Levitikus 15 - Intas Etipup

Nuarin tas alupas 15.

1 Inhas u ilpu atamaig an nared nida ira ra. 13 Nago adicinadicin ra vaig. 19 Inhas u ilpu takata an nared nida ira ra. 28 Nago adicinadicin ra vaig.

¹ IS tas a Ihova ehele Moses im Eron, um ika,

² Arumu tas ehele nup Isreel aijaurau, um ika ehele ra, El et ared nida iran tah natimi, et has aien va nemehe iran.

³ Et uce inhas o un: el et ared nida inigki, ka el et omot, et has aien.

⁴ Et has intinan asega et asjeuc iran aien et eteuc nemehe inigki iran: et lep has nitai iji igki asega et ateuc iran aien.

⁵ El et atcei pan intinan tah, etmu yiri napelumai o un aien, um ereuc an wai, etmu has aien um yetpan an jupura.

⁶ El et ateuc an nitai ateuc inig tah is ateuc iran et ared nida iran, etmu yiri napelumai o un aien, um ereuc an wai, etmu has aien um yetpan an jupura.

⁷ El et atcei pan yin et ared nida iran tah, etmu yiri napelumai o un aien, um ereuc an wai, etmu has aien um yetpan an jupura.

⁸ El et agdei iran tah natimi inig et upene a natimi inig et ared nida iran; etmu yiri napelumai o un a natimi iyehki, um ereuc an wai, etmu has aien um yetpan an jupura.

⁹ El et ateuc an tah nitai ateuc irai hors aien et ared nida iran, etmu has nitai ateuc iyehki.

¹⁰ Aien et atcei pan tah nitai inig aien is amen ithan, etmu has aien um yetpan an jupura: etmu lep yiri napelumai o un tah et apos tah nitai iji igki aien, um ereuc an wai, etmu has aien um yetpan an jupura.

¹¹ El et eti ahisjum a natimi inig et atcei pan yin et ared nida iran, etmu yin napelumai o un aien, um ereuc an wai, etmu lep has aien um yetpan an jupura.

¹² El et atcei pan nipjinitai obohtan aien et ared nida iran, uhmu ahtagrei: ja uhmu yiri an wai niji elcau asega.

¹³ Uhu wit ago adicinadicin yin et ared nida iran aien va nemehe iran; etmu esvi nadiat inyi seven aien mika yi adicinadicin, um yiri napelumai o un, um ereuc an wai ahlau ohua, ja par cedag.

¹⁴ Ja etmu leh nucip inyi ero, ka nalaupa inyi ero aien an nadiat eetd, um apan an nuhup u Ihova an neucse neom er asjapicnaig o un, um alupai natimi ahlap:

¹⁵ etmu ahlap iran a natimi ahlap, inyi itai ahlap va nedo has et ethi, inyi lep itai ahlap atnamud et ethi; etmu ahlap a natimi ahlap an nuhup u Ihova va nemehe iran.

¹⁶ El et ahes ehelen tah natimi nemda o un, etmu yiri nohun asega an wai aien, etmu has aien um yetpan jupura.

¹⁷ Uhmu yiri an wai napelumai asega, im narasi itai asega, et amen iran nemda o un, etmu has aien um yetpan jupura.

¹⁸ Inyi lep has a intakata inig et amen ehelen a natimi an nemda o un, erumu ereuc an wai arau, erumu lep has arau um yetpan au jupura.

¹⁹ El et aiheuc lelicai tah intakata, etmu echim amen aien ira adiat inyi seven: el et atcei pan yin tah etmu has aien um yetpan au jupura.

²⁰ Etmu has nitai iji igki asega et asjeuc iran aien an nechim amen vaig o un: etmu lep has nitai iji igki asega et ateuc iran aien.

²¹ El et atcei intinan tah, etmu yiri napelumai o un aien, um ereuc an wai, etmu lep has aien um yetpan an jupura.

²² El et atcei tah nitai is ateuc iran aien tah, etmu yiri napelumai o un aien, um ereuc an wai, etmu lep has aien um yetpan an jupura.

²³ El et atcei intinan tah ka tah nitai is ateuc iran aien, etmu has aien um yetpan an jupura.

²⁴ El et atcei yin tah, um amen iran nemehe iran, etmu has aien ira adiat inyi seven; etmu lep has intinan asega et asjeuc iran aien.

²⁵ El et aiheuc lelicai tah intakata ira adiat inyi ahinag, jam eti yetpan u nopan u nechim amen vaig o un, ka el et ahinag ira adiat et echim amen iran aien; inyi idivaig niji adiat an nechim amen vaig o un, niji adiat et amen iran nemehe: etmu has aien.

²⁶ Inyi idivaig intinan an nechim amen vaig o un, intinan asega et asjeuc iran aien ira adiat asega et aiheuc lelicai aien: etmu lep has niji itai asega et ateuc iran aien, et idivaig inhas an nechim amen vaig o un.

²⁷ El et atcei nitai iji igki tah, etmu has aien, etmu yiri napelumai o un aien, um ereuc an wai, etmu lep has aien um vetpan an jupura.

²⁸ Ja el et cehcehe aien va nemehe iran, etmu esvi nadiat inyi seven imi yin aien, ja etmu upene aien.

²⁹ Etmu lep leh nucip inyi ero ka inhakli nalaupa inyi ero aien an nadiat eetd, um imiapam ehele natimi ahlap, an neucse neom er asjapicnaig o un.

³⁰ Etmu ahlap iran yi ethi a natimi ahlap nitai ahlap va nedo has, im lep yi ethi nitai ahlap atnamud; etmu ahlap a natimi ahlap an nuhup u Ihova va nemehe inig et has vaig aien.

³¹ Et idim uco akumu atipagki inhas irai up Isreel; va eri jim emesmas ara vai inhas ira ra, eru wit auahas neom itap unyak ara et amen ehele ra.

³² Intas alep nigki vai yin et ared nida iran, im yin et ahes ehelen nemda o un, et lep has vaig aien;

³³ im intakata inig et aiheuc lelicai aien, im lep natamaig inig, ka intakata inig, et ared nida iran, im lep natamaig inig et atcei intakata inig et has aien.