Levitikus 10 - Intas Etipup

Nuarin tas alupas 10.

1 Erau ahlap an cap et eche a Netab im Abaihu, va nedo inigki et auahas rau incap. 6 Er ika yi jim imitaig rau a Eron im ohwat halav atamaig o un. 8 Er ika eri jim umnyi waina a ilpu atimi ahlap an napan ura anliin neom itap. 12 Intas alep vai inhag vaig u nitai caig itap. 16 Intas asuptecnaig u Eron va neti imiaiji intas alep inig o un.

¹ ERUS leh nipjinitai urau urin cap a Netab im Abaihu ohwat hal u Eron, athi um athi, um ati incap iran, um ati nitai auanipin ijinies iran, um ahlap an cap is eche an nuhup u Ihova, is eti asaig ehele rau aien.

² Is ahes incap ehele Ihova, um auahas rau, erus mas arau an nuhup u Ihova.

³ Is ika a Moses ehele Eron, Is asaig intas inigki a Ihova, um ika, Erumu ago nedo ecen vai nyak ara asega era apam ubutpotet ehelek ara, uhmu lep imiahpas nyak an nuhup u atimi asega. Is eti tas a Eron.

⁴ Is ahlaig vai Miseel im Elsafan a Moses, ohwat hal u Usiel etmai Eron, um ika ehele rau, Arumu ham ubutpotet aijaurau, um leh ohwat etwamirau an nuhup u nuarin itap, an nuarin amen u atimi, um imiapan itac rau.

⁵ Erus apan ubutpotet arau, um apos rau ira apelumai urau an nuarin amen u atimi, um imiapan itac rau; is idivaig is asaig a Moses.

⁶ Is ika a Moses ehele Eron im lep ehele Eliesar im Idamar ohwat hal o un, Ehtijmu jim iknipagki incat adgaig unyimitaij aijautaij, um jim ahpati napelumai unyimitaij; vai ehtiji jim mas aijautaij, um lep yetpam intavaitap ira atimi asega: ja erumu taigtaig a ilpu etwamia, nup Isreel asega, van cap inigki et mun atni a Ihova.

⁷ Ehtijmu jim alau ijo aijautaij an neucse neom er asjapicnaig o un vai ehtiji jim mas aijautaij: et amen iramitaij narakei aspi u Ihova. Ehtijis ago ahtaij is idivaig intas o Moses.

⁸ Is tas a Ihova ehele Eron, um ika,

⁹ Namu jim umnyi waina ka kava aiek, im ohwat hal unyum, ahtij wit apan aijautaij anliin neom er asjapicnaig o un, vai jim ehtiji mas aijautaij: intas alep imi cautaij im ilpu mapomitaij irai iji mesese nigki:

¹⁰ mika aki asjaaicnaig aijaua irai itai iji igki et itap um eti itap, im nitai iji igki et upene um has;

¹¹ va akupu esege imi nup Isreel aijaua intas alep asega imi ra is asaig a Ihova ehele Moses.

¹² Is ika a Moses ehele Eron, im lep ehele Elieser im Idamar, ohwat hal o un erus umoh arau, Ehtijmu leh nitai caig et eled aijautaij er ahlap iran irai iji itai ahlap vai Ihova er ago an cap, um caig pan an nareto et ti leven iran an nahaijin natau: et idim itap esjilid:

¹³ ehtijmu caig aijautaij an nuarin itap, nuarin imtam im lep imi ohwat hal unyum nigki irai iji itai ahlap vai Ihova er ago an cap: et um uce intas alep eris asaig ehelek.

¹⁴ Akumu lep caig neduon ritin er ohaig jipe im neuhlin er alcacsei an nuarin upene; aiek, im ohwat halav atamaig unyum, im ilpu halav atahig unyum: nuarin imtam im lep imi ilpu hal unyum nigki irai iji itai ahlap naaurinig u nup Isreel.

¹⁵ Erumu imiapam neuhlin er alcacsei ara im neduon ritin er ohaig jipe im lep niji itai ahlap ira agako er ago an cap, um ohaig jipe mika yi itai ahlap ohaig jipe an nuhup u Ihova; nuarin imtam im lep imi ilpu hal unyum nigki irai iji mesese van tas alep; et idivaig is asaig a Ihova.

¹⁶ Is ahilek emda nanin inig a Moses eris ahlap iran va nedo has, ja eris idim atnamud: is edemda aien vai Eliesar im Idamar, ohwat hal u Eron, erus umoh arau, um ika,

¹⁷ Ehtaij mun a uri aijautaij par eti caig nitai ahlap va nedo has an nuarin itap, et idim itap esjilid, is alupai cautaij a Atua mika ehtiji iknipagki nedo has o atimi aijautaij, um ahlap va nedo has ura an nuhup u Ihova?

¹⁸ Eh mun eti imiapam inja iran an nuarin itap: is upene vai cautaij incaig vaig an nuarin itap, et idivaig kis asaig ainyak.

¹⁹ Is ika a Eron ehele Moses, Erau mun ahlap arau an nadiat inigki an nitai ahlap va nedo has, im nitai ahlap atnamud, an nuhup u Ihova; ja et mun yetpam irak nitai iji igki: el ek mun caig nitai ahlap va nedo has ainyak an nadiat inigki, el et mun eti upene an nuhup u Ihova.

²⁰ Is wat atahaijeg intas o un a Moses, is eropse inliinmopon aien.