Levitikus 25 - Intas Etipup

Nuarin tas alupas 25.

1 Natumop irai yier sevend. 8 Nimiacitak irai yier fiftied. 14 Intas alep vai nehcerucai atimi. 18 Intas acis yi alwai vai ilpu, atimi imiaiji intas alep u Atua. 23 Intas alep vai nauanimtai umai atimi. 29 Vai niji eom. 35 Vai nedo aiheuc vai ilpu ihki atimi. 39 Vai nedo upene vai ilpu aheca. 47 Vai nauanimtai ilpu aheca par atcijai ra.

¹ IS um tas a Ihova ehele Moses an lolan nedoon Saine, um ika,

² Tas ehele nup Isreel aiek, um ika ehele ra, Aku wit yetpan an pece iyehki aijaua ekpu alupai caua ainyak, akumu ati nopan atumop aijaua mika yi atumop iran inpece vai Ihova.

³ Akumu ahwaig upsiitai ira ahapol unyimia aijaua irai mesese et siks, akumu acaldei niji rai vaine unyimia, um aldei nohwai vaine unyimia irai mesese et siks;

⁴ ja an mesese sevend etmu atumop inpece, etmu atumop vai Ihova: akumu jim ahwaig upsi itai ira ahapol unyimia aijaua, um jim acaldei niji rai vaine unyimia.

⁵ Akumu jim asjapicnaig nohwai itai ij ig aijaua et tup edel va ahapol unyimia, um jim aldei nohwai vaine unyimia eris eti acaldei: inmesese atumop iran nigki vai inpece.

⁶ Etpu itai caig incamia niji itai hegaig et tup eteuc an mesese atumop; incamia marom, im lep incai ilpu aheca atamaig unyimia, im ilpu aheca atahig unyimia era amen irai imnim ara, im ilpu aheca era eti amen irai imnim ara, im lep nup urai taka pece, ilpu alaig unyimia marom, era amen ehelemia ara,

⁷ im lep niji itai eklim edo irai pece auata upene unyimia, im niji itai eklim edo irai pece aleg era amen an pece unyimia ara, etpu itai caig incamia niji itai hegaig asega et tup eteuc.

⁸ Akumu eceseven esvi mesese atumop imi caua aijaua, eceseven seven mesese marom; etpu forte nain inmesese imi caua inmesese iji igki, ja par eteuc inmesese atumop iyehki.

⁹ Ja par apitac akumu ika aijaua eri ahlai toho par imiacitak an nadiat tend an mohoc sevend, an nadiat asa nigpa iran akumu ika aijaua eri ahlai toho an pece asega unyimia.

¹⁰ Akumu ika aijaua et itap inmesese fiftied, um asuptecnaig mika era atcijaig atimi asega an pece asega unyimia: etmu mesese imiacitak imi caua inmesese inigki; akumu adumoij pan umamia aijaua, athi um athi ehni, akumu lep adumoij pan ehele ilpu atimi ehpan iramia aijaua, athi um athi ehni.

¹¹ Etmu opan imiacitak imi caua inmesese fiftied iyehki: akumu jim ohwaig upsiitai aijaua, um jim asjapicnaig nohwai itai tup edel iran, um jim aldei nohwai vaine er eti acaldei inran.

¹² Et idim opan imiacitak inmesese iyehki; etmu itap vai caua: akumu caig niji itai hegaig et tup eteuc irai lelitai aijaua.

¹³ An nopan imiacitak iyehki akumu adumoij pan umamia aijaua, athi um athi ehni.

¹⁴ El eka ahtai tah nitai ehele ilpu atimi eblaamnem unyimia aijaua, ka auanimtan tah nitai ehele ra, akumu jim ehcerucai jipe caua aijaua:

¹⁵ akumu auarimtai itai ehele ilpu atimi eblaamnen unyimia aijaua, et idivaig inmesese iji ig is ti pan itac inmesese imiacitak, erumu lep ahtai itai imi caua ara et idivaig inmesese iji ig etpu eteuc nohwai itai iran:

¹⁶ el et ahinag niji mesese iran ja par eteuc inmesese imiacitak etpu alupas nimtan, ja el et eti elpat niji mesese iran etpu haklin nimtan: uhpu ahtai itai imi caua et idivaig niji mesese irai ohwai itai iran.

¹⁷ Akumu jim ehcerucai jipe caua aijaua; ja akumu imtitaig Atua unyimia aijaua: ek idim Atua unyimia ainyak Ihova.

¹⁸ Akumu idim imiaiji intas unyak aijaua, um apos niji tas alep unyak, um ago; akupu lep amen upene an pece aijaua.

¹⁹ Etpu ahinag nohwai itai an nobohtan unyimia, akupu caig aijaua um geije, um amen upene iran.

²⁰ Ja el eka ika aijaua, Intupu caig inhe akaija an mesese sevend? vaig inig nikavaig, eris idim ika ti jim ahwai upsiitai akaija um jim asjapicnaig nohwai itai:

²¹ ekpu lep asan tas acis yi alwai caua ainyak an mesese siksd, etpu eteuc nohwai itai an mesese iyehki vai inmesese et dri.

²² Akupu ahwaig upsiitai aijaua an mesese eetd, um caig nohwai itai itu um yetpan an mesese naind; akupu caig nohwai itai itu aijaua um yetpan an nopan iyehki etpu meto nohwai itai an mesese naind.

²³ Aku wit ahtai inpece aijaua akumu jim atcijaig aijaua irai iji mesese: et idim unyak inpece; eka idivaig nup urai taka pece aijaua im ilpu alaig unyak.

²⁴ Akumu ika aijaua et upene mika eri lep auarimtai uari obohtan ura irai iji uari pece asega unyimia.

²⁵ EI et ihkin natimi a etwam, um ahtai tah nuarin nobohtan o un, el et lep ham tah natimi ehpan iran mika yi lep auanimtan, etmu auanimtan nuarin nobohtan iyehki aien is ahtai a etwan.

²⁶ Ja el et eti eteuc tah imi natimi iyehki mika yi lep auanimtan nuarin nobohtan o un, ja el et emda aien par auanimtan;

²⁷ etmu lep esvi inmesese iji ig eris ahtai vaig, um imiadumoij pan nahaijin nimtan inig et eled imi natimi inig is auanimtan aien, mika yi adumoij pan aien uman.

²⁸ Ja el et eti emda aien par imiadumoij pan imi yin nahaijin nimtan iyehki, etmu amen nuarin nobohtan iyehki eris ahtai ehele natimi inig is auanimtan aien, um yetpan an mesese imiacitak: ja uhmu atcijaig an mesese imiacitak, etmu lep adumoij pan aien uman.

²⁹ Im lep inig, el et ahtai neom amen iran tah natimi an maliyum inig et eteuc nathatahau iran, etmu upene vai yin par lep auanimtan an mesese asega iyehki eris ahtai iran; etmu upene vai yin par lep auanimtan irai yier asega et ethi.

³⁰ Ja el eh eti lep auanimtan um lep ti pan itac yier asega et ethi, uhmu ati aktit irai iji mesese neom iyehki an maliyum inig et eteuc nathatahau iran imi natimi inig is auanimtan aien im lep ehele ilpu mapon asega: uhmu jim atcijaig an mesese imiacitak.

³¹ Jam etmu idivaig niji uari obohtan an pece neom iji ig irai maliyum haklin et eti eteuc nathatahau iran: et upene par lep auarimtan ji igki, uhmu atcijaig an mesese imiacitak.

³² Ja et upene vai ilpu mapoi Livai par auarimtai niji maliyum ura, im niji eom irai maliyum ura irai uari obohtan ura irai iji opan asega.

³³ El et auanimtan neom o un tah mapoi Livai a etwan, uhmu atcijaig neom iyehki eris ahtai, im inmaliyum iyehki eris ohuun an mesese imiacitak: era idim ohuun niji eom irai maliyum ura a ilpu mapoi Livai ehele nup Isreel.

³⁴ Ja et itap par ahtai nuari obohtan iji ig et arehed niji maliyum ura; eri idim ohuun ji igki irai iji mesese.

³⁵ Ja el et ihkin natimi a etwam et amen ehelum aien, um tup ti niji itai ehelen; namu atau imi yin aiek: et idivaig nalaig unyum, ka nup uran taka pece, etmu amen ehelum aien.

³⁶ Namu jim leh tah nimtan ehelen aiek, ka tah neruvaig et esjilid irai itai is leh ehelum aien: jam imtitaig Atua unyum aiek; mika yi amen ehelum a etwam.

³⁷ Namu jim alupai yin mune unyum aiek va nimtan alupas, um jim alaan nitai caig unyum va neruvaig et esjilid irai itai is leh ehelum aien.

³⁸ Et uce intas alep unyak Ihova Atua unyimia, kis iknipagki caua ainyak an pece Ijipt, mika ki alupai caua inpece Kenan ainyak, im lep mika ki Atua unyimia ainyak.

³⁹ Im lep inig, el et ihkin natimi a etwam inig et amen ubutpotet ehelum aien, um ahtai yin ehelum; namu jim ika ehelen aiek yi ago nauritai et idivaig tup naheca unyum:

⁴⁰ ja etmu amen ehelum aien, et idivaig naheca unyum et leh nimtan, um idivaig nalaig unyum, etmu aheca unyum aien um yetpan an mesese imiacitak:

⁴¹ ja etmu aipujai euc aien an nopan iyehki, aien im ilpu hal o un ehelen, um adumoij pan ehele ilpu atimi ehpan iran, etmu adumoij pan aien um amen umai ilpu retpon.

⁴² Era idim ilpu aheca unyak ara, kis iknipagki ra ainyak an pece Ijipt: uhmu jim ahtai ra mika eri idivaig ilpu atimi tup aheca.

⁴³ Akumu jim ehcerucai ra aijaua; ja akumu imtitaig Atua unyimia aijaua.

⁴⁴ Akumu lucsei ilpu aheca atamaig imi caua aijaua, im ilpu aheca atahig imi caua, ehele nup urai iji pece marehed mihtag; akumu auarimtai ilpu aheca atamaig im ilpu aheca atahig ehele ra aijaua.

⁴⁵ Im lep inig, akumu auarimtai nup urai taka pece iji ig aijaua era tup amen ehelemia ara, im ilpu hal ura era amen ehelemia ara, eris apos ra an pece unyimia: akumu ohuun ra aijaua.

⁴⁶ Akumu lep udei ra imi ilpu hal unyimia aijaua, eru wit isjeupigmoig caua ara, mika eri ohuun ra ara; uhmu ilpu aheca imi caua irai iji mesese: ja eru wit aheca unyimia a ilpu etwamia nup Isreel, akumu jim ehcerucai ra aijaua um auahas ra.

⁴⁷ Ja el et ikni itai tah nup urai taka pece et amen ehelemia aien ka tah nalaig unyimia, im lep inig, el et ihkin natimi a etwamia et amen ubutpotet ehelen aien, um ahtai yin imi nup urai taka pece, ka imi nalaig unyimia, ka imin tah inhal u nup urai taka pece:

⁴⁸ uhu wit ahtai yin et upene mika eri lep auanimtan; et upene mika yi auanimtan tah ilpu etwan:

⁴⁹ et upene vaig tah ilpu etman, ka tah inhal u ilpu etman, par lep auanimtan, ka et upene vaig tah irai ilpu atimi ehpan iran par lep auanimtan; ka el et emda aien, et upene vai yin par lep auanimtan.

⁵⁰ Etmu esvi mesese aien ehele natimi inig is auanimtan aien, ahes an mesese iyehki eris ahtai yin imi yin um yetpan an mesese imiacitak: etmu alupai yin nimtan aien et idivaig inmesese iji ig et eled, uhmu esvi niji mesese o un et idivaig niji mesese u naheca inig et leh nimtan aien.

⁵¹ El et eled inmesese et ahinag, et idivaig inmesese iji igki etmu imiadumoij pan ehelen nahaijin nimtan aien, an nimtan iyehki marom eris ahtai yin vaig.

⁵² Ja el et eled inmesese et eti elpat um yetpan an mesese imiacitak, etmu esvi mesese ehelen aien, um imiadumoij pan ehelen nahaijin nimtan inig eris alupai yin, et idivaig inmesese iji ehki.

⁵³ Etmu amen ehelen aien et idivaig naheca inig et leh nimtan aien irai iji mesese: ja etmu jim ehcerucai yin aien an nuhup unyimia.

⁵⁴ Ja el eh eti lep auanimtan irai mesese iji ehki, uhmu atcijai yin an mesese imiacitak, aien, im lep ilpu hal o un ehelen.

⁵⁵ Era idim ilpu aheca unyak a nup Isreel; era ilpu aheca unyak ara kis iknipagki ra ainyak an pece Ijipt: ek Atua unyimia ainyak Ihova.