Levitikus 22 - Intas Etipup

Nuarin tas alupas 22.

1 Eri jim, atcei niji itai itap a ilpu atimi ahlap el et eteuc ira ra tah inhas. 6 Intas alep vai nago adicinadicin ra. 10 Vai ilpu atimi iji ig irai imnim u ilpu atimi ahlap eri caig nitai caig itap. 17 Etmu upene asega niji itai ahlap. 26 Vai niji mesese u niji itai ahlap. 29 Intas alep vai incaig u nitai ahlap naaurinig.

¹ IS tas a Ihova ehele Moses, um ika,

² Namu asuptecnaig aiek ehele Eron im ohwat hal o un nopan iji ig, ehtijpu jim apam ubutpotet u niji itai itap u nup Isreel, va ehtijpu jim auahas nidak itap ahtaij irai itai iji igki ehtaij ikni vai nyak ahtaij: ek Ihova ainyak.

³ Namu ika ehele ehtaij aiek, El et eteuc tah natimi inig irai ilpu mapomitaij asega irai iji mesese, el et apam ubutpotet u nitai itap iji ig aien, era ikni vai Ihova a nup Isreel, et wat amen iran inhas o un, uhmu atipagki natimi iyehki an nuhup unyak: et uce intas alep unyak Ihova.

⁴ El et eteuc tah irai ilpu mapoi Eron el et atimi lepros aien, ka el et ared nida iran; etmu jim caig nitai caig itap aien, um yetpan au nopan iyehki etpu cehcehe aien. Im lep inig, aien et atcei tah nitai aien et has va nohui natimi mas, ka natimi inig et ahes ehelen nemda o un;

⁵ ka aien et atcei tah nitai atahas an nobohtan aien, um auahas nitap o un vaig, ka el et atcei tah natimi inig aien et has aien vaig tah nitai, um lep auahas nitap o un vai yin;

⁶ etmu has um yetpan an jupura a natimi inig et mun atcei tah nitai iji igki aien, etmu jim caig tah nitai caig itap aien, um yetpan an nopan iyehki et mun yiri nohun an wai aien.

⁷ Etu wit ete nagesega, etpu adicinadicin aien ja par apitac aien um caig nitai caig itap; et idim nitai caig incan.

⁸ Etmu jim caig tah nitai inig aien et tup mas, ka eh ces yi oplecoplec, vai yi jim auahas nitap o un aien vaig: ek acaiji nedo inigki ainyak Ihova.

⁹ Erumu lep apos nitap ura ara, va eri jim leh neruvaig iran ara, um emesmas vaig, el era auahas nitap ura ara: ek mun ago upene ra ainyak Ihova.

¹⁰ Etmu jim caig nitai caig itap tah natimi an taka pece: etmu jim caig nitai caig itap tah nalaig o un tah natimi ahlap, ka tah natimi et aheca o un aien va nimtan.

¹¹ Ja el et auanimtan tah natimi tah natimi ahlap va mune o un, etmu caig nitai caig itap aien, im lep ra eris apos ra an nimnim o un: erumu caig nitai caig itap ara.

¹² Etmu jim caig nitai caig itap a inhalav atahig o un tah natimi ahlap, el et ehgai natimi an taka pece aien.

¹³ Ja el et tup amen a inhalav atahig u natimi ahlap van mas u natamnyu un, ka el is abraig pan yin a natamnyu un, el et eti eteuc tah inhal o un, el et lep adumoij pam an nimnim u etman aien, et idivaig is wat atahig aien, etmu caig nitai caig u etman aien: ja etmu jim caig tah natimi an taka pece.

¹⁴ El et caig tah nitai caig itap tah natimi jam eti ethotiknaig, etmu ati nuarin fifd iran aien, um alupai natimi ahlap im lep nitai caig itap iyehki.

¹⁵ Erumu jim auahas nitai itap iji ig u nup Isreel ara, era ahlap vai Ihova ara;

¹⁶ va eri jim leh neruvaig nedo has ura ara, eru wit caig nitai caig itap ura ara: ek mun ago upene ra ainyak Ihova.

¹⁷ Is um tas a Ihova ehele Moses, um ika,

¹⁸ Tas ehele Eron aiek, im ilpuhal o un, im lep ehele nup Isreel asega, um ika ehele ra, El et ika tah irai up Isreel, ka tah nai up urai taka pece era amen an pece Isreel ara, yi ahlap an nitai ahlap o un va niji tas upyi asaig asega o un, im lep va niji itai tup ahtai asega o un, erupu ika ara eri ahlap vai Ihova ara va nitai ahlap atnamud;

¹⁹ akumu ispumia ahlap an tah natamaig aijaua irai kurimatau, ka siip, jam ti nitai has iran.

²⁰ Ja akumu jim ahlap iran tah nitai inig aijaua, et eteuc tah nitai has iran: etpu eti upene inliinmopoi Atua vaig vai caua.

²¹ Im lep inig, aien et ahlap an nitai ahlap u nitai caig vai Ihova aien, mika yi ehneijid intas upyi asaig o un, ka nitai tup ahtai o un irai kurimatau ka siip, etmu upene asega, etmu jim eteuc tah nitai has iran; mika yi upene inliinmopoi Atua vaig vai yin.

²² Akumu jim ahlap aijaua vai Ihova an tah nitai, el et apat nesganimtan, ka el et ahtasvi neduon, ka el et ighin, ka epeuv, ka ehias, ka amasaki, um jim ahlap iran an nitai ahlap er atnamud an cap an natau vai Ihova.

²³ Et upene mika eri ahlap vai nitai tup ahtai, irai kurimatau ka nakli siip inig, et alupas tah nuarin ka et haklin tah nuarin; ja inyi eti upene par ahlap iran van tas upyi asaig o un tah.

²⁴ Akumu jim ahlap vai Ihova an nitai inig eris asji, ka eris auwihi, ka eris auhaig yi opdicraig, ka eris ehped; akumu jim ahlap an tah nitai inigki an pece unyimia aijaua.

²⁵ Im lep inig, akumu jim ahlap an nitai caig u Atua unyimia aijaua vai nup urai taka pece an tah nitai iji igki; et idim eteuc nuarin epeuv iran, im nuarin has iran: inyi eti upene inliinmopoi Atua vaig vai caua.

²⁶ Is um tas a Ihova ehele Moses, um ika,

²⁷ Etu wit ahad tah kurimatau, ka tah siip, ka tah nanin, etmu amen inhal o un ehele risin ira adiat inyi seven; ja ahes an nadiat eetd um yetpan etpu tau upene vai nitai ahlap er atnamud au cap vai Ihova.

²⁸ Ja el et kurimatau atahig ka siip atahig, akumu jim atgei yin im inhal o un aijaua an nadiat et ethi ache.

²⁹ Im lep inig, aku wit ika aijaua aki ahlap an nitai ahlap naaurinig vai Ihova, akumu ispumia ahlap iran aijaua.

³⁰ Uhmu atahni an nadiat et ethi ache; akumu jim udei tah nuarin aijaua um yetpan an nuhialig: ek Ihova ainyak.

³¹ Va nitai inigki akumu imiaiji niji tas alep unyak aijaua, um ago: ek Ihova ainyak.

³² Akumu jim auahas nidak itap aijaua; erumu ika a nup Isreel ek upene ainyak: ek ago upene caua ainyak Ihova,

³³ kis iknipagki caua an pece Ijipt ainyak, mika ki Atua unyimia: ek Ihova ainyak.