Josua 9 - Intas Etipup

Nuarin tas alupas 9.

1 Era asjapicnaig a ilpu atimarid, mika eri aat irai up Isreel. 4 Era ago nedo efaifa a nup u Cibeon um leh intas etipup. 16 Er ika eri auanaheca irai iji mesese va nedo ura.

¹ ERIS wat ato nitai iji igki a ilpu atimarid asega u nup u Hed, im nup Emor, im nup u Kenan, im nup u Piris, im nup u Haivai, im nup u Jibus, an nahaijin Jortan igcapam, irai lola edoon, im lep irai iskanse, im lep irai iji uari pece u injap alupas ehnain pan irai Lebanon;

² eris ehras asjapicnaig ara, par ago nedoa vai Josua im nup Isreel, is tup ethi ache inliinmopora ara.

³ Eris wat atahaijeg a nup u Cibeon va nedo o Josua vai Jeriko im Eai,

⁴ Eris ago nedo efaifa ara, um ago naswa va natga ura, um apos incat mohtan irai togke ura, im inhubej itu uri waina, is ruhra, ja eris lep ijei;

⁵ eris lep arore su itu acen irai eduora ara, um aso ra irai apelumai mohtan; is lep mese um alupahod nitai hegaig asega ura.

⁶ Eris apau ehele Josua ara an nuarin amen ura Cilcal, um ika ehelen, im lep ehele nup Isreel, Ecris ahes an pece itac acen aijama; va nitai inigki akumu asa nigpa ehelema aijaua.

⁷ Eris ika a nup Isreel ehele nup u Haivai iji ehki, Kit eka amen ehelema aijaua; et ehka vai cama par asa nigpa ehelemia.

⁸ Eris ika ehele Josua ara, Ecra ilpu aheca unyum aijama. Is ika ehele ra a Josua, Aijaua di aigki? akis ahes eda aijaua?

⁹ Eris asuptecnaig ehelen ara, um ika, Ecris ahes an pece itac acen aijama ilpu aheca unyum, va nidai ihova Atua unyum: ecris atahaijeg intas vai yin aijama, im nedo asega o un an pece Ijipt,

¹⁰ im nedo asega o un vai ohwat atimarid u nup Emor erus amen an nahaijin Jortan igcapan arau, nan, Saihon natimarid an pece Hesbon, im Oc natimarid an pece Besan, is amen Astarod aien.

¹¹ Va nitai inigki eris tas ehelema a ilpu atimi alupas im lep natimi asega an pece unyima, um ika, Akumu apos naswa aijaua va natga unyimia, um apan um aubilid ra, um ika ehele ra, Ecra ilpu aheca unyimia aijama: akumu asa nigpa ehelema aijaua.

¹² Eris tup pam atho nitai caig inigki incama an nopan iyehki, ecris ahes iraili eom unyima aijama um apam par aubilid caua; ja almoi, et mese, um alupahod an nopan inig:

¹³ is lep mat, um ohua waina irai hubej iji igki; ja et idim ruhra: et lep mohtan napelumai unyima im su unyima va natga opra unyima.

¹⁴ Eris leh nahaijin nitai caig ura natimi, jam eti ahilek intas ehele Ihova.

¹⁵ Is asa nigpa ehele ra a Josua, um asan tas o un ehele ra, mika eri umumoh ara: eris lep asan tas aktit ehele ra a ilpu atimi alupas ira atimi.

¹⁶ Eris asa nigpa ehele ra ara, ja is wat ti pan itac nadiat is eseij, eris atahaijeg ara mika eris atimi eblaamnem ura ara, um amen ehele ra.

¹⁷ Eris atga a nup Isreel, um apan irai iji maliyum ura, an nadiat dirt. Inmaliyum ura ji igki, nan, Cibeon, im Kifaira, im Biirod, im Kirjad-jiarim.

¹⁸ Eris eti auud ra a nup Isreel, va nedo o ilpu atimi alupas ura, nikavaig, eris asan tas aktit ura ehele ra ara an nuhup u Ihova Atua u nup Isreel. Eris edemda natimi asega vai ilpu atimi alupas ura.

¹⁹ Ja eris tas ehele atimi asega a ilpu atimi alupas asega, um ika, Ecris asan tas aktit unyima aijama ehele ra an nuhup u Ihova Atua u nup Isreel: va nitai inigki intumu jim auoh tah nedo ira ra akaija.

²⁰ Intupu ago nedo inigki vai ra akaija; erumu umumoh ara, vai yi jim yetpam intavaitap iraija, vai intas upyi asaig uja ehele ra.

²¹ Eris ika ehele ra a ilpu atimi alupas, Erumu umumoh ara; ja erumu arecai ara um athoi wai imi atimi asega; et idivaig intas upyi asaig a ilpu atimi alupas ehele ra.

²² Is ahlaig vai ra a Josua, um ika ehele ra, Akis a uri aijaua par ago nedo efaifa vai cama, um ika, Ecra amen itac acen vai caua aijama; jai eka amen ehelema aijaua.

²³ Etpu erekinman iramia aijaua, akupu ilpu aheca aijaua asega, um arecai um athoi wai va neom u Atua unyak.

²⁴ Eris asuptecnaig ehele Josua ara, um ika, Eris idim asaig ehele ilpu aheca unyum mika, is tas alep ehele Moses a Ihova Atua unyum mika yi alupai caua inpece asega, um auahas nup uran pece asega an nuhup unyimia, va nitai inigki ecris imtitaig aijama vai caua, um ago nedo inigki.

²⁵ Tup aiek marom vai cama, ja ecra amen an nikmam aijama: namu ago nedo inigki vai cama aiek et upene um atoh iram.

²⁶ Is uce nedo o un vai ra, par imiatamai ra vai nup Isreel, va eri jim atgei ra ara.

²⁷ Is ikni ra a Josua an nadiat iyehki mika eri ilpu atimi arecai ara im ilpu atimi athoi wai imi atimi, im lep natau u Ihova, um imihum pam an nopan inig, an nuarin inig etpu anvai aien.