Josua 3 - Intas Etipup

Nuarin tas alupas 3.

1 Et yetpan Jortan a Josua. 2 Era asuptecnaig ehele atimi a ilpu atimi alupas va nalgaunyi Jortan. 7 Et ago emda inliinmopoi Josua a Atua. 9 Et ago emda inliinmopoi atimi a Josua. 14 Eh atiakoai sjipe inwai Jortan.

¹ IS auroauro a Josua um aiji an nuhialeg an nadiat dirt; eris ahes Sitim ara um atga ura um yetpan Jortan, aien im lep nup Isreel asega, um asjeuc eahki ja par algaunyi.

² Is wat ti pan itac nadiat is eseij, eris atga ehele atimi a ilpu atimi alupas;

³ eris tas ehele atimi ara, um ika, Aku wit almoi ilpu atimi ahlap aijaua, ilpu mapoi Livai, napos vaig nelcau et amen iran intas alep u Ihova Atua unyimia, akumu apan an taka uarin aijaua, um apitac iran.

⁴ Ja uhmu apohod jipe an niblamia im lep iran, et idivaig kubit et tu dausant eh wat asjaaicnaig: jim apan ubutpotet o un, mika aki ato aijaua nefalaig inig aki atga iran aijaua: akis eti upyi atga an nefalaig inigki aijaua.

⁵ Is tas a Josua ehele atimi, um ika, Akumu imiyecrei caua aijaua: etpu ago niji itai imiali a Ihova an nuhup unyimia imraig.

⁶ Is tas ehele ilpu atimi ahlap a Josua, um ika, Akumu apos nelcau et amen intas alep iran aijaua, um algaunyi, um atga uhup ira atimi. Eris leh nelcau is amen intas alep iran ara, um atga um uhup ira atimi.

⁷ Is tas a Ihova ehele Josua, um ika, Ekpu atupun ainyak an nadiat inigki, um atijai natimi alupas unyum an nuhup u nup Isreel asega, mika eri ato ara mika ek amen ehelum ainyak, et idivaig kis amen ehele. Moses ainyak.

⁸ Namu tas ehele ilpu atimi ahlap aiek era apos nelcau ara et amen intas alep iran, um ika, Aku wit yetpan an nohmun wai Jortan aijaua, akumu aiji i Jortan aijaua.

⁹ Is ika a Josua ehele nup Isreel, Apam igcaki aijaua um atahaijeg intas o Ihova Atua unyimia,

¹⁰ Is tas a Josua, um ika, Akupu ato aijaua mika, et amen ehelemia a Atua umoh, etpu lep ahlo nup u Kenan an nuhup unyimia aien, im nup u Hed, im nup u Haivai, im nup u Piris, im nup u Circas, im nup Emor, im nup u Jibus.

¹¹ Er idim imiatga pan Jortan nelcau et amen iran intas alep o Ihova an nobohtan asega, an nuhup unyimia.

¹² Akumu aniv atimi inyi twelv irai iji elcau u nup Isreel natimi yi ethi an nelcau et ethi.

¹³ Eru wit atise nugnya eduora an wai Jortan a ilpu atimi ahlap era apos nelcau u Ihova ara, Natimarid an nobohtan asega, uhpu athasgi inwai Jortan an nahaijin itaho; etpu lep ahga, um ehlaujai ijinies.

¹⁴ Eris ahes irai eom atga ura natimi par algaunyi Jortan, eris lep apos nelcau is amen iran intas alep a ilpu atimi ahlap an nuhup u atimi;

¹⁵ ja eris wat yetpan Jortan ara sji ehki eris apos nelcau ara, eris wat atise neduora an wai a ilpu atimi ahlap eris apos nelcau ara; (et idim ahgarero Jortan um atah au nahaijin im lep nahaijin an nopan er asjapicnaig nohwai itai iran asega,)

¹⁶ is amen inwai is ahes itaho, um ahga, um ahlaujai ijinies, is itac acen pan u inmaliyum Atam, ubutpotet pan Saretan: is lep ame um tiih inwai um yetse pok an jap an nuarin marara, injap acen marom: eris wat algaunyi natimi um yiaspan Jeriko.

¹⁷ Eris aiji aktit an nobohtan mese juju irai Jortan a ilpu atimi ahlap, eris apos nelcau ara is amen iran intas alep u Ihova, eris lep atga an nobohtan mese a nup Isreel asega, um imihum pan an nopan iyehki eris algaunyi Jortan natimi asega.