Levitikus 11 - Intas Etipup

Nuarin tas alupas 11.

1 Nitai eklim, edo irai pece iji ig eri caig, 4 eri jim, caig. 9 Im niji mu. 13 Im lep niji man. 29 Nitai atahas iji ig era has.

¹ IS tas a Ihova ehele Moses im Eron, um ika ehele rau,

² Arumu tas ehele nup Isreel aijaurau, um ika, Akumu hegaig nitai eklim edo irai pece iji igki aijaua irai iji itai eklim edo irai pece asega an nobohtan.

³ Akumu hegaig nitai iji igki aijaua et imhagro nupseduon, um asjages, irai iji itai eklim edo irai pece.

⁴ Jam jim hegaig nitai iji igki, irai iji itai eklim edo irai pece et asjages, ka imhagro nupseduon: nan, kamela, et asjages, jam eti imhagro nupseduon; et has vai caua.

⁵ Im rabit, et idim asjages, jam eti imhagro nupseduon; et has vai caua.

⁶ Im heer, et idim asjages, jam eti imhagro nupseduon; et has vai caua.

⁷ Im picad, et idim imhagro nupseduon, ja et eti asjages; et has vai caua.

⁸ Akumu jim hegaig nohura aijaua, um jim ubli nohura emesmas; et has vai caua.

⁹ Akumu hegaig nitai iji igki aijaua irai iji itai umumoh asega et amen an jap ka inwai: akumu hegaig nitai iji igki aijaua et eteuc naran im ninehen, irai wai, im injap, im nofowai.

¹⁰ Ja inyi has vai caua nitai iji igki asega et eti eteuc naran im ninehen an jap, im nofowai, irai iji itai asega et atga an jap, im niji itai umumoh et amen irai wai:

¹¹ inyi idim has vai caua nitai iji igki; akumu jim hegaig nohura aijaua, inyi lep has vai caua nohura emesmas.

¹² Inyi has vai caua nitai iji igki asega et ti naran im ninehen.

¹³ Inyi lep has vai caua nitai iji igki irai man; uhmu jim hegaig, et idim has: nan, inmeijeop alupas, im inmeijcop emda, im ospre,

¹⁴ im vultur, im fakon, im niji itai et idivaig;

¹⁵ im niji reven asega, im niji itai et idivaig;

¹⁶ im ostrij, im nalidmot, im kuku, im inmeijcop, im niji itai et idivaig,

¹⁷ im inhakli nalidmot, im kormorant, im nalidmot alupas,

¹⁸ im swan, im pelikan, im vultur ahi,

¹⁹ im stork, im inpaig, im niji itai et idivaig, im intauoc, im nekrai.

²⁰ Im niji itai asega et acrac, um atga an nikman im neduon, inyi has vai caua.

²¹ Ja uhmu hegaig niji itai acrac et ae um atga an nikman im neduon, um opra neduora mika yi aliaujai iran an nobohtan;

²² akumu hegaig nitai iji igki aijaua, nan, inheled, im niji itai et idivaig, im inheled inig et igpit, im niji itai et idivaig, im naijiv im niji itai et idivaig.

²³ Ja inyi has vai caua niji itai acrac asega et eche, et ae um atga an nikman im neduon.

²⁴ Akupu has aijaua va nitai iji igki: el et ubli nohura emesmas tah, inyi has aien um yetpan an jupura.

²⁵ El et apos tah inuarin nohura emesmas tah, etmu yiri napelumai o un aien, ja etpu has aien um yetpan an jupura.

²⁶ Inyi has vai caua niji itai eklim edo irai pece emesmas asega et eti imhagro upene nupseduora, um eti asjages: el et ubli ra tah, etpu has aien.

²⁷ Inyi has vai caua nitai iji igki asega, irai iji itai eklim edo irai pece asega, et atga an nikman im neduon et amen nupsikman im nupseduon iran: el et ubli nohura emesmas tah, etpu has aien um yetpan an jupura.

²⁸ El et apos nohura emesmas tah, etmu yiri napelumai o un aien, etpu has aien um yetpan an jupura: et has vai caua nitai iji igki.

²⁹ Inyi lep has vai caua nitai iji igki irai iji itai acrac et acrac an nobohtan; nan, wisel, im incedo, im inmopcedo, im niji itai et idivaig,

³⁰ im feret, im napav, im nemisel, im intikia, im mool.

³¹ Inyi has vai caua nitai iji igki irai iji itai asega et acrac: el et ubli nohura emesmas tah, etpu has aien um yetpan an jupura.

³² El et etjose tah nitai iji igki et mas, an tah nitai, etpu has; kit nipjinitai, ka napclumai, ka narasi itai, ka incet itai, el et ipjinitai er ago itai iran, uhmu atise an wai, etpu has um yetpan an jupura, mika yi upene;

³³ El et etjose tah nitai iji igki an tah nipjinitai obohtan, inyi has itai iran; akumu ahtagrei aijaua.

³⁴ Inyi lep has nitai caig asega, et yetpam iran inwai iyehki: inyi lep has nitai umnyi asega er umnyi an nipjinitai iyehki.

³⁵ Inyi lep has nitai iji igki asega et etjose tah inuarin nohura emesmas iran; kit nipjiuru, ka niji uarin ikni ipjiuru iran, uhmu auahas: et has nitai iji igki, inyi lep has vai caua.

³⁶ Ja inyi upene tah inwai ahlau ohua jai, im nehpanwai et amen inwai alupas iran: ja inyi has nitai inigki et atcei pan nohura emesmas.

³⁷ El et lep etjose tah inuarin nohura irai upsi itai er ahwaig inyi eti has.

³⁸ Ja el er atise inwai irai upsi itai, el et etjose iran tah inuarin nohura emesmas, inyi has vai caua.

³⁹ El et mas tah nitai eklim edo irai pece eh caig; aien et ubli nohun mas aien, inyi has aien um yetpan an jupura.

⁴⁰ El et caig nohun mas tah, etmu yiri napelumai o un aien, ja etpu Eas aien um yetpan an jupura: etmu lep yiri napelumai o un aien et apos nohun mas aien, ja etpu has aien um yetpan au jupura.

⁴¹ Inyi lep has vai caua niji itai atahas asega et atahas an nobohtan; uhmu jim hegaig.

⁴² Akumu jim hegaig nitai iji igki aijaua et atahas irai ipjinetgara, im nitai iji igki et acrac an nikman im neduon, ka nitai iji igki et ahinag neduora irai iji itai atahas asega et atahas an nobohtan; era idim has ara.

⁴³ Akumu jim auahas caua aijaua an tah nitai atahas et atahas an nobohtan, um jim auahas caua iran, va aki jim has aijaua.

⁴⁴ Ek Ihova ainyak Atua unyimia: va nitai inigki akumu ago adicinadicin caua aijaua, akumu lep upene aijaua; ek idim upene ainyak: um jim auahas caua an tah nitai atahas et atahas an nobohtan.

⁴⁵ Ek Ihova ainyak, kis iknipagki caua ainyak an pece Ijipt, mika ki Atua unyimia ainyak: akumu lep upene aijaua; ek idim upene ainyak.

⁴⁶ Intas alep va niji itai eklim edo irai pece nigki, im inman, im niji itai umumoh asega et atga an jap, im niji itai umumoh asega et atahas an nobohtan:

⁴⁷ par asjaaicnaig irai iji itai has im niji itai upene, im lep irai iji itai eklim edo irai pece eh caig, im niji itai eklim edo irai pece eh eti caig.