Levitikus 1 - Intas Etipup

Nuarin tas alupas 1.

1 Nitai ahlap er atnamud, 3 irai kurimatau, 10 irai siip, 14 irai man.

¹ IS ahlaig vai Moses a Ihova, um tas ehelen an neom er asjapicnaig o un, um ika,

² Namu tas aiek ehele nup Isreel, um ika ehele ra, El et imiapam nitai ahlap vai Ihova tah natimi iramia, akumu imiapam kurimatau ka siip aijaua irai iji itai eklim edo irai pece unyimia, um ahlap iran.

³ El et ahlap aien an nitai ahlap atnamud irai kurimatau o un, etmu ahlap aien an natamaig et ti nitai has iran: etmu ispun ahlap iran aien an neucse neom er asjapicnaig o un an nuhup u Ihova.

⁴ Etmu ati nikman ijinies an nidjinin nitai ahlap atnamud aien; ja etpu upene inliinmopoi Atua vai yin, uhpu leh iran nitai adahpoi nedo has o un.

⁵ Etmu atgei kurimatau atamaig iyehki aien an nuhup u Ihova: erumu lep imiapam inja iran a ilpu atimi ahlap, ilpu hal u Eron marom, um ohaig an natau um arehed an neucse neom er asjapicnaig o un.

⁶ Etmu ahosji nitai ahlap atnamud aien, um ehtoplecoplec.

⁷ Erumu ati incap an natau a ilpu hal u Eron natimi ahlap, um ikni upene cai an cap:

⁸ erumu ikni upene niji uarin a ilpu atimi ahlap, ilpu hal u Eron, im nidjinin, im nagako, ijinies irai cai an cap an natau:

⁹ ja etmu yiri nauitin im neduon an wai aien: etmu lep atnamud asega a natimi ahlap an natau, mika yi itai ahlap atnamud, nitai ahlap er ago an cap, nitai auanipin upene vai Ihova.

¹⁰ El et ahlap aien irai itai eklim edo irai pece, nikavaig, siip, ka nanin, nitai ahlap atnamud; etmu imiapam natamaig aien et ti nitai has iran.

¹¹ Etmu atgei aien an nahaijin natau inig et ahes narutu iran an nuhup u Ihova: erumu lep ohan ja iran an natau um arehed a ilpu atimi ahlap, ilpu hal u Eron.

¹² Etmu ehtoplecoplec asega aien, im lep nidjinin im nagako iran: etmu lep ikni upene a natimi ahlap ijinies irai cai an cap an natau:

¹³ ja etmu yiri nauitin im neduon an wai aien: etmu lep imiapam asega a natimi ahlap, um atnamud an natau: nitai ahlap atnamud nigki, nitai ahlap er ago an cap, nitai auanipin upene vai Ihova.

¹⁴ El et ahlap vai Ihova aien an nitai ahlap atnamud irai man, etmu imiapam nitai ahlap o un aien nucip ka inhaklin nalaupa.

¹⁵ Etmu imiapam u natau a natimi ahlap, um asvamud nidjinin, um atnamud an natau; ja uhmu tili inja iran an nahaijin natau:

¹⁶ etmu lep aresei aien um ahesgin, um ethaig an nahaijin natau an ridjai o un, an nuarin u nohpa:

¹⁷ etmu ahtakwai aien im lep nehpan, jam eti ahaig jipe: etmu lep atnamud a natimi ahlap an natau, irai cai an cap: nitai ahlap atnamud nigki, nitai ahlap er ago an cap, nitai auanipin upene vai Ihova.