Levitikus 14 - Intas Etipup

Nuarin tas alupas 14.

1 Niji tas alep im niji itai ahlap an nago adicinadicin vaig u natimi lepros. 33 Niji itai asjaaicnaig u naleprose an neom. 43 Nago adicinadicin vaig u neom iyehki.

¹ IS tas a Ihova ehele Moses, um ika,

² Intas alep vai natimi lepros nigki an nadiat er asaig mika, et cedag aien: Uhmu imiapan yin ehele natimi ahlap:

³ etmu ahes an nuarin amen u atimi a natimi ahlap, um apan itac; etmu almaijidjid a natimi ahlap, um almoi, el et cehcehe natimi lepros va nemehe aleprose iran;

⁴ etmu asaig a natimi ahlap mika, eri leh inman umoh um upene inyi ero vai yin et cehcehe aien, im incai sitar, im inya cap, im hisop:

⁵ etmu asaig a natimi ahlap mika, eri atgei inman yi ethi an nipjinitai obohtan ijinies an wai ahlau ohua:

⁶ ja etmu leh inman umoh aien, im incai sitar, im inya cap, im hisop, um ahtaijuli nitai iji ig im lep inman inig et umoh, an ja an man er atgei ijinies an wai ahlau ohua:

⁷ etmu eceseven ohaig irai natimi inig aien et cehcehe aien va naleprose iran, um asaig mika et cedag aien, ja uhmu atcijaig inman umoh an lelitai.

⁸ Etmu lep yiri napelumai o un aien er ago cehcehe yin, um ucsei numri nidjinin asega, um yiri yin an wai, va etpu cedag aien: ja etmu apan aien an nuarin amen u atimi, jam amen ijo u neom atga o un ira adiat inyi seven.

⁹ Ja etmu ucsei numri nidjinin asega aien im ingeijin im nahpumtan an nadiat sevend, etmu ucsei asega aien: etmu yiri napelumai o un aien, etmu lep yiri nohun asega aien, ja etpu cedag aien.

¹⁰ Etmu lep leh inhakli siip atamaig inyi ero aien, et ti nitai has iran, an nadiat eetd, im inhakli siip atahig yi ethi, inyi wun inmesese iran, um ti nitai has iran, im omer irai flaur upene inyi eseij, mika yi itai ahlap an nitai caig, er aplamod an narakei, im loc yi ethi an narakei.

¹¹ Etmu ati natimi inig etpu cedag aien, im nitai iji igki an nuhup u Ihova, a natimi ahlap inig et asaig aien et mun cedag aien, an neucse neom er asjapicnaig o un:

¹² etmu leh inhakli siip atamaig yi ethi a natimi ahlap, um ahlap iran, mika yi itai ahlap va nedo ahnag, im loc yi ethi an narakei, um ohaig jipe, mika yi itai ahlap ohaig jipe an nuhup u Ihova:

¹³ etmu atgei inhakli siip aien an nuarin er atgei nitai ahlap va nedo has iran im nitai ahlap atnamud, an nuarin itap: et ohuun nitai ahlap va nedo ahnag a natimi ahlap, et idivaig et ohuun nitai ahlap va nedo has aien; et idim itap esjilid:

¹⁴ etmu leh tah inja irai hakli siip nitai ahlap va nedo ahnag a natimi ahlap, etmu ati an tikgan inmatai natimi inig etpu cedag aien a natimi ahlap, im lep an nupsikman meto inmatan, im nupseduon meto inmatan:

¹⁵ etmu leh tah narakei irai loc a natimi ahlap, um atladwi an nakohiaig an nikman inmauun:

¹⁶ etmu ahtaijuli nupsikman inmatan a natimi ahlap an narakei an mauun, um eceseven ohaig narakei an nupsikman an nuhup u Ihova:

¹⁷ etmu lep leh narakei an nikman a natimi ahlap um ati an tikgan inmatai natimi inig etpu cedag aien, im lep an nupsikman meto inmatan, im nupseduon meto inmatan, ijinies an ja irai hakli siip nitai ahlap va nedo ahnag:

¹⁸ ja etmu atladwi narakei et eled an nikman a natimi ahlap ijinies an nidjinii natimi inig etpu cedag aien: ja etmu lep adahpoi nedo has o un a natimi ahlap an nuhup u Ihova.

¹⁹ Etmu ahlap a natimi ahlap an nitai ahlap va nedo has, um adahpoi nedo has u natimi inig etpu cedag aien va nitai has iran; ja par lep atgei nitai ahlap atnamud:

²⁰ etmu ahlap a natimi ahlap an nitai ahlap atnamud im nitai ahlap an nitai caig an natau: etmu adahpoi nedo has o un a natimi ahlap, ja etpu cedag aien.

²¹ El et ihkin natimi aien, um ehka vai yin in leh vaig itai; etmu leh inhakli siip yi ethi aien nitai ahlap va nedo ahnag, um ohaig jipe par adahpoi nedo has o un, im omer yi ethi irai flaur upene er aplamod an narakei, mika yi itai ahlap an nitai caig, im loc yi ethi an narakei;

²² im nucip yi ero, ka nalaupa yi ero, et idivaig et emda aien inleh vaig; inyi itai ahlap va nedo has et ethi, inyi lep itai ahlap atnamud et ethi.

²³ Etmu imiapam aien an nadiat eetd ehele natimi ahlap mika yi cedag aien, an neucse neom er asjapicnaig o un, an nuhup u Ihova.

²⁴ Etmu leh inhakli siip mika yi itai ahlap va nedo ahnag a natimi ahlap, im loc an narakei, etmu lep ohaig jipe a natimi ahlap, nitai ahlap ohaig jipe an nuhup u Ihova:

²⁵ etmu atgei inhakli siip uri nitai ahlap va nedo ahnag aien, etmu leh inja a natimi ahlap an nitai ahlap va nedo ahnag, um ati an tikgan inmatai natimi inig etpu cedag aien, im lep an nuspikman meto inmatan, im nupseduon meto inmatan:

²⁶ etmu atladwi narakei a natimi ahlap an nakohiaig an nikman inmauun:

²⁷ etmu leh tah narakei an mauun a natimi ahlap an nupsikman inmatan, um eceseven ohaig an nuhup u Ihova:

²⁸ etmu leh narakei an nikman a natimi ahlap um ati an tikgan inmatai natimi inig etpu cedag aien, im lep an nupsikman meto inmatan, im nupseduon meto inmatan, ijinies an ja irai nitai ahlap va nedo ahnag:

²⁹ ja etmu atladwi narakei et eled an nikman a natimi ahlap ijinies an nidjini natimi inig etpu cedag aien, mika yi itai adahpoi nedo has o un an nuhup u Ihova.

³⁰ Etmu ahlap aien an nucip yi ethi, ka inhakli nalaupa yi ethi, et idivaig et emda aien inleh vaig;

³¹ nitai inig marom, et emda aien inleh vaig, inyi itai ahlap va nedo has et ethi, inyi lep itai ahlap atnamud et ethi, im lep nitai ahlap an nitai caig: etmu ahlap a natimi ahlap vai natimi inig etpu cedag aien an nuhup u Ihova.

³² Intas alep nigki vai yin et amen iran nemehe aleprose, ja et ehka vai yin inleh vaig itai upene mika yi cedag aien.

³³ Is tas a Ihova ehele Moses im Eron, um ika,

³⁴ Aku wit apan an pece Kenan inig aijaua, ekpu alupai caua ainyak mika aki ohuun aijaua, el ek ati naleprose ainyak an tah neom an pece inig akupu ohuun aijaua;

³⁵ etmu apan a natimi ohuun neom um asaig ehele natimi ahlap, um ika, Ek aktaktai ainyak mika, et eteuc tah nitai has an neom unyak:

³⁶ etmu asaig a natimi ahlap mika eri uhup ara um iknipagki itai an neom, ja etmu apan iran a natimi ahlap, um almaijidjid nitai has, vai yi jim has niji itai asega anliin neom: etmu apitac aien um apan anliin neom, um almaijidjid neom:

³⁷ etmu almaijidjid nitai has aien, el et amen nalmun nemehe et ubo an yipin neom, et emilmat ka cap, um ubo nugnyan nalmun nemehe an yipin neom;

³⁸ etmu alau ijo a natimi ahlap an neucse neom, um atapnes an neom ira adiat inyi seven:

³⁹ etmu aketo a natimi ahlap um apan an nadiat sevend, um almoi: el et apaahni nitai has an yipin neom;

⁴⁰ etmu asaig a natimi ahlap mika eri iknipagki inhat iji igki ara et amen nitai has iran, erumu lucsei an maliyum ara, um erekhaig pan itac an nuarin has:

⁴¹ etmu ika aien eri ahpei anliin neom um arehed, erumu lucsei nohok ara an maliyum um erekhaig pan itac an nuarin has:

⁴² erumu lucsei hat inyi eche, um asjapigmoig iji igki iran; etmu lep leh nubrei inyi eche aien, um aspi neom.

⁴³ El et lep ehcohos nitai has, um ateucrad an neom, eris wat iknipagki hat iran, um ahpei, um as-pi;

⁴⁴ etmu aketo a natimi ahlap um apan, um almoi, el et apaahni nitai has an neom, naleprose apaahni nigki an neom: et idim has.

⁴⁵ Etmu alcapdicraig neom aien, niji hat iran, im nauicai iran, im nubrei asega iran; etmu lucsei an maliyum aien um imiapan an nuarin has.

⁴⁶ El et apan anliin neom tah an nopan er atapnes, etmu has aien um yetpan an jupura.

⁴⁷ El et asjeuc anliin neom tah, etmu yiri napelumai o un aien; el et hag anliin neom tah, etmu yiri napelumai o un aien.

⁴⁸ El eh aspi neom, ja par apan anliin a natimi ahlap, um almoi mika, et eti apaahni nitai has iran: etmu ika a natimi ahlap, et cehcehe neom, et mun ti nitai has iran.

⁴⁹ Etmu leh inman inyi ero aien, im incai sifar, im inya cap, im hisop: par ago cehcehe neom iran:

⁵⁰ etmu atgei inman yi ethi aien an nipjinitai obohtan ijinies an wai ahlau ohua:

⁵¹ etmu lep leh incai sifar aien, im hisop, im inya cap, im inman umoh, um ahtaijuli nitai iji igki an ja an man er atgei im lep an wai ahlau ohua, um eceseven ohaig an neom:

⁵² etmu ago cehcehe neom aien an ja an man, im inwai ahlau ohua, im inman umoh, im incai sifar, im hisop, im inya cap:

⁵³ ja etmu atcijaig inman umoh aien an lelitai, um ahlap va neom: ja etpu cehcehe.

⁵⁴ Intas alep nigki vai niji aleprose asega, im inmocop,

⁵⁵ im lep naleprose an napelumai, im neom,

⁵⁶ im inheuau, im inmocop, im nuarin inig et atop:

⁵⁷ mika eri ato nopan inig et has iran, im nopan inig et upene iran: intas alep va naleprose nigki.