Levitikus 21 - Intas Etipup

Nuarin tas alupas 21.

1 Intas alep vai intaig u ilpu atimi ahlap. 6 Vai nedo upene ura. 8 Vai nikni ra. 7, 13 Vai natmehgan ura. 17 Eri jim auaraheca an neom itap a ilpu atimi ahlap el et eteuc tah nuarin has irai ohura.

¹ IS ika a Ihova ehele Moses, Namu tas ehele ohwat atimi ahlap aiek, ohwat hal u Eron, um ika ehele rau, Etmu jim auahas nitap o un tah natimi ahlap vaig tah natimi mas irai up uran pece o un;

² ja vai ilpu atimi ehpan iran esjilid ache, nikavaig, vai risin, im lep vai etman, im inhalav atamaig o un, im inhalav atahig o un, im etwan,

³ im natahig iran inveijec, et tup amen aien, et eti eteuc natamnyu un; etmu auahas nitap o un aien vai yin.

⁴ Ja etmu jim auahas nitap o un aien vaig tah et eche, mika yi idivaig tup atimi: et idim atimi alupas aien irai up uran pece o un.

⁵ Erumu jim ucsei apitpityat numri nidjinira ara, erumu jim ucsei, tah nuarin umri ingeijira ara, um jim atai tah nuarin nohura.

⁶ Erumu ilpu atimi upene vai Atua ura ara, erumu jim auahas nidai Atua ura ara: era idim ahlap irai iji itai ahlap ara er atnamud an cap, im lep nitai caig u Atua ura: va nitai inigki erumu upene ara.

⁷ Etmu jim leh intakata inig yi ehgan tah natimi ahlap et mun ago ingeijid aien, ka tah et mun ago nedo maumau aien; im lep inig, etmu jim leh intakata inig aien is abraig pan yin a natamnyu un: era idim ilpu atimi upene vai Atua ura ara,

⁸ va nitai inigki akumu ikni ra aijaua mika eri ilpu atimi upene ara; era idim ahlap an nitai caig u Atua unyimia ara: erumu ilpu atimi upene imi caua ara: ek idim upene ainyak Ihova inig, ek ago upene caua ainyak.

⁹ El et ago ingeijid a inhalav atahig o un tah natimi ahlap, um auahas yin, et mun auahas etman aien: uhmu atnamud yin an cap.

¹⁰ Etmu jim atipagki incat adgaig o un a natimi esjilid an nahlap, um jim ahpati napelumai o un, nikavaig, et esjilid irai ilpu etwan aien, eris lep atladwi narakei itap an nidjinin, eris lep ati yin mika yi aso yin ira apelumai itap aien;

¹¹ im lep inig, etmu jim apan ubutpotet u nohui atimi mas aien, etmu jim auahas nitap o un aien vai etman, ka vai risin;

¹² im lep inig, etmu jim udei nimnim itap aien um apan itac, etmu jim auahas nimnim itap u Atua o un aien; et mun adgaig incat adgaig itap aien eris atladwi iran narakei itap u Atua o un: et uce intas alep unyak Ihova.

¹³ Etmu leh natahig ache aien yi ehgan.

¹⁴ Etmu jim leh intakata inig aien is mas natamnyu un yi ehgan, ka intakata inig is abraig pan yin a natamnyu un, ka intakata ago nedo maumau, ka intakata ago ingeijid, etmu jim leh tah aien irai ra sji igki: etmu leh natahig ache aien irai up uran pece o un.

¹⁵ Vai yi jim auahas nitap u ilpu hal o un aien irai up uran pece o un: ek idim ago upene yin ainyak Ihova.

¹⁶ Is tas a Ihova ehele Moses, um ika,

¹⁷ Namu tas ehele Eron aiek, um ika, El et eteuc nuarin has iran tah irai ilpu mapom irai iji mesese, etmu jim apam ehelek aien par ahlap an nitai caig u Atua o un.

¹⁸ Etmu jim apam ehelek tah natimi inig et has tah nuarin nohun: nikavaig, natimi inig et apat nesganimtan, ka et isvihteuc neduon, ka et haklin tah nuarin, ka et alupas tah nuarin,

¹⁹ ka natimi inig is tes neduon, ka is tes nikman,

²⁰ ka et atga acvaacva aien, ka natimi inig et haklin aien, ka et eteuc nuarin has an nesganimtan, ka et ehias aien, ka et amasaki aien, ka et atpujij nauintin;

²¹ etmu jim apam ehelek tah irai ilpu mapoi Eron natimi ahlap mika yi ahlap irai iji itai ahlap u Ihova er atnamud an cap, el et eteuc iran tah nuarin has: etmu jim apam ehelek aien mika yi ahlap an nitai caig u Atua o un aien; et idim eteuc iran tah nuarin has.

²² Etmu caig nitai caig u Atua o un aien, nikavaig, nitai caig inig et itap, im lep nitai caig inig et itap esjilid.

²³ Ja etmu jim yetpam u natcai apelumai aien, um jim apam ubutpotet u natau, vaig inig nikavaig, et eteuc iran tah nuarin has; vai yi jim auahas niji uarin itap unyak: ek idim ago itap nuarin iji igki ainyak Ihova.

²⁴ Is asuptecnaig intas iji igki a Moses ehele Eron, im ohwat hal o un, im lep ehele nup Isreel asega.