Levitikus 2 - Intas Etipup

Nuarin tas alupas 2.

1 Nitai ahlap irai flaur im narakei iran im nitai auanipin upene, 4 er ahen, 5 ka er ago a pani, 7 ka an nipjiuru, 12 ka irai hupnai itai. 13 Inmoho an jap irai itai ahlap.

¹ ETU wit ahlap vai Ihova tah an nitai caig, etmu ahlap aien irai flaur upene; etmu lep atladwi narakei iran aien, um ati nide cai auanipin upene iran:

² etmu imiapam ehele ilpu hal u Eron aien, ilpu atimi ahlap: etmu atipagki flaur iran aien an nikman yi ohua, im narakei iran, im nide cai auanipin upene asega iran: etmu lep atnamud ijinies an natau a natimi ahlap par itai imiehva, mika yi itai ahlap er ago au cap, nitai auanipin upene vai Ihova:

³ ja etmu ohuun a Eron im ilpu hal o un nitai caig inig et eled an nitai ahlap: et idim itap nitai inig irai iji itai ahlap vai Ihova er ago an cap.

⁴ El et imiapam nitai ahlap aiek irai itai hegaig er ahen, inyi areto apalapal irai flaur upene, et ti leven iran, er aplamod an narakei, ka biskit et ti leven iran er aspi an narakei.

⁵ El et ahlap aiek an nitai caig er ahen a pani, uhmu ago irai flaur upene et ti leven iran, er aplamod an narakei.

⁶ Namu eswoplecoplec aiek, um atladwi narakei iran: nitai ahlap an nitai caig nigki.

⁷ El et ahlap aiek an nitai caig er ago an nipjiuru, uhmu ago irai flaur upene im narakei.

⁸ Namu imiapam ehele Ihova aiek nitai ahlap an nitai caig er ago irai itai iji igki: uhmu ati ehele natimi ahlap, ja etmu imiapan u natau aien.

⁹ Etmu lep atipagki nuarin an nitai ahlap an nitai caig a natimi ahlap par itai imiehva, um atnamud an natau: nitai ahlap er ago an cap nigki, nitai auanipin upene vai Ihova.

¹⁰ Ja etmu ohuun a Eron im ilpu hal o un nitai caig inig et eled an nitai ahlap: et idim itap nitai inig irai iji itai ahlap vai Ihova er ago an cap.

¹¹ Akumu jim imiapam ehele Ihova tah nitai ahlap au nitai caig aijaua er ago irai leven: akumu jim atnamud tah leven aijaua, ka tah hune, an tah nitai ahlap vai Ihova er ago an cap.

¹² Akumu lep ahlap vai Ihova aijaua irai hupnai itai: jam jim atnamud an natau mika yi itai auanipin upene.

¹³ Uhmu ati inmoho an jap irai itai caig asega an ahlap iran aiek; etmu jim ti inmoho an jap an tas etipup u Atua unyum an nitai caig inig an ahlap iran aiek: namu ati inmoho an jap aiek irai iji itai ahlap asega unyum.

¹⁴ El et ahlap vai Ihova aiek irai hupnai itai hegaig unyum, namu ahlap aiek irai egai korn mat er ahen an cap, korn eris uhpunuhoig irai egai korn alupas, nitai ahlap irai hupnai itai hegaig unyum nigki.

¹⁵ Namu ati narakei iran aiek, um ati nide cai auanipin upene ijinies iran: nitai ahlap an nitai caig nigki.

¹⁶ Etmu atnamud nahaijin a natimi ahlap par itai imiehva, nahaijin korn eris uhpunuhoig, im nahaijin narakei, im lep nide cai auanipin upene asega iran: nitai ahlap vai Ihova nigki er ago an cap.