vai intas upyi asaig o un, ka tup inmerit o un, uhmu caig nitai ahlap o un an nadiat inig et ahlap iran aien: uhmu lep caig nahaijin inig et eled an tak apnyin:

¹⁷ ja uhmu atnamud an cap inuarin nitai ahlap er eti ahtahni an nadiat dirt.

¹⁸ Ja el eh caig tah inuarin nitai ahlap naaurinig an nadiat dirt, inyi eti upene, uhpu eti esvi vai yin et ahlap iran aien: inyi itai has, etpu amen nedo has irai natimi inig et caig aien.

¹⁹ Uhmu jim caig nohui nitai eklim edo irai pece inig et atcei tah nitai has; uhmu atnamud an cap: ja erumu caig nitai ahlap irai ohui itai eklim edo irai pece ara asega era upene ara.

²⁰ El et caig nohui niji itai ahlap naaurinig vai Ihova tah natimi, et wat amen inhas iran, uhmu atipagki natimi inig ehele atimi o un.

²¹ Im lep inig, el et ubli pan tah nitai has tah natimi, kit inhas ira atimi, ka nitai eklim edo irai pece has, ka tah nitai has er amcel vaig, ja pah caig nohui nitai ahlap naaurinig vai Ihova, uhmu atipagki natimi inig ehele atimi o un.

²² Is tas a Ihova ehele Moses, um ika,

²³ Namu tas aiek ehele nup Isreel, um ika, Akumu jim caig nagako irai kurimatau, ka siip, ka nanin aijaua.

²⁴ Et eti itap nago vaig itai an nagako irai itai eklim edo irai pece iji ig era tup emesmas ara, im nagako irai itai iji igki et auahas ra niji itai eklim edo nai pece: ja akumu jim caig aijaua.

²⁵ El et caig nagako tah irai nitai eklim edo irai pece inig era ahlap iran vai Ihova natimi, mika yi itai ahlap an cap, uhmu idim atipagki natimi inig et caig aien ehele atimi o un.

²⁶ Im lep inig, akumu jim lep caig tah inja aijaua, kit inja irai man, ka itai eklim edo irai pece, an tah nimnim unyimia.

²⁷ El et caig tah inja tah natimi, uhmu atipagki natimi inig ehele atimi o un.

²⁸ Is tas a Ihova ehele Moses, um ika,

²⁹ Namu tas aiek ehele nup Isreel, um ika, El et ahlap vai Ihova tah irai iji itai ahlap naaurinig, etmu imiapam nitai ahlap o un vai Ihova aien nai iji itai ahlap naaurinig o un.

³⁰ Etmu imiapam an nikman aien niji itai ahlap vai Ihova er ago an cap, etmu imiapam nagako iran aien im neduon ritin, va uhpu ohaig jipe neduon ritin, nitai ahlap ohaig jipe an nuhup u Ihova.

³¹ Etmu lep atnamud nagako iran a natimi ahlap an natau: ja etmu ohuun neduon ritin a Eron im ilpu halav atamaig o un.

³² Uhmu alupai natimi ahlap neuhlin an matan, mika yi itai ahlap alcacsei irai iji itai ahlap naaurinig unyimia.

³³ Etmu ohuun neuhlin an matan a natimi inig irai ilpu hal u Eron, et ahlap aien an ja irai iji itai ahlap naaurinig, im nagako iran.

³⁴ Ek mun iknipagki ehele nup Isreel ainyak neduon ritin er o-haig jipe im neuhlin er alcacsei irai iji itai ahlap naaurinig ura, um alupai Eron, natimi ahlap, im ilpu hal o un, an tas alep unyak ehele nup Isreel irai iji mesese.

³⁵ Nahaijin imi Eron im ilpu hal o un nigki, irai iji itai ahlap vai Ihova er ago an cap, an nopan iyehki is ikni ra aien mika eri aheca u Ihova ara um ago nauritai u ilpu atimi ahlap;

³⁶ is asaig a Ihova mika eri alupai ra a nup Isreel an nopan iyehki eris aspi ra, van tas alep o un ehele ra irai iji mesese.

³⁷ Intas alep nigki va nitai ahlap atnamud, im nitai ahlap an nitai caig, im nitai ahlap va nedo has, im nitai ahlap va nedo ahnag, im nitai ahlap an nikni ra vaig, im niji itai ahlap naaurinig;

³⁸ is asaig a Ihova ehele Moses an lolan nedoon Saine, an nadiat iyehki is asaig ehele nup Isreel aien, mika eri ahlap ara irai iji itai ahlap ura vai Ihova, au namasacen Saine.