Josua 22 - Intas Etipup

Nuarin tas alupas 22.

1 Et asan tas acis yi alwai nup urai elcau et ero im nahaiji elcau a Josua, um adcijai ra mika eri apan iraili eom ura ara. 10 Era actaig natau va nitai asjaaicnaig ara an natga ura. 11 Era auahas inliinmopoi nup Isreel vaig ara. 21 Era asuptecnaig upene ehele ra ara.

¹ IS asjapicnaig ilpu mapoi Ruben, im ilpu mapoi Cat, im nahaiji ilpu mapoi Manasi, a Josua,

² um ika ehele ra, Akis apos intas asega u Moses naheca u Ihova ehelemia aijaua, im lep imiaiji intas asega unyak ehelemia:

³ akis eti udei ilpu etwamia aijaua itu acen um imihum pam an nopan inig, jam apos intas is asaig a Ihova Atua unyimia.

⁴ Ja era amen upene a ilpu etwamia an nopan inig vai Ihova Atua unyimia, et idivaig is upyi asaig ehele ra aien: va nitai inigki akumu adumoij aijaua, um apan iraili eom unyimia an pece unyimia iyehki, is alupai caua a Moses naheca u Ihova an nahaijin Jortan igcapan.

⁵ Jam aminjinaig caua um imiaiji intas alep inig is asaig ehelemia a Moses naheca u Ihova, nikavaig, etmu aiyu inliinmopomia aijaua vai Ihova Atua unyimia, um ago nedo asega o un, um apos intas alep o un, um apol iran, um aheca o un an liinmopomia asega, im lep an nemda asega unyimia.

⁶ Is asan tas acis yi alwai ra a Josua, um adcijai ra: eris atga ura ara um apan iraili eom ura.

⁷ Is idim alupai nahaiji ilpu mapoi Manasi inpece Besan a Moses; ja is alupai nahaiji ra is eche a Josua an nahaijin Jortan igcapam an nete o un ehele ilpu etwara. Is lep adcijai ra a Josua mika eri apan iraili eom ura, ja is par asan tas acis yi alwai ra,

⁸ is lep tas ehele ra aien, um ika, Akumu adumoij pan iraili eom unyimia aijaua, um lucsei inpadiaig et ahinag, im kurimatau et ahinag, im silver, im colt, im bras, im aiurn, im napelumai et ahinag: akumu ahaig enele ilpu etwamia nitai iji igki akis atoraliak ehele ilpu atimi tak atimi iramia aijaua.

⁹ Eris adumoij a ilpu mapoi Ruben, im ilpu mapoi Cat, im nahaiji ilpu mapoi Manasi, um udei nup Isreel Sailo, an pece Kenan, um apan an pece Cileat, inpece eris ohuun ara, is idivaig is asaig a Ihova irai Moses.

¹⁰ Eris wat yetpan an nahaijin Jortan ara an pece Kenan, eris actaig natau eahki a ilpu mapoi Ruben, im ilpu mapoi Cat, im nahaiji ilpu mapoi Manasi, natau alupas va uhpu ecetai.

¹¹ Eris atahaijeg a nup Isreel mika eris actaig natau an nahaijin Jortan an pece Kenan a ilpu mapoi Ruben, im ilpu mapoi Cat, im nahaiji ilpu mapoi Manasi, an nuarin iyehki era algauwaig iran a nup Isreel.

¹² Eris wat ato a nup Isreel, eris asjapicnaig a nup Isreel asega Sailo, mika eri apan ara um ago nedoa vai ra.

¹³ Eris abrai Finehas inhal u Eliesar natimi ahlap a nup Isreel, mika yi apan aien ehele ilpu mapoi Ruben, im ilpu mapoi Cat, im nahaiji ilpu mapoi Manasi an pece Cileat,

¹⁴ eris lep ahced yin a ilpu atimi alupas is ten, natimi alupas esjilid is ethi irai iji elcau u nup Isreel; eris ilpu atimi alupas esjilid irai iji dausant u nup Isreel ara asega, athi um athi ehni.

¹⁵ Eris apan ara ehele ilpu mapoi Ruben, im ilpu mapoi Cat, im nahaiji ilpu mapoi Manasi, an pece Cileat, um tas ehele ra, um ika,

¹⁶ Era ika a ilpu atimi asega u Ihova, Nedo has nigki nevitai akis ago vai Atua u nup Isreel aijaua, par atidjimia ira Atua an nopan inig um eti apitac yin, akis actaig natau aijaua mika aki imipalea Ihova aijaua an nopan inig?

¹⁷ Is tintin nedo has uja Pior, ka oʼo, is idim eteuc inmas ira atimi u Ihova, ja intis eti adicinadicin vaig akaija um imihum pam an nopan inig,

¹⁸ eka lep atidjimia aijaua irai Ihova an nopan inig, um eti apitac yin? eka imipalea intas o Ihova aijaua an nadiat inigki, ja etu wit lahlah an tak apnyin etpu edemda vai nup Isreel asega aien,

¹⁹ ja el et has inpece unyimia, akumu apam aijaua an pece inig et ohuun a Ihova; et amen iran neom atga u Ihova, um amen ehelema: jam jim imiisjisitai ehele Ihova, um jim imiisjisitai ehelema, um ago natau et wat eteuc natau u Ihova Atua uja.

²⁰ Is idim ago nedo has a Ekar inhal u Sira an nitai iyehki is itap, ja is yetpam intavaitap irai up Isreel asega: is idim eti echim mas a nat yehki ache va nedo has o un.

²¹ Eris tas a ilpu mapoi Ruben, im ilpu mapoi Cat, im nahaiji ilpu mapoi Manasi, ehele ilpu atimi alupas u nup Isreel, um ika,

²² Et ato a Ihova Atua u ilpu atua, Ihova Atua u ilpu atua marom, erupu lep ato a nup Isreel; el et imiisjisitai ka nedo has vai Ihova nedo inigki, (uhmu jim imiatamaig cama an nadiat inigki,)

²³ ka el ecris actaig natau aijama va ecrupu atidjima aijama um eti apitac Ihova, ka el er ahlap iran an nitai ahlap atnamud, ka nitai ahlap eh caig, ka nitai ahlap naaurinig, etmu aru vaig a Ihova;

²⁴ ja ecris imtitaig nitai inigki aijama, um ago, ecris ika aijama, Kit erupu ika a ilpu hal unyimia ehele ilpu hal unyima an taka opan, Et eti unyimia a Ihova Atua u nup Isreel?

²⁵ Is ati Jortan a Ihova mika yi itai asjaaicnaig an niblaija, ak ilpu mapoi Ruben, im ilpu mapoi Cat; et eti unyimia a Ihova: va nitai inigki erupu auatialidi a ilpu hal unyima par imtitai Ihova vai ilpu hal unyimia.

²⁶ Va nitai inigki ecris ika aijama, Intumu actaig natau akaija; jam jim ago uri niji itai ahlap atnamud, im niji itai ahlap et eche:

²⁷ jam ago mika yi itai asjaaicnaig imi cama im lep caua, im ilpu hal uja an tak opan, mika ecri aheca u Ihova aijama irai itai ahlap atnamud unyima im niji itai ahlap unyima im niji itai ahlap naaurinig unyima; va eri jim ika a ilpu hal unyimia ehele ilpu hal unyima an taka opan, Et eti unyimia a Ihova.

²⁸ Va nitai inigki ecris ika aijama, el era asan tas iji igki ehelema ara, ka ilpu mapoma an taka opan, ecrupu tas ehele ra aijama, um ika, Almoi, netwai natau u Ihova nigki eris ago a ilpu retpoma, jam eti ago va niji itai ahlap atnamud im niji itai ahlap et eche; ja et itai asjaaicnaig imi cama im lep imi caua.

²⁹ Etmu itac acen vai cama nedo inigki par imiisjisitai ehele Ihova, um atidjima an nadiat inigki, um eti apitac Ihova, um actaig natau uri niji itai ahlap atnamud, im niji itai ahlap eh caig, im niji itai ahlap et eche, et wat eteuc natau u Ihova Atua uja an nuhup u neom atga o un.

³⁰ Eris wat atahaijeg intas o ilpu mapoi Ruben, im ilpu mapoi Cat, im nahaiji ilpu mapoi Manasi, a Finehas natimi ahlap, im ilpu atimi alupas esjilid u nup Isreel eris amen ehelen ara, is upene ira ra.

³¹ Is tas a Finehas inhal u Elieser natimi ahlap ehele ilpu mapoi Ruben, im ilpu mapoi Cat, im nahaiji ilpu mapoi Manasi, um ika, Ecra ato aijama an nadiat inigki mika et amen eheleija a Ihova, akis eti ago nedo has inigki vai Ihova aijaua: eka mun imiatamaig nup Isreel aijaua an nikmai Ihova.

³² Eris ahes ehele ilpu mapoi Ruben, im ilpu mapoi Cat, an pece Cileat, a Finehas inhal u Elieser natimi ahlap, im ilpu atimi alupas esjilid iji ehki, um adumoij pan an pece Kenan, ehele nup Isreel, um lep asuptecnaig ehele ra.

³³ Is upene irai up Isreel intas ura; eris ago naaurinig vai Ihova a nup Isreel, um eti lep aktaktai nedoa vai ra, im nauahas vaig inpece eris amen iran a ilpu mapoi Ruben im Cat.

³⁴ Eris anvi nidai natau iyehki par ika Et (Nitai asjaaicnaig) a ilpu mapoi Ruben im ilpu mapoi Cat: eris ika ara inyi itai asjaaicnaig imi cama im lep imi caua natau inigki, mika et Atua a Ihova.