Josua 4 - Intas Etipup

Nuarin tas alupas 4.

1 Er ikni atimi et twelv mika eri lucsei inhat et twelv an nauinwai Jortan va nitai imiehva. 9 Eh ikni inhat et twelv et eche an nuarin juju Jortan. 10, 19 Era algaunyi Jortan natimi. 14 Et imiaridjai Josua a Atua. 20 Eh ikni inhat iji ehki et twelv Cilcal.

¹ ERIS algaunyi ehni Jortan natimi asega, ja is par tas a Ihova ehele Josua, um ika,

² Namu aniv natimi et twelv aiek ira atimi, natimi yi ethi an nelcau et ethi,

³ um tas ehele ra, um ika, Akumu lucsei inhat inyi twelv aijaua juju irai Jortan, an nuarin iyehki era mun aiji aktit iran niji eduei ilpu atimi ahlap, um ahelwei, um ikni an nuarin amen unyimia, akupu asjeuc iran aijaua an nepig inigki.

⁴ Is ahlaig a Josua va atimi is twelv iji ehki, is aniv ra aien irai up Isreel, natimi is ethi an nelcau is ethi:

⁵ is tas ehele ra a Josua, um ika, Akumu algaunyi aijaua, um yetpan an nuarin juju irai Jortan an nuhup u nelcau u Ihova Atua unyimia, akumu lep lucsei inhat aijaua asega, um ahelwei, et idivaig niji elcau u nup Isreel:

⁶ inyi itai asjaaicnaig imi caua nigki, eru wit ahodaig a ilpu hal unyimia an taka opan, um ika, Neveh hat iji igki unyimia?

⁷ Akumu asuptecnaig ehele ra aijaua, um ika, Eris athasgi inwai Jortan an nuhup u nelcau is amen iran intas alep u Ihova; eris wat imialgaunyi Jortan, is athasgi inwai Jortan: inyi itai imiehva imi nup Isreel inhat iji igki irai iji mesese.

⁸ Eris ago a nup Isreel is idivaig is asaig ehele ra a Josua, um lucsei inhat is twelv an nuarin juju Jortan, is idivaig is asaig a Ihova ehele Josua, is tup apapa pan irai iji elcau u nup Isreel, um imiapan an nuarin iyehki eris asjeuc iran ara, um ikni eahki.

⁹ Is lep ikni inhat is twelv a Josua juju irai Jortan, an nuarin iyehki eris aiji iran niji eduei ilpu atimi ahlap, eris apos nelcau ara is amen iran intas alep: is amen eahki um imihum pam an nopan inig.

¹⁰ Eris idim aiji juju irai Jortan a ilpu atimi ahlap eris apos nelcau ara, um imihum pan an nopan iyehki eris ago ehni niji itai asega is asaig a Ihova ehele Josua, mika yi asuptecnaig ehele atimi aien, is idivaig niji itai asega is asaig a Moses ehele Josua: eris auroauro natimi um algaunyi.

¹¹ Eris algaunyi ehni natimi asega, ja eris par algaunyi a ilpu atimi ahlap, um apos nelcau u Ihova, an nuhup u atimi asega.

¹² Eris atga um uhup irai up Isreel um apos nij va atimi, a ilpu mapoi Ruben, im ilpu mapoi Cat, im nahaiji ilpu mapoi Manasi, et idivaig is asaig ehele ra a Moses:

¹³ eris algaunyi pan an nuarin marara Jeriko natimi is forte dausant, an nuhup u Ihova, um apos nij va atimi par ago nedoa.

¹⁴ Is ati natimi alupas irai Josua a Ihova an nadiat iyehki an nuhup u nup Isreel asega; eris imtitai yin ara, is idivaig eris imtitai Moses ara, irai iji adiat asega is umoh aien.

¹⁵ Is tas a Ihova ehele Josua, um ika,

¹⁶ Namu asaig ehele ilpu atimi ahlap iji ig aiek, era apos nelcau ara et amen iran intas alep, mika eri ahes Jortan ara um aridjipam.

¹⁷ Is tas a Josua ehele ilpu atimi ahlap, um ika, Akumu ahes Jortan aijaua um aridjipam.

¹⁸ Eris wat ahes Jortan a ilpu atimi ahlap iji ig, eris apos nelcau ara is amen iran intas alep u Ihova, um aridjai, eris wat lep atise nugnya eduora an nobohtan mese a ilpu atimi ahlap, is lep adumoij inwai Jortan an nuarin o un, um atah an nahaijin im lep nahaijin, is idivaig itu.

¹⁹ Eris ahes Jortan natimi, an nadiat tend an mohoc uhup, um atumop Cilcal, an nahaijin Jeriko an ridjai o un.

²⁰ Is ikni eahki Cilcal a Josua inhat is twelv iji ehki, eris lucsei Jortan ara.

²¹ Is tas ehele nup Isreel aien, um ika, Eru wit ahodai etmara an taka opan a ilpu hal unyimia, um ika, Neveh hat iji igki!

²² Akumu asuptecnaig ehele ilpu hal unyimia aijaua, um ika, Eris algaunyi Jortan inigki a nup Isreel an nobohtan mese.

²³ Is ika a Ihova Atua unyimia yi ame inwai Jortan an nuhup unyimia, um imihum pan an nopan iyehki akis algaunyi ehni aijaua, is idivaig is ago a Ihova Atua unyimia an Jap cop, is ika aien yi ame an nuhup uja um imihum pan an nopan iyehki intis algaunyi akaija:

²⁴ mika eri ato natimi asega an nobohtan mika et emda nikmai Ihova: va akupu imtitai Ihova Atua unyimia aijaua irai iji adiat.