Levitikus 24 - Intas Etipup

Nuarin tas alupas 24.

1 Narakei uri lamp. 5 Nareto er ehvaig. 10 Et asan tas itap a inhalav atamaig u Selomid. 13 Intas alep vai ra era asaig intas itap ara. 17 Vai natgei atmas. 18 Vai nauahas itai. 23 Eh asji irai hat natimi iyehki is asaig intas itap aien.

¹ IS um tas a Ihova ehele Moses, um ika,

² Tas ehele nup Isreel aiek, mika eri imiapam ehelum narakei oliv upene eris auud urin lah, mika yi alahala niji lamp irai iji opan.

³ Etmu ago niji lamp a Eron mika yi alahala ahes an jupura um yetpan an nuhialeg an nuhup u Ihova irai iji opan asega, an nahaijin napelumai atcai an nelcau an tas itap itac an neom er asjapicnaig o un: intas alep nigki irai iji mesese irai ilpu mapomia.

⁴ Etmu ago niji lamp aien an nitai atijai lamp iran irai colt upene an nuhup u Ihova irai iji opan asega.

⁵ Namu lep leh flaur upene aiek, um ago areto et twelv iran: uhmu leh omer inyi ero irai nareto et ethi.

⁶ Ikni areto iji ig aiek an niji iran et ero, inyi eteuc nareto et siks an niji iran et ethi, an nitai hag irai colt upene an nuhup u Ihova.

⁷ Ati nitai auanipin upene aiek an niji iran et ero, mika yi amen ira areto, um isjapigmoig mika yi itai ahlap er atnamud an cap marom vai Ihova.

⁸ Etmu ikni areto iji ig aien an nuhup u Ihova irai iji adiat atumop asega, eri imiapam a nup Isreel an tas etipup inig inyi eti lep ti.

⁹ Etmu ohuun a Eron im ilpu halav atamaig o un; erumu caig ara an nuarin itap: et idim itap esjilid vai yin irai iji itai ahlap vai Ihova er ago an cap, an tas alep inig inyi eti lep ti.

¹⁰ Is ahced nup Isreel a inhalav atamaig is ethi u intakata is ethi irai up Isreel, ja is up Ijipt a etman: is lep ehtauo a inhalav atamaig u intakata irai up Isreel iyehki ehelen tah nup Isreel an nuarin amen iran u atimi;

¹¹ is auahas nidai Ihova a inhalav atamaig u intakata irai up Isreel iyehki, um asan tas itap. Eris imiapan yin ehele Moses ara: (nidai risin Selomid, is hal u Tibrai aien, um mapoi Tan:)

¹² eris ati yin anliin neom ipjin ara, va uhpu ato intas o Ihova vai yin.

¹³ Is um tas a Ihova ehele Moses, um ika,

¹⁴ Uhmu imiapan itac an nuarin amen iran u atimi natimi iyehki is asaig intas itap aien; erumu atijai nikmara an nidjinin ara asega eris atahaijeg yin ara, erumu asji yin irai hat natimi asega era asjapicnaig ara.

¹⁵ Namu lep tas ehele nup Isreel aiek, um ika, El et asan tas ahlaijaig vai ilpu atimi alupas an pece o un tah natimi, uhmu atijai iran nedo has o un.

¹⁶ Ja el et auahas nidai Ihova tah natimi, uhmu idim atgei yiu, erumu idim asji yin irai hat a ilpu atimi asega era asjapicnaig ara: el et up urai taka pece, ka nup uran pece unyimia, a natimi inig et auahas nidai Ihova aien, uhmu atgei yin.

¹⁷ El et atgei atmas tah natimi, uhmu idim atgei yin.

¹⁸ El et atgei tah nitai eklim edo irai pece tah natimi etmu aru aien; inyi isjeupigmoig nitai eklim edo irai pece o un tah an nitai eklim edo irai pece o un.

¹⁹ El et auahas tah nuarin nohun tah natimi tah; uhmu ago vai yin et idivaig is ago aien;

²⁰ el et ati inmocop iran tah natimi tah, uhmu ati inmocop iran; el et auahas nesganimtan tah natimi tah, uhmu auahas nesganimtan; el et auahas neijin tah natimi tah, uhmu auahas neijin; el et auahas tah nuarin nohun tah natimi tah, uhmu ago iran et idivaig nedo o un.

²¹ El et atgei tah nitai eklim eto irai pece tah, etmu isjeupigmoig aien: ja el et atgei atmas tah natimi, uhmu idim atgei yin.

²² Etmu tup ethi ache intas alep unyimia, va nup urai taka pece, im lep va nup uran pece unyimia: et uce intas alep unyak Ihova Atua unyimia.

²³ Is tas ehele nup Isreel a Moses, mika eri imiapan itac an nuarin amen iran u atimi natimi iyehki is asaig intas itap vai Atua aien, um asji yin irai hat. Eris ago nedo inig a nup Isreel is asaig a Ihova ehele Moses.