Josua 8 - Intas Etipup

Nuarin tas alupas 8

1 Et ago emda inliinmopoi Josua a Atua. 3 Era imiiris ara um atoraliak Eai vaig. 29 Eh eijcei natimarid iran. 30 Et actaig natau a Josua, 32 um aged intas alep u Atua irai hat, 34 um esvi intas acis yi alwai im intas ahlaijaig.

¹ IS tas a Ihova ehele Josua, um ika, Namu jim imtitaig aiek, um jim auatialidi: namu lucsei ilpu eucsupo asega aiek, um atidai, um aridjipan Eai: ek mun ati natimarid Eai an nikmam ainyak, im ilpu atimi o un, im inmaliyum o un, im uman:

² namu ago nedo iyehki aiek vai Eai im natimarid iran as ago aiek vai Jeriko im natimarid iran: ja akumu lucsei naga iran aijaua, im niji itai eklim edo irai pece vai caua: namu ikni ilpu eucsupo aiek mika eri atpuh ara an nahaijin maliyum itac.

³ Is atidai a Josua im ilpu eucsupo asega par aridjipan Eai: is aniv ilpu atimi emda is dirte dausant (30,000) a Josua, um abraig pan ra an nepig.

⁴ Is tas ehele ra aien, um ika, Akumu atpuh aijaua ubutpotet pan an maliyum, an nahaijin itac: jim apan itac acen vai inmaliyum, jam amen upene:

⁵ ja ekpu apan u inmaliyum ainyak im lep natimi asega ehelek: eru wit ahau cama ara, et idivaig itu, ecrupu aha aijama an nuhup ura,

⁶ (erupu idim apitac cama ara) ja ecrupu eipai pan ra vai in-maliyum aijama; erupu ika ara, Era aha ara vai caija et idivaig itu: va nitai inigki ecrupu aha aijama an nuhup ura.

⁷ Ja akumu atidai an nuarin atpuh unyimia aijaua, um atoraliak inmaliyum: etpu atcijaig imi caua a Ihova Atua unyimia.

⁸ Aku wit atoraliak inmaliyum aijaua, akumu atnamud aijaua: ago aijaua yi idivaig intas alep u Ihova ehelemia. Ek mun idim asaig ehelemia ainyak.

⁹ Is abraig pan ra a Josua: eris apan ara um atpuh, um amen an niblai Bedel im Eai, an nahaijin Eai an nete o un: ja is asjeuc a Josua ehele atimi asega an nepig iyehki.

¹⁰ Is auroauro a Josua um atidai an nuhialeg, um esvi atimi, um uhup ira atimi, um aridjipan Eai, aien im ilpu atimi alupas irai up Isreel.

¹¹ Eris aridjai natimi ago nedoa asega ehelen, um atga, um apan ubutpotet u inmaliyum, um atumop Eai, an nahaijin inig et ahes narutu iran: is eteuc niskanse an nibla ra im Eai.

¹² Is lucsei atimi is faiv dausant aien, um ikni ra mika eri atpuh ara an niblai Bedel im Eai, an nahaijin maliyum an nete o un.

¹³ Eris ikni atimi ara, ilpu eucsupo asega marom, an nahaijin maliyum inig et ahes narutu iran, im lep ra sji ehki eris atpuh ara an nahaijin maliyum an nete o un, ja is par apan a Josua an niskanse an nepig iyehki.

¹⁴ Is wat ato a natimarid an maliyum Eai, eris auroauro ara um atidai an nuhialeg, eris apan natimi an maliyum par ago nedoa vai nup Isreel an nuarin marara, an nuarin nadiat iyehki eris upyi anvai, aien im lep natimi asega o un; ja is eti ato aien mika eris atpuh natimi vai yin an nahaijin maliyum itac.

¹⁵ Eris ago nedo o ilpu atimi er ahlo ra a Josua im nup Isreel asega, um aha an nefalaig an namasacen.

¹⁶ Eris asjapicnaig a nup Eai asega um apitac ra: eris apitac Josua ara, um apan itac acen vai inmaliyum.

¹⁷ Is eti amen tah natimi is ethi irai Eai ka Bedel, eris apitac nup Isreel ara asega: eris udei inmaliyum ara nasalgei vaig, um apitac nup Isreel.

¹⁸ Is tas a Ihova ehele Josua, um ika, Namu adaigjai pan irai Eai inmopul an nikmam; ekpu atcijaig imi euc ainyak. Is adaigjai pan an maliyum inmopul an nikman a Josua.

¹⁹ Eris auroauro a ilpu atimi atpuh, um ahes an nuarin amen ura, is wat adaigjai nikman aien, eris athut ara: eris apan an maliyum ara, um atoraliak, um auroauro um atnamud inmaliyum.

²⁰ Eris easpan itac a nup Eai, um almoi, um ecetai nadran cap an maliyum naridjai vaig an nohatag, is ti nemda ura nahapan vaig an tah nuarin: eris lep ahidai ra natimi iji ehki eris ahapan an namasacen ara, um ahau ra.

²¹ Is wat almoi a Josua im lep nup Isreel asega mika, eris atoraliak inmaliyum ara sji ehki eris atpuh ara, im lep nadran cap u inmaliyum naridjai vaig, eris ahidai ra ara, um auud nup Eai.

²² Eris lep ahes an maliyum ara sji ehki um apan ehele ra; eris amen ara an niblai nup Isreel, eris amen ara an nahaiji ra im lep an nahaiji ra: eris auud ra ara, is eti umoh tah um eti aha tah.

²³ Eris asjiraig natimarid Eai ara is umoh aien, um imiapan yin ehele Josua.

²⁴ Eris auud nup Eai asega a nup Isreel anliin inpece, an namasacen eris ahau pan ra iran ara, eris lep emesmas ara asega an nedoa um atiih, ja eris adumoij pan Eai a nup Isreel asega, um atgei atimi iran irai ij va atimi.

²⁵ Eris emesmas an nadiat iyehki natimi is twelv dausant, ilpu atamaig im ilpu takata, nup Eai asega marom.

²⁶ Is eti asvahteuc nikman iyehki a Josua, is adaigjai inmopul iran aien, um imihum pan an nopan iyehki is auahas ehni nup Eai aien.

²⁷ Eris lucsei kurimatau im naga ache imi ra a nup Isreel an maliyum iyehki, is idivaig intas o Ihova is asaig ehele Josua aien.

²⁸ Is atnamud Eai a Josua, um auahas ehni, is amasacen um imihum pam an nopan inig.

²⁹ Ja is alcinwai natimarid Eai aien an nauincai is ethi um yetpam an jupura: is wat jupura is asaig a Josua mika eri atise nohun an nauincai ara, um ethaig an nefalaig an neucse nathatahau an maliyum, um ehtaigjai ijinies iran niji irai hat alupas, et lep amen an nopan inig.

³⁰ Is actaig natau a Josua imi Ihova Atua u nup Isreel an lolan nedoon Ibal,

³¹ is idivaig is asaig a Moses naheca u Ihova ehele nup Isreel, is idivaig eris aged an nitaasviitai an tas alep u Moses, natau irai hat asega, eris eti alcacsei tah nitai aiurn iran; eris ikni iran niji itai ahlap atnamud vai Ihova, im niji itai ahlap naaurinig.

³² Is aged irai hat iji ehki aien intas alep u Moses, is aged aien an nuhup u nup Isreel.

³³ Eris aiji a nup Isreel asega, im ilpu atimi tas alep ura, im ilpu atimi atau ira ra, im ilpu atimi alupas ura, an nahaijin nelcau im nahaijin, an nuhup u ilpu atimi ahlap, ilpu mapoi Livai marom, eris apos nelcau ara is amen iran intas alep u Ihova, nup urai taka pece, im lep ra eris apos ra an pece ara; eris amen nahaiji ra ehnain pan an lolan nedoon Cerisim, im nahaiji ra ehnain pan an lolan nedoon Ibal; is idivaig is upyi asaig a Moses naheca u Ihova, mika eri asan tas upene vai nup Isreel ara.

³⁴ Is par apitac aien um esvi intas asega an tas alep, intas upene im intas has, et idivaig intas asega eris aged an tas alep.

³⁵ Is eti udei tah intas is ethi a Josua is asaig a Moses, ja is esvi asega aien an nuhup u nup. Isreel asega, im lep ilpu takata,, im ilpu halav, im nup urai taka pece eris ahced ra ara.