Levitikus 27 - Intas Etipup

Nuarin tas alupas 27.

1 Etmu itap vai Ihova a natimi inig et asaig intas ipjin aien mika yi itap. 2 Intas alep vai mune eri leh vai natimi inig. 9 Vai nitai eklim edo irai pece er ati. 14 Vai neom o un tah. 16 Vai uman im nauanimtan vaig. 28 Eri jim auanimtai nitai iji ig eris ikni imi Ihova. 32 Eri jim asjapigmoig irai uari itai tend.

¹ IS tas a Ihova ehele Moses, um ika,

² Tas ehele nup Isreel aiek, um ika ehele ra, El et asaig intas ipjin tah mika yi itap tah, etmu itap vai Ihova natimi iyehki et idivaig mune vai yin eri asaig.

³ Etmu idivaig inigki mune, el et atamaig aien ahes an mesese et twente iran um yetpan an mesese et sikste iran, etmu sikel irai silver et fifte mune vai yin, etmu apapa sikel iran pan irai sikel an neom itap.

⁴ Ja el et atahig aien etmu sikel et dirte mune vai yin.

⁵ Ja el et ahes an mesese et faiv um yetpan an mesese et twente, el et atamaig aien, etmu sikel et twente mune vai yin, ja el et atahig aien, etmu sikel et ten mune vai yin.

⁶ Ja el et ahes an mohoc et ethi iran um yetpan an mesese et faiv, el et atamaig aien, etmu sikel irai silver et faiv mune vai yin, ja el et atahig aien, etmu sikel irai silver et dri mune vai yin.

⁷ Ja el et ahes irai mesese et sikste iran um yetpan; el et atamaig aien, etmu sikel et fiftiin mune vai yin, ja el et atahig aien, etmu sikel et ten mune vai yin.

⁸ Ja el et ihki natimi aien, um eti emda par alupai mune vai yin eris asaig, etmu ehcohos an nuhup u natimi ahlap aien, etmu asuptecnaig mune vai yin a natimi ahlap; etmu asuptecnaig mune vai yin a natimi ahlap yi idivaig niji itai o un et mun asaig intas upyi asaig o un aien.

⁹ El et ika tah yi itap tah nitai eklim edo irai pece inig, et upene par ahlap iran an nitai ahlap vai Ihova, etmu itap nitai eklim edo irai pece asega iji ig er ahtai imi Ihova.

¹⁰ Inyi eti asjapigmoig aien, ka leh inyi eche, nitai upene va nitai has, ka nitai has va nitai upene: ja el et asjapigmoig aien nitai eklim edo irai pece et ethi irai nitai eklim edo irai pece et eche, etmu itap iyehki uhup im lep nasjapigmoig iran.

¹¹ Ja el et eti upene nitai eklim edo irai pece, nitai inig marom er eti ahlap an nitai ahlap vai Ihova, etmu ati nitai eklim edo irai pece iyehki eris ika yi itap aien an nuhup u natimi ahlap:

¹² etmu asuptecnaig mune vaig a natimi ahlap, el et upene ka el et has: etmu amen et idivaig mune iyehki etpu asuptecnaig a natimi ahlap.

¹³ Ja el et ika aien yi lep aua-nimtan nitai eklim edo irai pece iyehki; etmu ati aien nuarin fifd pan u mune iyehki eris asaig.

¹⁴ Et wat ika tah yi ati neom o un aien mika yi itap vai Ihova, etmu asaig mune vaig a natimi ahlap, el et neom upene ka el et has: etmu amen et idivaig mune iyehki etpu asaig a natimi ahlap.

¹⁵ El et ika a natimi inig is ati neom o un aien yi auanimtan, etmu ati aien nuarin fifd pan u mune iyehki eris asaig, ja etpu lep ohuun neom o un aien.

¹⁶ Ja el et ika tah natimi yi ati nahaiji uman et ohuun aien mika yi itap vai Ihova, uhmu anvi mune vaig et idivaig nupsiitai inig er ahwaig ehni nan: etmu apapa pan irai sikel irai silver et fifte nuarin obohtan inig er ahwai iran homer et ethi irai upsi barle.

¹⁷ Ja el et ati uman aien mika yi itap ahes an mesese imiacitak, etmu amen et idivaig mune iyehki eris asaig.

¹⁸ Ja el et ati uman aien mika yi itap et wat ti pan itac inmesese imiacitak, etmu esvi mune imi yin a natimi ahlap et idivaig inmesese iji ig et eled, um yetpan an mesese imiacitak iyehki etpu yetpam, uhmu atipagki mune inigki irai mune iyehki eris asaig.

¹⁹ Ja el et idim ika a natimi iyeheki is ati uman aien mika yi itap yi lep auanimtan, etmu lep ati aien nuarin fifd pan u mune iyehki eris asaig, ja etpu lep ohuun uman aien.

²⁰ Ja el et ika aien inyi eti lep auanimtan uman aien, ka el is ahtai uman aien imi natimi et eche, uhmu jim lep auanimtan.

²¹ Ja uhu wit atcijaig uman imi natimi iyehki is ahtai aien an mesese imiacitak, etmu itap vai Ihova, et idivaig uman tah eris ati; etmu ohuun a natimi ahlap.

²² El et ika tah yi itap vai Ihova uman is auanimtan aien, ja is eti upyi ohuun aien;

²³ etmu aniv mune atoh vaig ehelen a natimi ahlap, um yetpan an mesese imiacitak: etmu ahtai mune inig eris asaig aien an nadiat iyehki, et idivaig nitai itap vai Ihova.

²⁴ Ja an mesese imiacitak, uhmu atcijaig uman imi natimi inig eris auanimtan ehelen, imi yin marom is upyi hup aien um ohuun.

²⁵ Etmu idivaig sikel an neom itap mune asega unyimia eri asaig: etmu apapa sikel et ethi pan irai cira et twente.

²⁶ Ja etmu ehka vaig tah par ika yi itap niji itai eklim edo irai pece inmeto iji ig eris idim ika yi inmeto o Ihova; el et kurimatau, ka siip: et idim ohuun a Ihova.

²⁷ Ja etpu upene vai yin par lep auanimtan nitai eklim edo irai pece eti upene inmeto va mune inig eris asaig, el et ati aien nuarin fifd pan u mune iyehki eris asaig: ka el eh eti lep auanimtan, uhmu ahtai vai mune iyehki eris asaig.

²⁸ Ja uhmu jim ahtai ka lep auanimtan tah nitai eris ati mika yi itap, irai itai iji igki marom, et upene va atimi par ati mika yi itap vai Ihova, irai iji itai asega o un, el et natimi, ka nitai eklim edo irai pece, ka uman et ohuun aien: etmu idim itap vai Ihova niji itai asega eris ati mika yi itap.

²⁹ Uhmu jim lep auanimtan tah nitai eris ati mika yi itap, irai itai iji igki marom et upene va atimi par ati mika yi itap; uhmu idim atgei.

³⁰ Et ohuun niji uarin tend irai itai asega an pece a Ihova, nikavaig,; irai ohwai itai an pece, im lep irai ohwai cai: et idim itap vai Ihova.

³¹ El et ika tah natimi yi lep auanimtan nahaijin uari tend irai itai o un, etmu ati iran nuarin fifd aien.

³² Im lep inig, va nuarin tend u niji kurimatau, ka niji siip, ka niji anin, etmu itap vai Ihova nuarin tend, irai itai asega iji ig et atga ithan niseuc u natimi esvi itai.

³³ Etmu jim ahilek aien par ato, el et upene ka el et has, etmu jim asjapigmoig iran aien: ja el et asjapigmoig aien, etmu itap nitai iyehki im lep nitai inig is asjapigmoig iran aien; uhmu jim lep auanimtan.

³⁴ Intas alep ji igki is asaig a Ihova ehele Moses vai nup Isreel an lolan nedoon Saine.