Levitikus 13 - Intas Etipup

Nuarin tas alupas 13.

1 Niji tas alep im niji itai asjaaicnaig par atau natimi ahlap mika yi ato upene naleprose vaig.

¹ IS tas a Ihova ehele Moses im Eron, um ika,

² El et eteuc inheuau, ka inmocop, ka nuarin inig et atop, an narasin tah natimi, et idivaig nemehe aleprose; uhmu imiapam yin ehele Eron natimi ahlap, ka ehelen tah natimi ahlap irai ilpu hal o un:

³ etmu almaijidjid nemehe an narasin a natimi ahlap: el et ahi nalau an mocop, el er ecetai mika, et ubo inmocop ira arasin, nemehe aleprose nigki: etmu almaijidjid yiu a natimi ahlap um asaig mika, et has aien.

⁴ EI et ahi nuarin inig et atop an narasin, el er ecetai mika, et eti ubo ira arasin, um eti ahi nalau iran; etmu atapnes natimi emehe a na-timi ahlap ira adiat inyi seven:

⁵ etu wit lahlah an nadiat sevend, etmu almaijidjid yin a natimi ahlap: el eh ecetai mika, et ti nemehe iran, um eti apaahni an narasin; etmu lep atapnes yin a natimi ahlap ira adiat inyi seven:

⁶ etu wit lahlah an nadiat sev-end, etmu aketo a natimi ahlap um almaijidjid yin: el et poig tintin inmocop, um eti apaahni nemehe an narasin, etmu asaig a natimi ahlap mika, et upene aien: inmocop ache nigki: etmu yiri napelumai o un aien, ja par upene.

⁷ Ja el et almaijidjid yin a nati-mi ahlap mika et upene aien, ja par lep apaahni inmocop an narasin, etmu aketo a natimi ahlap um almaijidjid yin:

⁸ el et almoi a natimi ahlap mika, et apaahni inmocop an naras-in, etmu asaig a natimi ahlap mika, et has aien: naleprose nigki.

⁹ Etu wit eteuc nemehe aleprose iran tah natimi, uhmu imiapam yin ehele natimi ahlap;

¹⁰ etmu almaijidjid yin a natimi ahlap: el et ahi inheuau an narasin, um lep ahi nalau iran, el et lep eteuc nehetan an heuau;

¹¹ naleprose itu acen nigki an narasin, etmu asaig a natimi ahlap mika, et has aien, um eti atapnes yin: et idim has aien.

¹² Ja el et ateucrad alupas na-leprose an narasin, el et ataluopni asega narasin natimi emehe naleprose, um ahes an nipek o un um ahlau se an neduon, irai iji uarin et almaijidjid a natimi ahlap:

¹³ etmu aktaktai a natimi ahlap; el et ataluopni nohun asega naleprose, etmu asaig aien mika, et upene aien va nemehe iran: et ahi asega: et mun cedag aien.

¹⁴ Ja el et ateucrad nehetan iran, inyi has aien.

¹⁵ Etmu almaijidjid nehetan a natimi ahlap, um asaig mika, et has aien: et has nehetan: naleprose nigki.

¹⁶ El et lep eche nehetan, um lep ahi, etmu apan aien ehele natimi ahlap;

¹⁷ etmu almaijidjid yin a natimi ahlap: el et ahi nemehe iran; etmu asaig a natimi ahlap mika, et upene aien is amen nemehe iran: et mun cedag aien.

¹⁸ El is lep eteuc inheuau an narasin tah, ja pah mah,

¹⁹ el et lep eteuc nida an nuarin inig is heuau, ka nuarin inig et atop um ahi um umigja, etmu almoi a natimi ahlap;

²⁰ etu wit almaijidjid a natimi ahlap um almoi mika, et ubo inmocop ira arasin, um lep ahi nalau iran; etmu asaig a natimi ahlap mika, et has aien: nemehe aleprose nigki et ateucrad an heuau.

²¹ Ja el et almaijidjid a natimi ahlap, jam eti almoi nalau iji ig et ahi iran, el et eti ubo inmocop ira arasin, jam poig tintin; etmu atapnes yin a natimi ahlap ira adiat inyi seven:

²² el et apaahni alupas annarasin, etmu asaig a natimi ahlap mika, et has aien: nemehe mun nigki.

²³ Ja el et amen aktit nuarin inig et atop, um eti apaahni, inheuau ehri nigki; etmu asaig a natimi ahlap mika, et cedag aien.

²⁴ El et ehri tah nuarin an narasin tah, el et lep ahi nuarin is cas, um cap, um ahi;

²⁵ etmu almaijidjid a natimi ahlap: el et ahi nalau an nuarin inig et atop, um lep ubo inmocop ira arasin; naleprose nigki et ateucrad an nuarin ehri: etmu asaig a natimi ahlap mika, et has aien: nemehe aleprose nigki.

²⁶ Ja el et almaijidjid a natimi ahlap, jam eti ecetai tah nalau inig et ahi an nuarin inig et atop, um eti ubo inmocop ira arasin, jam poig; etmu atapnes yin a natimi ahlap ira adiat inyi seven:

²⁷ etu wit yetpam nadiat sevend, etmu almaijidjid yin a natimi ahlap: el et apaahni alupas an narasin, etmu asaig a natimi ahlap mika, et has aien: nemehe aleprose nigki.

²⁸ Ja el et amen aktit inuarin inig et atop, um eti apaahni an narasin, jam poig; nafoc va nehri nigki, etmu lep asaig a natimi ahlap mika et cedag aien: nafoc va nehri nigki.

²⁹ El et eteuc nemehe an nidjinin, ka numri ingeijin tah natamaig ka tah intakata;

³⁰ etmu almaijidjid nemehe iran a natimi ahlap: el eh ecetai mika, et ubo inmocop ira arasin; el et lep amen iran nalau iji ig et yag um eti elpat; etmu asaig a natimi ahlap mika, et has aien: inmocop mese nigki, naleprose an nidjinin, ka an numri ingeijin.

³¹ El et almaijidjid inmocop mese a natimi ahlap, um almoi mika, et eti ubo inmocop ira arasin, um ti nalau iji ig et apig iran; etmu atapnes yin et amen iran inmocop mese a natimi ahlap ira adiat inyi seven:

³² etmu almaijidjid inmocop a natimi ahlap an nadiat sevend: el et apaahni inmocop mese, um ti nalau iji ig et yag iran, um eti ubo inmocop ira arasin;

³³ uhmu ucsei ingeijin, ja eri jim ucsei nuarin inig et mocop; etmu aketo a natimi ahlap um atapnes yin et amen inmocop mese iran ira adiat inyi seven:

³⁴ etu wit yetpam nadiat sevend, etmu aketo a natimi ahlap um almaijidjid inmocop mese: el et eti apaahni inmocop mese an narasin, um eti ubo inmocop ira arasin; etmu asaig a natimi ahlap mika, et cedag aien: etmu yiri napelumai o un aien, ja par cedag.

³⁵ El et cedag aien, ja par apaahni alupas inmocop mese an narasin;

³⁶ etmu almaijidjid yin a natimi ahlap: ja el et apaahni inmocop mese an narasin, etmu jim ahilek nalau iji ig et yag a natimi ahlap; et has aien.

³⁷ Ja el eh ecetai mika, et eti apaahni inmocop mese, el et lep ateucrad nalau iji ig et apig iran; et mun mah immocop mese, et cedag aien: etmu asaig a natimi ahlap mika et cedag aien.

³⁸ EI et eteuc nuarin inig et atop, ka inheuau ahi, an narasin tah natamaig ka tah intakata;

³⁹ etmu almaijidjid a natimi ahlap: el et ahveuc inheuau ahi an narasin; et uarin ehtilag nigki an narasin; et cedag aien.

⁴⁰ El et isjis numri nidjinin tah natimi, et igpit aien; ja et cedag aien.

⁴¹ El et isjis numri nidjinin uhup, et igpit uhupuhup aien: ja et cedag aien.

⁴² El et eteuc inmocop ahi um cap an nigpit ka an nigpit uhup; naleprose nigki et ateucrad an nigpit, ka an nigpit uhup.

⁴³ Etmu almaijidjid a natimi ahlap: el et ahi um cap nida an mocop an nigpit, ka an nigpit uhup, et idivaig et ateucrad naleprose an narasin;

⁴⁴ et atimi lepros aien, et has aien: etmu asaig a natimi ahlap mika, et has acen aien; et amen inmocop an nidjinin.

⁴⁵ Et wat amen nemehe aleprose iran tah natimi, etmu aso yin aien an napelumai ahpati, um eti adgaig incat, um lep adahpoi narasi nipjineucsen, um ahlaig, um ika, Ek has ainyak, ek has ainyak.

⁴⁶ Inyi has aien irai iji adiat asega inyi amen naleprose iran; et has aien: etmu echim amen aien; etmu amen itac aien va nuarin amen u atimi.

⁴⁷ El et eteuc nemehe aleprose iran tah napelumai, kit nap alau irai siip, ka nap aijema;

⁴⁸ kit et eteuc an ya ahidi ka an ya atgeig; an nap aijema ka an nap alau irai siip; ka an narasi itai, ka an tah nitai er ago an narasi itai;

⁴⁹ el et emilmat ka cap nemehe an napelumai, ka an narasi itai, an ya ahidi ka an ya atgeig, ka an tah nitai, er ago an narasi itai; nemehe aleprose mun nigki, uhmu ehvaig ehele natimi ahlap:

⁵⁰ etmu almaijidjid nemehe a natimi ahlap, um atapnes napelumai inig et amen nemehe iran ira adiat inyi seven:

⁵¹ etu wit yetpam nadiat sevend, etmu almaijidjid nemehe aien: el et apaahni nemehe an napelumai, kit an ya ahidi, ka an ya atgeig, ka an narasi itai, ka an tah nitai er ago an narasi itai; naleprose apaahni mun nigki; et has.

⁵² Etmu atnamud napelumai inig aien et amen nemehe iran, kit et amen an ya ahidi, ka an ya atgeig, an nap alau irai siip ka an nap aijema, ka an tah nitai er ago an narasi itai: naleprose apaahni mun nigki; uhmu atnamud an cap.

⁵³ El et almaijidjid a natimi ahlap, um ecetai mika, et mun eti apaahni nemehe an napelumai, an ya ahidi, ka an ya atgeig, ka an tah nitai er ago an narasi itai;

⁵⁴ etmu asaig a natimi ahlap mika, eri yiri napelumai inig et amen iran nemehe, etmu aketo aien um atapnes ira adiat inyi seven:

⁵⁵ uhmu yiri napelumai inig et amen nemehe iran, ja etmu aketo a natimi ahlap um almaijidjid: el et eti eche nago iran nemehe, um eti apaahni nemehe; et has; namu atnamud aiek an cap; naleprose apaahni nigki, kit et amen an ya ahidi, ka an ya atgeig:

⁵⁶ El eh yiri, etmu lep almaijidjid a natimi ahlap, el et almoi aien mika et apig tintin; etmu asjamud nuarin inig aien an napelumai, ka an narasi itai, ka an ya ahidi, ka au ya atgeig:

⁵⁷ el et ateucrad an napelumai, an ya ahidi, ka an ya atgeig, ka an tah nitai er ago an narasi itai; naleprose apaahni nigki: namu at-namud napelumai inig an cap aiek et amen nemehe iran.

⁵⁸ El et yiri tah napelumai aiek, ka inya ahidi, ka inya atgeig, ka tah nitai er ago an narasi itai, el et edoaijaig iran nemehe, uhmu aketo um yiri, ja etpu cedag.

⁵⁹ Intas alep nigki va nemehe aleprose an tah nap alau irai siip, ka nap aijema, an ya ahidi, ka an ya atgeig, ka an tah nitai er ago an narasi itai, va uhpu asaig mika, et cedag, ka asaig mika, et has.