Levitikus 12 - Intas Etipup

Nuarin tas alupas 12.

1 Nago adicinadicin vaig u ilpu takata va nopos vaig u ilpu hal ura. 6 Niji itai ahlap u intakata et ethi va nago adicinadicin vaig o un.

¹ IS tas a Ihova ehele Moses, um ika,

² Namu tas aiek ehele nup Isreel, um ika, El et opoc tah intakata, um apos inhalav atamaig: etpu has aien ira adiat inyi seven; et idivaig et has aien ira adiat u nechim amen vaig o un va nemehe iran.

³ Ja etu wit eteuc nadiat inyi eet irai inhalav, uhmu ago naperitome iran.

⁴ Ja etmu echim amen aien, mika yi adicinadicin aien, ira adiat inyi dirte im dri; etmu jim ubli tah nitai itap aien, um jim apan an nuarin itap, um imihum pan an nopan iyehki etpu ti pan itac nadiat iji ehki uhpu ago upene yin iran.

⁵ El et apos inhalav atahig aien, etmu has aien irai wiik inyi ero, et idivaig an nechim amen vaig o un: ja etmu echim amen aien, mika yi adicinadicin aien, ira adiat inyi sikste im siks.

⁶ Etu wit ti pan itac nadiat iji ehki uhpu ago upene yin iran, vai inhalav atamaig ka inhalav atahig, etmu imiapan ehele natimi ahlap inhakli siip yi ethi aien, et eteuc inmesese et ethi iran, uri nitai ahlap atnamud, im inhakli nucip ka nalaupa, par itai ahlap va nedo has, an neucse neom er asjapicnaig o un:

⁷ etmu ahlap iran aien an nuhup u Ihova, um adahpoi nedo has o un; ja etpu adicinadicin aien va napos vaig inhal o un. Intas alep nigki vai yin et apos natamaig aien ka natahig.

⁸ Ja el et ehka vai yin nimiapam vaig inhakli siip, etmu imiapam inhakli nalaupa inyi ero aien, ka inhakli nucip inyi ero; inyi itai ahlap atnamud et ethi, ja inyi itai ahlap va nedo has et ethi: etmu ahlap vai yin a natimi ahlap, ja etpu upene aien.