Levitikus 18 - Intas Etipup

Nuarin tas alupas 18.

1 Niji atmehgan et itap. 19 Niji edo has esjilid.

¹ IS tas a Ihova ehele Moses, um ika,

² Namu tas aiek ehele nup Isreel, um ika ehele ra, Ek Ihova ainyak Atua unyimia.

³ Akumu jim ago nedo o nup Ijipt aijaua akis amen ehele ra aijaua: um jim ago nedo o nup u Kenan, ek imiapan caua ehele ra ainyak: um jim auanago ura.

⁴ Akumu ago nedo unyak aijaua, um apos intas alep unyak, um atga iran: ek Ihova ainyak Atua unyimia.

⁵ Akumu apos intas alep unyak aijaua, im nedo unyak: el et ago tah natimi, etpu umoh vaig aien; ek Ihova ainyak.

⁶ Etmu jim asaig natmehgan ehelen tah natimi ehpan iran tah caua, um amen ehelen: ek Ihova ainyak.

⁷ Namu jim asaig natmehgan aiek ehele risum: et idim risum aien, um ehgai etmam; et itap vai euc par amen ehelen.

⁸ Namu jim asaig natmehgan aiek ehele ehgai etmam: et eti risum inveijec aien: ja is amen ehelen a etmam.

⁹ Namu jim asaig natmehgan aiek ehele natahig iram, el et inhalav atahig u etmam aien, ka inhalav atahig u risum, el eris apos yin an nimnim, ka eris apos yin an taka uarin: et itap vai euc par amen ehelen.

¹⁰ Namu jim asaig natmehgan aiek ehele inhalav atahig u inhalav atamaig unyum, ka inhalav atahig u inhalav atahig unyum: erus ahes ehelum arau.

¹¹ Namu jim asaig natmehgan aiek ehele inhalav atahig u ehgai etmam, is apos yin a etmam: et atahig iram aien.

¹² Namu jim asaig natmchgan aiek ehele natahig irai etmam: et atimi ehpan irai etmam aien.

¹³ Namu jim asaig natmehgan aiek ehele etwai risum: et atimi ehpan irai risum aien.

¹⁴ Namu jim asaig natmehgan aiek ehele ehgai etwai etmam, um jim amen ehele ehgan: et risum aien.

¹⁵ Namu jim asaig natmehgan aiek ehele ehgai inhalav atamaig unyum: et ohanig unyum aien; et itap vai euc par amen ehelen.

¹⁶ Namu jim asaig natmehgan aiek ehele ehgai etwam: is amen ehelen a etwam.

¹⁷ Namu jim asaig natmehgan aiek ehelen tah intakata im inhalav atahig o un, um jim asaig natmehgan aiek ehele inhalav atahig u inhalav atamaig o un, ka inhalav atahig u inhalav atahig o un; era ilpu atimi ehpan iran ara: nedo has nigki.

¹⁸ Namu jim asaig natmehgan aiek ehele etwai ehgam, um auahas inliinmopon, va namen unyum ehelen, an numoh o un.

¹⁹ Namu jim apan ehelen tah intakata aiek um amen ehelen, an nechim amen vaig o un vai inhas iran.

²⁰ Im lep inig, namu jim ago ingeijid ehele ehgai natimi eblaamnem unyum aiek, um auahas euc iran.

²¹ Um jim ati tah irai ilpu hal unyum, mika yi apan an cap aien ehele Molek, um jim auahas nidai Atua unyum: ek Ihova ainyak.

²² Namu jim amen ehelen tah natamaig aiek, et idivaig ehelen tah intakata: nedo er amcel vaig nigki.

²³ Namu jim amen ehelen tah nitai eklim edo irai pece aiek, um auahas euc iran: etmu jim aiji tah intakata an nuhup u tah nitai eklim edo irai pece mika yi amen ehelen: nedo has esjilid nigki.

²⁴ Jim auahas caua aijaua an tah nitai iji igki: eris auahas ra irai itai iji igki asega a nup urai pece iji ig ekpu ahlo ra ainyak an nuhup unyimia:

²⁵ et has inpece: ekpu aru iran ainyak va nedo has iran, etpu lep alo ira atimi inpece.

²⁶ Akumu apos intas alep unyak aijaua im nedo unyak, um jim ago tah nitai iji igki er amcel vaig; kit et tah natimi iramia, ka tah nup urai taka uarin et amen ehelemia aien:

²⁷ eris ago nedo iji igki asega er amcel vaig a nup uran pece eris upyi uhup iramia ara, um auahas inpece;

²⁸ vai yi jim lep alo iramia inpece, et idivaig is alo ira atimi iji ig eris upyi hup iramia ara.

²⁹ El et ago tah nedo iji igki er amcel vaig, uhmu idim iknipagki ilpu atimi ago nitai iji igki ehele atimi ura.

³⁰ Akumu apos intas alep unyak aijaua, va aki jim ago tah nedo iji igki er amcel vaig aijaua, eris upyi ago, um jim auahas caua iran: et uce intas alep unyak Ihova Atua unyimia.