Josua 23 - Intas Etipup

Nuarin tas alupas 23.

1 Et wat efatimi a Josua et ahugni ra aien, 3 va nedo upene u Atua an nopan iyehki, 5 vai intas upyi asaig o un, 11 im lep vai intas aruvaig o un.

¹ IS alupai nup Isreel nitai atumop vai ilpu atimi tak atimi asega ira ra a Ihova, ja is ti pan itac inmesese is ahinag, is efatimi a Josua an nopan iyehki um ahinag inmesese iran.

² Is asjapicnaig nup Isreel asega a Josua, im ilpu atimi aminjinaig atimi ura, im ilpu atimi alupas ura, im ilpu atimi tas alep ura, im ilpu atimi esjilid ira ra, um ika ehele ra, Ek efatimi ainyak um ahinag inmesese irak:

³ akis almoi aijaua nedo asega u Ihova Atua unyimia vai nup urai pece iji igki asega vai caua; is idim ago nedoa unyimia a Ihova Atua unyimia.

⁴ Kis ahaig iramia ainyak inpece iji igki et amen irai itai asjaaicnaig, mika aki ohuun aijaua et idivaig ilpu eteuc iramia; im lep niji pece asega kis auahas atimi iran ainyak, nahes vaig Jortan um yet pan an jap alupas an nete o un.

⁵ Etpu atcijai ra an nuhup unyimia a Ihova Atua unyimia, um ahlo ra an nuhup unyimia; akupu ohuun inpece ura aijaua, et idivaig is asaig ehelemia a Ihova Atua unyimia.

⁶ Akumu emda aijaua um apos um ago niji itai asega eris aged an tas alep u Moses, um jim ahidaig pan caua iran an matamia ka au mauumia;

⁷ va aki jim tup ethi ache pan irai up urai pece iji igki aijaua era amen ehelemia ara; um jim anvi nidai ilpu atmas ura, um jim asan tas aktit unyimia vai ra, um jim aheca ura, um jim atpuse an nuhup ura:

⁸ jam apol irai Ihova Atua unyimia, et idivaig akis ago aijaua um imihum pam an nopan inig.

⁹ Is ahlo nup urai pece alupas um emda an nuhup unyimia a Ihova: is eti emda tah natidai vaig an nuhup unyimia um imihum pam an nopan inig.

¹⁰ Etpu ahau atimi inyi wun dausant a natimi yi ethi iramia: et idim ago nedoa unyimia a Ihova Atua unyimia; et idivaig is upyi asaig ehelemia aien.

¹¹ Akumu aminjinaig caua aijaua, va etpu aiyu inliinmopomia aijaua vai Ihova Atua unyimia.

¹² Ja el eka adumoij aijaua um apol ira ahaiji up urai pece iji igki era amen ehelemia ara, um asaig natmehgan ehele ra, um apan ehele ra, um lep apam ehelemia ara:

¹³ akumu ato aijaua mika inyi idim eti ahlo tah natimi irai uari pece iji igki an nuhup unyimia a Ihova Atua unyimia; ja erupu opoig vai caua ara, um itai epihtau, um itai aredei ira ahaijimia, um itai upunupun irai esgaiimtamia, um imihum pan an nopan iyehki akupu emesmas aijaua an pece upene inigki is alupai caua a Ihova Atua unyimia.

¹⁴ Ekpu lep apan ainyak an nefalaig u atimi asega an nadiat inigki: eka lep idim ato upene aijaua mika, is eti takitai tah nitai et ethi irai iji itai upene asega is asaig a Ihova Atua unyimia vai caua; is yetpam iramia nitai iji ehki asega, is eti etjose tah.

¹⁵ Is idim yetpam iramia niji itai upene asega is upyi asaig ehelemia a Ihova Atua unyimia; et idim uco etpu imiapam vai caua niji itai has asega a Ihova, um imihum pan an nopan iyehki etpu auahas caua aien an pece upene inigki is alupai caua a Ihova Atua unyimia.

¹⁶ Aku wit imipalea intas alep u Ihova Atua unyimia aijaua, is asaig ehelemia aien, um apan um aheca u ilpu atmas u nup urai pece, um atpuse an nuhup ura; etpu atavaitap vai caua a Ihova, akupu lep auroauro aijaua um emesmas an pece upene inig is alupai caua aien.