Levitikus 23 - Intas Etipup

Nuarin tas alupas 23.

1 Niji asjapicnaig u atimi vai Ihova. 3 Nadiat atumop. 4 Nahtaregdei atimi. 9 Nohud an hupnan korn. 15 Nasjapicnaig u atimi an nadiat Pentecost. 22 Eri udei nahri ohwai itai imi ilpu ihki atimi. 23 Nasjapicnaig u atimi vai naklai u intoho. 26 Nadiat par asa nigpa iran. 33 Nasjapicnaig u atimi ira iyum uricai.

¹ IS tas a Ihova ehele Moses, um ika,

² Tas ehele nup Isreel aiek, um ika ehele ra, Nasjapicnaig u atimi vai Ihova ji igki, akumu tauai aijaua mika eri asjapicnaig um alaigaheni.

³ Erumu ago nauritai ura natimi ira adiat et siks: ja eri atu mop an nadiat sevend, um asjapicnaig va nalaigaheni; akumu jim ago tah nauritai iran aijaua: etmu adiat atumop vai Ihova irai iji imnim asega unyimia.

⁴ Niji asjapicnaig u atimi et eche ji igki, niji asjapicnaig u atimi va nalaigaheni marom, akumu tauai aijaua irai iji opan ura.

⁵ Etmu eteuc nopan imiehva nahtaregdei caua u Ihova an jupura an nadiat fortiind an mohoc uhup.

⁶ Au nadiat fiftiind an mohoc iyehki erumu asjapicnaig ara va nareto eti leven iran vai Ihova: akumu caig nareto eti leven iran aijaua ira adiat et seven.

⁷ Akumu asjapicnaig va nalaigaheni aijaua an nadiat uhup: akumu jim ago tah nauritai aijaua iran.

⁸ Ja akumu ahlap an nitai ahlap er atnamud an cap vai Ihova aijaua ira adiat et seven: eri asjapicnaig va nalaigaheni an nadiat sevend: akumu jim ago tah nauritai aijaua iran.

⁹ Is um tas a Ihova ehele Moses, um ika,

¹⁰ Tas ehele nup Isreel aiek, um ika ehele ra, Aku wit yetpan an pece iyehki aijaua ekpu alupai caua ainyak, um asjapicnaig korn iran, akumu leh pam nohud an hupnan korn unyimia aijaua imi natimi ahlap:

¹¹ etmu ohaig jipe nohud korn iyehki aien an nuhup u Ihova, mika yi upene inliinmopoi Atua vaig vai caua: etu wit ti pan itac nadiat atumop wat lahlah an tah apnyin, etmu ohaig jipe iran a natimi ahlap.

¹² An nadiat iyehki aku wit ohaig jipe nohud iran iyehki aijaua, akumu lep ahlap an nakli siip atamaig aijaua inyi ethi ache inmesese iran, inyi ti nitai has iran, nitai ahlap er atnamud vai Ihova.

¹³ Etmu itai ahlap an nitai caig pan o un, nikavaig, omer et ero irai flaur upene er aplamod narakei iran, nitai ahlap er atnamud an cap vai Ihova va nitai auanipin upene: akumu leh nuarin ford irai hin u nide vaine aijaua, nitai ahlap inig pan o un er umnyi.

¹⁴ Akumu jim caig nareto aijaua, ka pakine er ahen, ka pakine mat, um yetpan an nadiat iyehki akupu imiapam nitai tup ahtai imi Atua unyimia aijaua: intas alep nigki ehele ilpu mapomia asega irai iji mesese irai imnim asega unyimia.

¹⁵ Etu wit ti pan itac nadiat atumop wat lahlah an tak apnyin, akumu atupun aijaua um esvi, ahes an nadiat inig akis imiapam nohud korn iyehki nitai ahlap eris ohaig jipe; akumu esvi nadiat atumop et seven aijaua:

¹⁶ akumu esvi aijaua um yetpan an nadiat atumop sevend wat lahlah an tak apnyin, nadiat et fifte ma-rom; akumu ahlap an nitai ahlap mat er caig aijaua vai Ihova.

¹⁷ Akumu imiapan irai imnim unyimia aijaua nareto et ero eri ohaig jipe: eri ago irai leven, nikavaig, omer et ero irai flaur upene; inhupnai korn vai Ihova nareto eraigki.

¹⁸ Akumu ahlap ira areto eraigki im nakli siip atamaig et seven aijaua, inyi ti nitai has ira ra, inyi ero ache inmesese ira ra, im kurimatau takuras atamaig et ethi, im siip atamaig et ero: etmu itai ahlap atnamud vai Ihova nitai iji igki, im lep nitai ahlap eh caig, im niji itai ahlap er umnyi, nitai ahlap er atnamud an cap marom, va nitai auanipin upene vai Ihova.

¹⁹ Akumu lep ahlap an nakli nanin et ethi aijaua nitai ahlap va nedo has, im lep nakli siip et ero inyi ethi ache inmesese ira rau, nitai ahlap naaurinig.

²⁰ Etmu ohaig jipe pan ira areto eraigki u inhupnai korn a natimi ahlap nitai ahlap ohaig jipe an nuhup u Ihova, im lep nakli siip eraigko et ero: etmu itap nitai ahlap iji igki imi Ihova vai natimi ahlap.

²¹ Akumu tauai aijaua an nadiat iyehki, mika eri asjapicnaig atimi um alaigaheni: akumu jim ago tah nauritai aijaua iran: intas alep nigki ehelemia erupu epitpitac a ilpu mapomia asega irai iji mesese irai imnim asega unyimia.

²² Aku wit asjapicnaig korn meto an nobohtan unyimia aijaua, akumu jim asjapicnaig ehni korn irai iji esvi vai uari obohtan unyimia aijaua an nasjapicnaig korn unyimia, akumu jim lep asjapicnaig nahri korn meto unyimia aijaua: akumu udei aijaua imi ilpu ihki atimi, im lep imi ilpu atimi irai taka pece: et uce intas alep unyak Ihova Atua unyimia.

²³ Is um tas a Ihova ehele Moses, um ika,

²⁴ Tas ehele nup Isreel aiek, um ika, An mohoc sevend, an nadiat uhup an mohoc iyehki, etmu eteuc imi caua nadiat atumop et ethi, eri ahlai toho iran, mika eri asjapicnaig iran natimi um alaigaheni.

²⁵ Akumu jim ago tah nauritai iran aijaua: ja akumu ahlap an nitai ahlap er atnamud an cap vai Ihova aijaua.

²⁶ Is um tas a Ihova ehele Moses, um ika,

²⁷ Im lep inig, an nadiat tend an mohoc sevend eh mun asaig, etmu eteuc nadiat et ethi par asa nigpa iran: akumu asjapicnaig iran aijaua um alaigaheni; akumu ehcerucai caua aijaua, um ahlap au nitai ahlap er atnamud an cap vai Ihova.

²⁸ Akumu jim ago tah nauritai aijaua an nadiat iyehki: nadiat par asa nigpa iran nigki; mika eri asa nigpa iran vai caua an nuhup u Ihova Atua unyimia.

²⁹ Uhmu atipagki natimi iyehki ehele nup uran pece o un et eti ehcerucai yin aien an nadiat iyehki;

³⁰ Ekpu auahas natimi iyehki ainyak ehele nup uran pece o un et ago tah nauritai aien an nadiat iyehki.

³¹ Akumu jim ago tah nauritai aijaua iran: intas alep nigki ehelemia erupu epitpitac a ilpu mapomia asega irai iji mesese irai imnim asega unyimia.

³² Etmu adiat atumop imi caua nadiat iyehki, akumu lep ehcerucai caua aijaua iran: ahes an jupura an nadiat naind an mohoc iyehki, um yetpan an jupura an tak apnyin, akumu apos nadiat atumop unyimia aijaua.

³³ Is um tas a Ihova ehele Moses, um ika,

³⁴ Tas ehele nup Isreel aiek, um ika, An nadiat fiftiind an mohoc sevend eh mun asaig, akumu asjapicnaig vai Ihova aijaua irai iyum uri cai ira adiat et seven.

³⁵ An nadiat uhup akumu asjapicnaig aijaua um alaigaheni; um jim ago tah nauritai iran.

³⁶ Akumu ahlap an nitai ahlap er atnamud an cap vai Ihova ira a d-iat et seven aijaua: an nadiat eetd akumu asjapicnaig aijaua um alaigaheni, um ahlap an nitai ahlap er atnamud an cap vai Ihova: nasjapicnaig itap u atimi iyehki; akumu jim ago tah nauritai iran aijaua.

³⁷ Niji asjapicnaig u atimi vai Ihova ji igki; akumu tauai aijaua mika eri asjapicnaig ara um alaigaheni, mika eri lep ahlap an nitai ahlap er atnamud an cap vai Ihova, nikavaig, nitai ahlap atnamud, im nitai ahlap eh caig, im nitai ahlap irai itai eris atgei, im nitai ahlap er umnyi, niji itai asega irai opan ura, athi um athi ehni:

³⁸ akumu apos nopan iji igki aijaua, im lep niji adiat atumop u Ihova, im niji itai tup ahtai unyimia, im niji tas upyi asaig asega unyimia, im niji itai ahlap asega unyimia, eka tup ispumia ahlap iran aijaua vai Ihova.

³⁹ Im lep inig, an nadiat fiftiind an mohoc sevend, aku wit asjapicnaig ehni korn an pece aijaua, akumu asjapicnaig vai Ihova aijaua ira adiat et seven: etmu adiat atumop nadiat uhup, etmu lep adiat atumop nadiat eetd.

⁴⁰ An nadiat uhup akumu lucsei niji ahtaicai ededel aijaua, im niji eri eaig, im niji rai cai alupas, im niji cai et eteuc ui wai, um ago iyum uricai, um imiacitak an nuhup u Ihova Atua unyimia ira adiat et seven.

⁴¹ Akumu asjapicnaig aijaua um akaro vai Ihova ira adiat et seven irai iji mesese, athi um athi ehni. Intas alep nigki ehele ilpu mapomia irai iji mesese asega: akumu asjapicnaig aijaua an mohoc sevend.

⁴² Akumu amen irai iyum uricai aijaua ira adiat et seven; erumu amen irai iyum uricai ara asega era up Isreel inveijec ara:

⁴³ mika eri ato a ilpu mapomia mika kis ika ainyak eri amen irai iyum uricai a nup Isreel, an nopan iyehki kis wat iknipagki ra ainyak an pece Ijipt: ek Atua unyimia ainyak Ihova.

⁴⁴ Is asuptecnaig ehele nup Isreel niji opan asjapicnaig vai Ihova a Moses.