Josua 6 - Intas Etipup

Nuarin tas alupas 6.

1 Eh atapnes Jeriko. 2 Et asuptecnaig ehele Josua a Atua par atoraliak iran. 12 Er imiarehed inmaliyum. 17 Er idim ika yi itap vai Atua. 20 Et achadaliekse nathatahau. Er imiatamaig Rehab. 26 Er asan tas ahlaijaig va natimi inig yi lep actaig Jeriko.

¹ ERIS idim atapnes ipjin Jeriko vai nup Isreel: is eti apan itac tah, is lep eti apan iran tah.

² Is tas a Ihova ehele Josua, um ika, Almoi aiek, ek mun ati Jeriko an nikmam ainyak, im natimarid iran, im ilpu atimi emda acen.

³ Akumu arehed an maliyum aijaua, ilpu atimi ago nedoa asega, um ecethi arehed iran. Etmu uce nedo unyimia ira adiat inyi siks.

⁴ Erumu apos intoho inyi seven a ilpu atimi ahlap inyi seven an nuhup u nelcau: ja akumu eceseven arehed an maliyum aijaua an nadiat sevend, erumu lep ahlai toho a ilpu atimi ahlap.

⁵ Eru wit ahlai opra niji toho ara, aku wit lep atahaijeg nohran toho aijaua, erumu auorehrara emda natimi asega; etpu achadaliekse nathatahau an maliyum, erumu lep atga um aridjipan atoh natimi asega.

⁶ Is ahlaig vai ilpu atimi ahlap a Josua inhal u Nun, um ika ehele ra, Akumu apos nelcau aijaua et amen intas alep iran, erumu lep apos intoho et seven a ilpu atimi ahlap et seven, um uhup an nelcau u Ihova.

⁷ Is tas ehele atimi aien, um ika, Akumu apan aijaua, um arehed an maliyum, erumu atga um uhup an nelcau u Ihova a ilpu atimi apos nij va atimi.

⁸ Is tas a Josua ehele atimi, ja eris atga an nuhup u Ihova a ilpu atimi ahlap is seven, um apos intoho is seven, um ahlai intoho iji ehki: ja is apitac ira ra nelcau is amen iran intas alep u Ihova.

⁹ Eris atga um uhup irai ilpu atimi ahlap eris ahlai toho ara a ilpu atimi apos nij va atimi, ja eris apitac an nelcau nahaiji atimi, eris atga a ilpu atimi ahlap, um ahlai toho.

¹⁰ Is tas alep ehele atimi a Josua, um ika, Akumu jim efehtas aijaua, um jim auorehramia, um jim tas, um imihum pan an nadiat iyehki ekpu asaig ehelemia ainyak aki auorehramia; ja akumu auorehramia aijaua an nopan iyehki.

¹¹ Eris ecethi imiatga nelcau u Ihova um arehed an maliyum: ja eris apan ara an nuarin amen ura um asjeuc eahki.

¹² Is auroauro a Josua um aiji an nuhialeg, eris lep apos nelcau u Ihova a ilpu atimi ahlap.

¹³ Eris atga um uhup an nelcau u Ihova a ilpu atimi ahlap is seven, eris apos intoho is seven ara, um ahlai toho iji ehki: eris atga um uhup ira ra a ilpu atimi apos nij va atimi; ja eris apitac an nelcau u Ihova nahaiji atimi, eris atga a ilpu atimi ahlap um ahlai toho.

¹⁴ Eris lep ecethi arehed an maliyum ara an nadiat sekunt, um adumoij an nuarin amen ura: is lep uce nedo ura ira adiat is siks.

¹⁵ Eris auroauro ara um aiji an nuhialeg an nadiat sevend, um eceseven arehed an maliyum is idivaig itu: ja eris eceseven arehed iran ara an nadiat iyehki.

¹⁶ Eris wat eceseven arehed iran ara eris ahlai toho a ilpu atimi ahlap, is lep ika a Josua ehele atimi, Akumu auorehramia aijaua; et mun alupai caua inmaliyum inigki a Ihova.

¹⁷ Et itap vai Ihova inmaliyum inigki im niji itai asega iran: ja etmu umoh a Rehab ache intakata has, im lep ra asega anliin neom o un, va nedo o un, nikavaig, is adenaig natimi erahki aien intis abrai rau akaija.

¹⁸ Akumu lep aminjinaig caua aijaua vaig tah nitai itap; va aki jim auahas caua aijaua, aku wit leh tah nitai itap aijaua, um imi-apam nitai has vai nup Isreel im nohocred.

¹⁹ Et itap vai Ihova silver im colt asega, im nipjiitai bras im aiurn: uhmu ikni an nuarin ikni itai iran va Ihova.

²⁰ Eris wat ahlai toho a ilpu atimi ahlap eris auorehrara natimi: eris wat atahaijeg nohran toho natimi, eris wat lep auorehrara emda natimi, is achadaliekse nathatahau, eris lep aridjai atoh an maliyum natimi asega, eris atoraliak inmaliyum ara.

²¹ Eris ati nedoa ara um auahas ehni niji itai asega an maliyum iyehki, ilpu atamaig, im ilpu takata, im ilpu takuras, im ilpu fatimi, im kurimatau, im siip, im togke.

²² Ja is ika a Josua ehele natimi is ero erahki erus ahilek inpece arau, Arumu apan aijaurau anliin neom u intakata has iyehki, um imialau ijo yin, im niji itai asega o un, et idivaig arus upyi asaig intas aktit ehelen aijaurau.

²³ Erus apan anliin neom ahwat takuras erahki erus ahilek inpece arau, um imialau ijo Rehab, im etman, im risin, im ilpu atamaig iran, im niji itai asega o un; erus imialau ijo ilpu atimi ehpan iran asega arau, um ikni ra an nuarin amen u nup Isreel itac.

²⁴ Eris atnamud inmaliyum iyehki ara, im niji itai asega iran: ja eris ikni silver, im colt, im nipjiitai bras im aiurn ara, an nuarin ikni itai iran an neom u Ihova.

²⁵ Ja is imiatamaig Rehab intakata has a Josua, im ra asega an nimnim u etman, im niji itai asega o un; et amen aien ehele nup Isreel um imihum pam an nopan inig; va nedo o un, nikavaig, is adenaig natimi erahki aien is abrai rau a Josua mika eri ahilek Jeriko arau.

²⁶ Is tas emda a Josua an nopan iyehki, um ika, El et atidai tah natimi um lep actaig inmaliyum Jeriko, etmu erekinman iran aien an nuhup u Ihova: etpu atupun aien an mas u inmeto o un, etpu lep aduwi intapnes aien an mas u inharei o un.

²⁷ Is amen ehele Josua a Ihova; is lep apaahni intas vai yin an pece asega.