Levitikus 3 - Intas Etipup

Nuarin tas alupas 3.

1 Nitai ahlap naaurinig irai kurimatau, 6 irai siip, 7 inyi hakli siip, 12 ka nanin.

¹ EL et ahlap aien an nitai ahlap naaurinig, el et ahlap aien irai kurimatau; kit natamaig ka natahig, etmu ahlap irai kurimatau inig aien et ti nuarin has iran an nuhup u Ihova.

² Etmu ati nikman aien ijinies an nidjini nitai ahlap o un, um atgei an neucse neom er asjapicnaig o un: erumu lep ohan ja an natau um arehed iran a ilpu hal u Eron, ilpu atimi ahlap.

³ Etmu ahlap aien an nitai ahlap naaurinig, nitai ahlap vai Ihova er ago an cap; etmu iknipagki nilvahilva et adahpoi nauitin aien, im nagako asega irai auitin,

⁴ im nohwanispeheg et ero, im nagako iran, et amen an nijihgan, im inhadin et amen an mopon, im nohwanispeheg et ero.

⁵ Erumu lep atnamud a ilpu hal u Eron an natau ijinies an nitai ahlap atnamud inig et amen ijinies irai cai an cap: nitai ahlap auanipin upene vai Ihova nigki er ago an cap.

⁶ El et ahlap vai Ihova aien an nitai ahlap naaurinig irai siip, kit natamaig ka natahig, etmu ahlap irai siip inig aien et ti nuarin has iran.

⁷ El et ahlap aien an hakli siip; etmu ahlap iran aien an nuhup u Ihova.

⁸ Etmu ati nikman aien ijinies an nidjini nitai ahlap o un, um atgei an nuhup u neom er asjapicnaig o un: erumu lep ohan ja an natau um arehed iran a ilpu hal u Eron.

⁹ Etmu ahlap aien an nitai ahlap naaurinig, nitai ahlap vai Ihova er ago an cap; etmu iknipagki nagako iran aien, im nilauon asega an neduon cehen; etmu lep iknipagki nilvahilva et adahpoi nauitin aien, im nagako asega irai auitin,

¹⁰ im nohwanispeheg et ero, im nagako iran, et amen an nijihgan, im inhadin et amen an mopon, im nohwanispeheg et ero.

¹¹ Etmu atnamud an natau a natimi ahlap: nitai caig nigki an nitai ahlap vai Ihova er ago an cap.

¹² El et ahlap an nanin aien, etmu ahlap iran aien an nuhup u Ihova.

¹³ Etmu ati nikman aien ijinies an nidjinin, um atgei an nuhup u neom er asjapicnaig o un: erumu lep ohan ja an natau um arehed iran a ilpu hal u Eron.

¹⁴ Etmu ahlap aien an nitai ahlap o un, nitai ahlap vai Ihova er ago an cap; etmu atipagki nilvahilva et adahpoi nauitin aien, im nagako asega irai auitin,

¹⁵ im nohwanispeheg et ero, im nagako iran, et amen an nijihgan, im inhadin et amen an mopon, im nohwanispeheg et ero.

¹⁶ Etmu atnamud an natau a natimi ahlap: nitai caig nigki an nitai ahlap auanipin upene er ago an cap: et itap vai Ihova nagako asega.

¹⁷ Intas alep imi caua nigki, etmu amen aktit irai iji mesese, irai iji imnim asega unyimia, mika aki jim caig nagako aijaua im inja irai itai.