Levitikus 4 - Intas Etipup

Nuarin tas alupas 4.

1 Nitai ahlap va nedo has er eti ato vaig, 3 va natimi ahlap, 13 va nup Isreel asega, 22 va natimi alupas, Ti vaig tah tup natimi.

¹ IS tas a Ihova ehele Moses, um ika,

² Namu tas ehele nup Isreel aiek, um ika, El et ago nedo has tah natimi, vaig tah intas alep o Ihova, va neti ato o un, um ago tah nedo inig et eti upene nago vaig:

³ el et lep ago nedo has a natimi ahlap inig eris aspi yin, um imiahnag atimi; etmu imiapam ehele Ihova tah kurimatau atamaig takuras aien, et ti nitai has iran, par itai ahlap va nedo has o un.

⁴ Etmu imiapam kurimatau iyehki aien an neucse neom er asjapicnaig o un an nuhup u Ihova; etmu lep ati nikman an nidjini kurimatau aien, um atgei kurimatau an nuhup u Ihova.

⁵ Etmu leh inja irai kurimatau iyehki a natimi ahlap inig eris aspi yin, um imiapan an neom er asjapicnaig o un:

⁶ etmu ahtaijuli nupsikman an ja iran a natimi ahlap, um eceseven ohan ja an nuhup u Ihova, u natcai apelumai an nuarin itap.

⁷ Etmu atijai tah inja iran a natimi ahlap irai ipat an natau uri nitai auanipin upene an nuhup u Ihova, et amen anliin neom er asjapicnaig o un; ja uhmu atladwi se inja asega irai kurimatau iyehki an nohuun natau uri niji itai ahlap atnamud, et amen an neucse neom er asjapicnaig o un.

⁸ Etmu atipagki nagako asega aien irai kurimatau iyehki, mika yi itai ahlap va nedo has; etmu atipagki nilvahilva et adahpoi nauitin aien, im nagako asega irai auitin,

⁹ im nohwanispeheg et ero, im nagako iran, et amen an nijihgan, im inhadin et amen an mopon, im lep nohwanispeheg et ero,

¹⁰ et idivaig eris atipagki irai kurimatau atamaig iyehki er ahlap iran va nigpa: etmu atnamud a natimi ahlap an natau uri nitai ahlap atnamud.

¹¹ Uhmu imiapan itac an nuarin amen iran natimi narasi kurimatau iyehki, im nemihtan asega, im nidjinin, im nikman ehro, im neduon ehro, im nauitin, im nohok o un, nohun asega marom,

¹² an nuarin lah, nuarin inig er ethan nohpa iran, um atnamud ira cai an cap: uhmu atnamud an nuarin inig er ethan nohpa iran.

¹³ El era ago nedo has a nup Isreel asega, va neti ato ura, el et lep adenaig va atimi nitai iyehki; el era lep ago tah nedo inig ara vaig tah intas alep u Ihova et eti upene nago vaig, um amen nedo has ira ra;

¹⁴ uhu wit ato nedo has inig eris ago ara, erumu ahlap irai kurimatau atamaig et ethi natimi asega va nedo has ura, um imiapam an nuhup u neom er asjapicnaig o un.

¹⁵ Erumu ikni ikmara an nidjini kurimatau iyehki an nuhup u Ihova a ilpu atimi alupas u atimi: uhmu lep atgei kurimatau an nuhup u Ihova.

¹⁶ Etmu imiapam tah inja irai kurimatau iyehki a natimi ahlap, eris aspi yin an neom er asjapicnaig o un:

¹⁷ etmu ahtaijuli nupsikman an ja iran a natimi ahlap, um eceseven ohan ja iran an nuhup u Ihova, u natcai apelumai.

¹⁸ Etmu lep atijai inja iran aien irai ipat an natau et amen an nuhup u Ihova, anliin neom er asjapicnaig o un, jam atladwi se inja asega an nohuun natau uri nitai ahlap atnamud, et amen an neucse neom er asjapicnaig o un.

¹⁹ Etmu lep atipagki nagako asega iran aien, um atnamud an natau.

²⁰ Etmu ago irai kurimatau atamaig inig aien, et idivaig is ago irai kurimatau atamaig iyehki aien, eris ahlap iran va nedo has: etmu lep ahlap va nedo has ura a natimi ahlap, ja uhpu eti aru ira ra.

²¹ Etmu imiapan itac kurimatau atamaig aien an nuarin amen iran natimi, um atnamud, et idivaig is atnamud kurimatau atamaig iyehki uhup aien: nitai ahlap nigki va nedo has u atimi.

²² El et ago nedo has tah natimi alupas, vaig tah intas alep u Ihova Atua o un, va neti ato o un, um ago tah nedo inig et eti upene nago vaig, um amen nedo has iran;

²³ el et lep ato nedo has o un aien is ago aien; etmu imiapam nitai ahlap o un aien, inhaklin nanin atamaig et ti nitai has iran:

²⁴ etmu ati nikman aien an nidjini nanin iyehki, um atgei an nuarin er atgei nitai ahlap atnamud iran an nuhup u Ihova: nitai ahlap va nedo has nigki.

²⁵ Etmu leh inja irai itai ahlap va nedo has an nupsikman a natimi ahlap, um atijai irai ipat an natau uri nitai ahlap atnamud, um lep atladwi se inja iran an nohuun natau uri nitai ahlap atnamud.

²⁶ Etmu atnamud nagako asega iran aien an natau, et idivaig nagako irai iji itai ahlap va nigpa: etmu lep ahlap va nedo has o un a natimi ahlap, ja uhpu eti aru iran.

²⁷ El et ago nedo has tah tup natimi, vaig tah intas alep o Ihova, va neti ato o un, um ago tah nedo inig et eti upene nago vaig, um amen nedo has iran;

²⁸ el et lep ato nedo has o un aien is ago aien; etmu imiapam nitai ahlap o un aien, inhaklin nanin atahig et ti nitai has nau, va nedo has o un is ago aien.

²⁹ Etmu ati nikman aien an nidjini nitai ahlap va nedo has o un, um atgei nitai ahlap va nedo has o un an nuarin er atgei nitai ahlap atnamud iran.

³⁰ Etmu leh inja nan an nupsikman a natimi ahlap, um atijai irai ipat an natau uri nitai ahlap atnamud, um lep atladwi se inja asega iran an nohuun natau.

³¹ Etmu atipagki nagako asega iran aien, et idivaig er atipagki nagako irai itai ahlap va nigpa; etmu lep atnamud a natimi ahlap an natau mika yi itai auanipin upene vai Ihova; etmu ahlap va nedo has o un a natimi ahlap, ja uhpu eti aru iran.

³² Ja el et imiapam inhakli siip aien par itai ahlap va nedo has, etmu imiapam natahig aien et ti nitai has iran.

³³ Etmu ati nikman aien an nidjini nitai ahlap va nedo has o un, um atgei mika yi itai ahlap va nedo has an nuarin inig er atgei nitai ahlap atnamud iran.

³⁴ Etmu leh tah inja an nitai ahlap va nedo has an nupsikman a natimi ahlap, um atijai irai ipat an natau uri nitai ahlap atnamud, um lep atladwi se inja asega iran an nohuun natau:

³⁵ etmu atipagki nagako asega iran aien, et idivaig er atipagki nagako an hakli siip er ahlap iran va nigpa; etmu atnamud an natau a natimi ahlap, et idivaig niji itai ahlap er ago vai Ihova an cap: etmu ahlap va nedo has o un a natimi ahlap, ja uhpu eti aru iran.