Levitikus 6 - Intas Etipup

Nuarin tas alupas 6.

1 Nitai ahlap va nedo ahnag er ago jam ato. 8 Intas alep va nitai ahlap er atnamud, 14 im lep va nitai ahlap an nitai caig. 19 Nitai ahlap u natimi ahlap an nadiat inig er aspi yin. 24 Intas alep va nitai ahlap va nedo has.

¹ IS tas a Ihova ehele Moses, um ika,

² El et ago nedo has tah natimi, um imipalea intas o Ihova, um asan tas ahcil ehele etwan vaig tah nitai is ati ehelen aien par aminjinaig, ka tah nitai erau asipiaig arau, ka tah nitai eris atoraliak, ka el et ago nedo efaifa vai etwan aien;

³ el et lep ecetai tah nitai aien is etjo, um ateri, um asan tas aktit o un vaig jam ahcil; el et ago tah nitai iji igki asega tah natimi, um ago nedo has:

⁴ et wat ago nedo inigki aien, et lep amen nedo has iran vaig, etmu lep alupaig nitai inig aien is atoraliak aien, ka nitai inig is leh aien an nedo efaifa, ka nitai inig eris ati ehelen par aminjinaig, ka nitai inig is etjo ja is ecetai aien,

⁵ ka nitai iji igki asega is asan tas aktit o un vaig aien jam ahcil; etmu lep alupaig nitai iji igki asega aien, um lep ati nahaijin fifd pan iran, um alupai natimi ohuun an nadiat iyehki etpu ahlap aien va nedo ahnag o un.

⁶ Etmu imiapam nitai ahlap o un vai Ihova ehele natimi ahlap aien, va nedo ahnag o un, siip atamaig yi ethi irai siip o un, et ti nitai has iran, inyi tup apapa pan an nimtan inig napu asaig aiek, mika yi itai ahlap va nedo ahnag o un:

⁷ etmu ahlap va nedo has o un a natimi ahlap an nuhup u Ihova: ja uhpu eti aru iran va nedo ahnag o un an tah nitai iji igki asega is ago aien.

⁸ Is tas a Ihova ehele Moses, um ika,

⁹ Namu tas aiek ehele Eron im ilpu hal o un, um ika, Intas alep va nitai ahlap atnamud nigki: Etmu amen nitai ahlap inigki er atnamud an cap an natau an nepig asega um yetpan an nuhialeg, etmu lep amen incap an natau, um cas.

¹⁰ Etmu aso yin a natimi ahlap an napelumai yilyil o un, im incetpoi eduon, um leh nohpa an cap im nitai ahlap an natau, um ati an nahaijin natau.

¹¹ Etmu iknipagki apelumai o un aien, um aso yin ira apelumai et eche, um ahre nohpa an nuarin amen u atimi, um imiapan itac an nuarin lah.

¹² Etmu cas incap an natau; uhmu jim ahni: etmu atnamud incai iran a natimi ahlap irai iji uhialeg, um ati upene nitai ahlap atnamud ijinies iran; etmu lep atnamud iran nagako irai iji itai ahlap naaurinig aien.

¹³ Etmu cas incap an natau irai iji adiat; eri jim lep ahni.

¹⁴ Intas alep va nitai ahlap an nitai caig nigki: erumu ahlap iran a ilpu halav atamaig u Eron an nuhup u Ihova, an nuhup u natau.

¹⁵ Etmu leh flaur an nikman aien yi ohua an nitai ahlap eh caig, im narakei iran, im nide cai auanipin upene asega et amen an nitai ahlap eh caig, um atnamud an natau mika yi itai imiehva, im nitai auanipin upene vai Ihova.

¹⁶ Ja erumu caig inuarin inig et eled a Eron im ilpu halav atamaig o un: uhmu caig pan ira areto et ti leven iran an nuarin itap; erumu caig ara anliin nokoro an neom er asjapicnaig o un.

¹⁷ Uhmu jim ati leven iran. Ek mun alupai ra ainyak inuarin imi ra irai iji itai ahlap unyak er ago an cap; et idim itap esjilid et idivaig nitai ahlap va nedo has, um idivaig nitai ahlap va nedo ahnag.

¹⁸ Erumu caig a ilpu halav atamaig asega u Eron. Etmu amen aktit intas alep inigki imi caua im ilpu mapomia irai iji mesese, va niji itai ahlap vai Ihova er ago an cap: erumu itap ara sji igki asega era ubli ara.

¹⁹ Is tas a Ihova ehele Moses, um ika,

²⁰ Nitai ahlap u Eron im ilpu hal o un nigki, erumu ahlap iran ara vai Ihova an nadiat inig eri aspi yin; nikavaig, nahaijin tend irai ifa et ethi irai flaur upene, mika yi itai ahlap eh caig irai iji mesese, nahaijin yi ethi an nuhialeg im na-haijin yi ethi an jupura.

²¹ Uhmu ahen flaur inig an narakei a pani; etu wit yap, namu imiapam aiek: um ahlap irai iji uarin yap an nitai ahlap eh caig, mika yi itai auanipin upene vai Ihova.

²² Etmu ahlap iran a inhal o un inig eri aspi yin mika yi isjeupigmoig yin aien, um atimi ahlap: intas alep u Ihova nigki irai iji mesese; uhmu atnamud ehni.

²³ Uhmu atnamud ehni niji itai ahlap asega an nitai caig va natimi ahlap: uhmu jim caig.

²⁴ Is tas a Ihova ehele Moses, um ika,

²⁵ Namu tas aiek ehele Eron im ilpu hal o un, um ika, Intas alep va nitai ahlap va nedo has nigki: Uhmu atgei nitai ahlap va nedo has an nuarin inig er atgei nitai ahlap atnamud iran an nuhup u Ihova: et idim itap esjilid.

²⁶ Etmu caig a natimi ahlap inig et ahlap iran aien va nedo has: uhmu caig an nuarin itap anliin nokoro an neom er asjapicnaig o un.

²⁷ El et ubli nohun tah nitai inyi itap: uhu wit lep ohan ja iran an tah napelumai, namu yiri napelumai inig aiek er ohaig iran an nuarin itap.

²⁸ Ja uhmu ahtagrei nipjinitai inig er atho iran: el eh atho an nipjiuru bras, uhmu ahpamud an nohpa, um yiri an wai.

²⁹ Erumu caig a ilpu atamaig asega irai ilpu atimi ahlap: et idim itap esjilid.

³⁰ Uhmu jim caig tah nitai ahlap va nedo has, er imiapam inja iran anliin neom er asjapicnaig o un par asa nigpa iran an nuarin itap: uhmu atnamud an cap.