Josua 20 - Intas Etipup

Nuarin tas alupas 20.

1 Et tas alep vaig a Atua. 7 era lep ikni a ilpu mapoi Isreel niji maliyum, et siks, mika eri ahapan iran a ilpu atimi atgei atmas jam et i ethetiknaig.

¹ IS tas a Ihova ehele Josua, um ika,

² Namu tas ehele nup Isreel aiek, um ika, Akumu aniv niji maliyum aijaua, par ahapan iran, kis tas vaig ehelemia ainyak irai Moses:

³ va etpu ahapan eahki a natimi inig et atgei atmas aien, jam eti ethetiknaig, um eti aktaktai: uhpu amen upene eahki va natimi eijeijei natmas.

⁴ Etpu aiji an neucse nirahed an maliyum a natimi inig et ahapan aien an tah irai maliyum iji igki, um asuptecnaig nedo o un ehele ilpu atimi alupas an maliyum iyehki, ja erupu leh pam yin an maliyum ara, um alupai yin nuarin amen iran, va etpu amen ehele ra aien.

⁵ El et apitac yin a natimi eijeijei natmas, eri eti atcijaig natimi atgei atmas imi yin; vaig inig nikavaig, is auud etwan aien jam eti ethetiknaig, um eti upyi edemda vai yin.

⁶ Etpu amen aien an maliyum iyehki, um imihum pan an nopan iyehki etpu aiji aien an nuhup u ilpu atimi tas alep vai yin, um lep au nopan iyehki etpu mas a natimi esjilid an nahlap an nopan iyehki: ja etpu adumoij pan an maliyum o un a natimi atgei atmas, im lep an nimnim o un, an maliyum iyehki is ahes iran aien.

⁷ Eris aniv Ketes ara, an lolan nedoon Naftalai an pece Calili, im Sikem an lolan nedoon Ifreem, im Kirjad-arba, tak idan Hibron, an lolan nedoon Juta.

⁸ Im lcp an nahaijin Jortan igcapan ubutpotet pan Jeriko an ridjai o un, eris aniv Biser ara an namasacen, an nuarin marara u ilpu mapoi Ruben, im Remod an pece Cileat u ilpu mapoi Cat, im Colan an pece Besan u ilpu mapoi Manasi.

⁹ Eris aniv inmaliyum iji igki vai ilpu mapoi Isreel asega, im lep nup urai taka uarin era amen ehele ra ara, mika yi ahapan eahki a natimi inig et atgei atmas aien jam eti ethetiknaig, um eti mas va nikmai natimi eijeijei natmas, um imihum pan an nopan iyehki etpu aiji aien an nuhup u ilpu atimi tas alep.