Josua 24 - Intas Etipup

Nuarin tas alupas 24.

1 Et asjapicnaig nup urai iji elcau Sikem a Josua. 2 Intas ipjidipjid vai nedo aiheuc u Atua ahes irai Tira. 14 Et lep aketo a Josua, um ika eri asan tas etipup ehele Atua ara. 26 Et aduwi inhat aien mika yi itai asjaaicnaig vai intas etipup ura. 29 Niji mesese irai Josua, inmas o un, era atelmoi yin ara. 32 Era atelmoi niji eduei Josef ara. 33 Et mas a Eliesar.

¹ IS asjapicnaig nup Isreel asega Sikem a Josua, um ahlaig vai ilpu atimi aminjinaig atimi u nup Isreel, im ilpu atimi alupas ura, im ilpu atimi tas alep ura, im ilpu atimi esjilid ura; eris aiji an nuhup u Atua ara.

² Is ika a Josua ehele atimi asega, Et mun ika a Ihova Atua u nup Isreel, Eris amen a ilpu retpomia an nahaijin nofowai igcapan itu acen, um yetpan Tira etmai Ebraham, im etmai Nehor: eris lep aheca u ilpu atmas u nup urai pece ara.

³ Kis atipagki etpomia Ebraham ainyak au nahaijin nofowai igcapan, um atau iran an pece Kenan asega, um asaig mika eri ahinag a ilpu mapon, um alupai yin Aisak.

⁴ Kis lep alupai Aisak ainyak Jekob im Isa: kis alupai Isa nedoon Sier ainyak mika yi ohuun aien; ja eris asuol pan Ijipt a Jekob im ilpu hal o un.

⁵ Kis abrai Moses im Eron ainyak, um atijai nohocred irai up Ijipt, an nedo iyehki kis ago vai ra ainyak: ja kis apitac ainyak um iknipagki caua.

⁶ Kis iknipagki ilpu retpomia an pece Ijipt ainyak: akis ham u injap aijaua; eris lep ahau ilpu retpomia a nup Ijipt irai jariot im ilpu eucsupo ateuc irai hors um yetpan an Jap cap.

⁷ Eris wat ahlaig vai Ihova ara, is ati inmehcim aien an niblamia im nup Ijipt, um imiapam injap ira ra um adahpoi ra; akis almoi nedo unyak Ijipt aijaua: akis lep amen an namasacen aijaua is itu iramia.

⁸ Kis imiapam caua ainyak an pece u nup Emor, eris amen ara an nahaijin Jortan igcapan; eris ago nedoa vai caua ara: kis ikni ra irai ikmamia ainyak, va akupu ohuun inpece ura aijaua; kis auahas ra ainyak an nuhup unyimia.

⁹ Is lep atidai vai caua a Belak inhal u Sipor, natimarid u nup u Moab, um ago nedoa vai nup Isreel, um abra atimi um imiacaij Belam inhal u Bior mika yi asan tas ahlaijaig vai caua aien:

¹⁰ ja kis eti atahaijeg intas o Belam ainyak; va nitai inigki is asan tas acis yi alwai caua aien: kis imiatamaig caua vai nikman ainyak.

¹¹ Akis algauwaig Jortan aijaua um yetpan Jeriko: eris ago nedoa vai caua a nup u Jeriko, im nup Emor, im nup u Piris, im nup u Kenan, im nup u Hed, im nup u Circas, im nup u Haivai, im nup u Jibus; kis ikni ra irai ikmamia ainyak.

¹² Kis abraig pan inpak irai lag alupas um has ainyak, eris uhup iramia ara, um ahlo pan ra an nuhup unyimia, nikavaig, ohwat atimarid erahki u nup Emor; ja akis eti ago aijaua irai ij va atimi unyimia.

¹³ Kis alupai caua inpece ainyak akis eti auritai vaig aijaua, im niji maliyum akis eti ago neom iran aijaua, akis lep amen iran aijaua; eka lep caig nohwai itai aijaua iraili okoro vaine im nokoro oliv akis eti ahwaig aijaua.

¹⁴ Va nitai inigki akumu imtitai Ihova aijaua, um aheca o un an liinmopomia inveijec um upene: um atcijaig ilpu atmas iji ehki eris aheca ura a ilpu retpomia an nahaijin nofowai igcapan, im lep an pece Ijipt; um aheca u Ihova.

¹⁵ Ja eh et eti upene iramia par aheca u Ihova, akumu asaig aijaua aji nadiat inigki mika aki aheca u di aijaua: kit ilpu atmas iji ehki eris aheca ura a ilpu retpomia an nahaijin nofowai igcapan, ka ilpu atmas u nup Emor eka amen an pece ura aijaua: ja ekpu idim aheca u Atua ainyak im lep ra an nimnim unyak.

¹⁶ Eris tas natimi, um ika, Ecrupu idim eti udei Ihova aijama, um aheca u ilpu atmas u nup urai pece;

¹⁷ is idim iknipagki caija imi ilpu retpoija a Ihova Atua uja an pece Ijipt, nuarin u nauanaheca uja, um ago niji itai asjaaicnaig esjilid iji ehki an nuhup uja, um aminjinaig caija an nefalaig asega intis atga iran akaija, im lep va atimi asega intis ahtaregdei ra akaija:

¹⁸ is ahlo atimi asega an nuhup uja a Ihova, nup Emor marom eris amen an pece ara: va nitai inigki ecrupu lep aheca u Ihova aijama: et idim Atua uja aien.

¹⁹ Is ika a Josua ehele atimi, Et ehka vai caua naheca u Ihova vaig: et Atua upene aien; et lep idivaig nedemda u natimi oporei nedemda u Atua; inyi eti iknipagki nedo has unyimia aien im nauatatimi unyimia.

²⁰ El eka udei Ihova aijaua, um aheca u ilpu atmas u nup urai pece, etpu ahidai yin pan ehelemia aien, um atijai nohocred iramia, um auahas caua, ja is upyi hup aien um ago nedo upene vai caua.

²¹ Eris ika natimi ehele Josua, Oʼo; ecrupu idim aheca u Atua aijama.

²² Is ika a Josua ehele atimi, Eka ato nedo unyimia aijaua, nikavaig, eka mun asaig aijaua mika akupu aheca u Ihova aijaua. Eris ika ara, Ecra ato aijama.

²³ Va nitai inigki, is ika aien, akumu atcijaig ilpu atmas u nup urai pece iramia aijaua, etmu lep aiyu inliinmopomia aijaua vai Ihova Atua u nup Isreel.

²⁴ Eris ika natimi ehele Josua, Ecrupu aheca u Ihova Atua uja aijama, um imiaiji intas o un.

²⁵ Is idim asan tas etipup ehele atimi asega a Josua an nadiat iyehki, um ati intas alep im intas aktit imi ra Sikem.

²⁶ Is aged intas iji igki a Josua an nitaasviitai is amen intas alep u Atua iran, um leh inhat alupas, um aduwi eahki ithan cai alupas, is amen ubutpotet pan u neom itap u Ihova.

²⁷ Is ika a Josua ehele atimi asega. Almoi, inyi itai asjaaicnaig vai caija inhat inigki; et mun atahaijeg intas asega u Ihova is tas aien eheleija: inyi lep itai asjaaicnaig vai caua, va aki jim udei Atua unyimia aijaua.

²⁸ Is lep adcijaig atimi a Josua, mika eri atga ura ara, um apan irai uarin amen ura, athi um athi ehni.

²⁹ Is wat ti pan itac nitai iji igki, is mas a Josua inhal u Nun, naheca u Ihova, is eteuc iran inmesese is wun huntret im ten.

³⁰ Eris atelmoi yin Timnad-sira ara an nahaijin pece o un, an nedoon Ifreem, an nahaijin nedoon Ceas an nuarin inig et ahes narutu iran.

³¹ Eris aheca u Atua a nup Isreel ira adiat asega u Josua, im lep ira adiat asega u ilpu atimi alupas iji ehki is uhup a Josua um mas ja eris par apitac ara, eris lep ato nedo asega u Ihova vai nup Isreel.

³² Im lep niji eduei Josef, eris atipagki Ijipt a nup Isreel um leh pam, eris atelmoi ara Sikem, an nuarin nobohtan inig is auanimtan a Jekob ehele ilpu hal u Hemor etmai Sikem irai uari silver is wun huntret: eris lep ohuun a ilpu mapoi Josef.

³³ Is mas a Elieser inhal u Eron; eris lep atelmoi yin ara an nedoon inig is ohuun a Finehas inhal o un, eris alupai yin au nedoon Ifreem.