Levitikus 16 - Intas Etipup

Nuarin tas alupas 16.

1 Intas alep va natimi esjilid an naldap, et mat apan anliin nuarin itap esjilid aien. 11 Nitai ahlap va nedo has vai yin. 15 Nitai ahlap va nedo has va atimi. 20 Nanin inig er atcijaig. 29 Nasjapicnaig et ethi irai iji mesese mika eri ahlap vai nup Isreel.

¹ IS ti pan itac inmas o ohwat hal u Eron eris ahlap arau an nuhup u Ihova, um mas, ja is par tas a Ihova ehele Moses;

² is ika a Ihova ehele Moses, Namu asaig aiek ehele Eron etwam, mika yi jim apan aien an nuarin itap irai iji adiat, anliin natcai apelumai an nuhup u nitai atapnes an nelcau et amen intas alep iran; va yi jim mas aien: ekpu idim ehcohos an napat ainyak ijinies an nitai atapnes.

³ Etmu ham a Eron an nuarin itap inyi uce: etmu imiapam kurimatau atamaig takuras aien uri nitai ahlap va nedo has, im siip atamaig uri nitai ahlap atnamud.

⁴ Etmu aso yin aien an napelumai uhup et itap, im incetpon neduon, um ahid nitai ahid apelumai, um adgaig incat adgaig apelumai: napelumai itap ji igki; va nitai inigki etmu yiri nohun an wai aien, ja par aso yin iran.

⁵ Etmu lucsei ehele nup Isreel aien inhakli nanin inyi ero, uri nitai ahlap va nedo has, im siip atamaig inyi ethi, uri nitai ahlap atnamud.

⁶ Etmu leh kurimatau atamaig takuras o un a Eron, um ahlap iran vai yin, um adahpoi nedo has o un, im ilpu hal o un.

⁷ Etmu lep leh nanin et ero erahki aien, um ikni an nuhup u Ihova an neucse neom er asjapicnaig o un.

⁸ Etmu edaig niji itai asjaaicnaig an nanin erahki aien; nitai asjaaicnaig yi ethi vai Ihova, im lep yi ethi vai nanin eri atcijaig.

⁹ Etmu leh nanin inig a Eron et yetpan iran nitai asjaaicnaig u Ihova, um ahlap iran nitai ahlap va nedo has.

¹⁰ Ja uhmu ati an nuhup u Ihova nanin inig et umoh is yetpan iran nitai asjaaicnaig an nanin eri atcijaig, mika eri asa nigpa iran, ja par atcijaig mika yi atga o un, um apan an namasacen.

¹¹ Etmu lep leh kurimatau atamaig takuras a Eron nitai ahlap va nedo has o un, um ahlap vai yin, im ilpu hal o un, um atgei kurimatau atamaig takuras nitai ahlap va nedo has o un:

¹² etmu lep leh nipjinitai aien er atnamud nitai auanipin upene iran, um leh inhumla cap iran an natau an nuhup u Ihova, etmu lep ohua nikman ero an nitai auanipin upene eris ehtoplecoplec, um imiapan anliin natcai apelumai:

¹³ etmu ati nitai auanipin upene an cap aien an nuhup u Ihova, va etpu ataluopni pam intapnes an nelcau, et amen intas alep iran nadran nitai auanipin upene, vai yi jim mas aien:

¹⁴ etmu leh inja irai kurimatau iyehki aien, um ohaig an nupsikman an tapnes an ridjai o un; etmu eceseven ohan ja an nupsikman aien an nuhup u intapnes.

¹⁵ Etmu lep atgei nanin uri nitai ahlap va nedo has aien va atimi, um imiapan inja iran anliin natcai apelumai, um ago an ja iran is idivaig is ago an ja irai kurimatau iyehki aien, um ohaig ijinies an tapnes, im lep an nuhup u intapnes:

¹⁶ etmu ahlap aien va nuarin itap, vai inhas irai up Isreel, im nedo ahnag ura irai edo has asega ura: etmu lep ago inyi uce aien va neom er asjapicnaig o un, et amen ehele ra, an niblan edo has ura.

¹⁷ Etmu jim amen tah natimi an neom er asjapicnaig o un, etu wit apan aien anliin neom, um ahlap an nuarin itap, um imihum pan an nopan iyehki, etpu alau ijo aien, um ahlap vai yin, im ilpu hal o un, im nup Isreel asega.

¹⁸ Etmu alau ijo aien u natau an nuhup u Ihova um ahlap vaig; etmu leh inja irai kurimatau iyehki aien, im inja an nanin iyehki, um ati irai ipat an natau, um arehed mihtag.

¹⁹ Etmu eceseven ohan ja iran an nupsikman aien, um ago adicinadicin, um ika yi upene va nedo has u nup Isreel.

²⁰ Etmu ahlap ehni aien vai nuarin itap, im neom er asjapicnaig o un, im lep natau, ja par imiapam nanin umoh:

²¹ etmu ikni nikman ero a Eron an nidjini nanin umoh, um asuptecnaig iran nedo has asega u nup Isreel, im nedo ahnag asega ura an nedo has asega ura, um iknijai an nidjinin, um imiapan nanin an nikmai natimi ato itai an namasacen:

²² etmu lep apos pan nedo has asega ura nanin an nuarin umaruma: etmu lep atcijaig nanin an namasacen aien.

²³ Etmu apan a Eron anliin neom er asjapicnaig o un, um iknipagki napelumai iji ehki is aso yin iran aien, is wat apan aien an nuarin itap, um udei eahki:

²⁴ etmu yiri nohun aien an wai an nuarin itap, um aso yin an napelumai o un, um alau ijo, um ahlap an nitai ahlap atnamud o un, im nitai ahlap atnamud va atimi, um asa nigpa vai yin, im lep va atimi.

²⁵ Ja etmu atnamud nagako an nitai ahlap va nedo has aien an natau.

²⁶ Etmu yiri napelumai o un aien is atcijaig nanin apos nedo has aien, um yiri nohun an wai, ja par apam an nuarin amen u atimi.

²⁷ Uhmu iknipagki an nuarin amen u atimi kurimatau atamaig uri nitai ahlap va nedo has, im nanin uri nitai ahlap va nedo has, eris imiapan inja iran par asa nigpa an nuarin itap; um atnamud itac narasirau an cap, im nohurau, im nohok urau.

²⁸ Etmu yiri napelumai o un aien et atnamud aien, um ereuc an wai, ja par apan an nuarin amen u atimi.

²⁹ Intas alep imi caua nigki irai iji mesese: nikavaig, akumu ehcerucai caua aijaua an nadiat tend an mohoc sevend, um jim ago tah nauritai iran, kit natimi an pece, ka natimi an taka pece et amen ehelemia aien:

³⁰ etmu ahlap vai caua a natimi ahlap an nadiat iyehki, um ago adicinadicin caua, mika aki upene aijaua va nedo has asega unyimia an nuhup u Ihova.

³¹ Inyi adiat atumop imi caua: akumu lep ehcerucai caua aijaua vai intas alep irai iji mesese.

³² Im natimi ahlap inig etpu aspi yin aien, um ati par ago nauritai u natimi ahlap, um isjeupigmoig etman, etmu ahlap aien um aso yin an napelumai yilyil o un, napelumai itap marom:

³³ etmu ahlap aien va nuarin itap, etmu lep ahlap aien va neom er asjapicnaig o un, im natau, etmu lep ahlap aien vai ilpu atimi ahlap, im lep va atimi asega.

³⁴ Intas alep imi caua nigki irai iji mesese, mika eri ecethi ahlap vai nup Isreel, va nedo has asega ura irai iji mesese. Is ago a Moses is idivaig is asaig ehelen a Ihova.