Josua 2 - Intas Etipup

Nuarin tas alupas 2.

1 Et leh a Rehab um adenaig ohwat atimi ahilek inpece eris abraig pan rau Sitim. Intas etipup urau ehelen. 23 Nadumoij urau im intas asuptecnaig.

¹ IS abrai natimi is ero Sitim a Josua inhal u Nun mika eru apan arau um adpau jam eti asaig, um ika, Arumu apan aijaurau um almoi inpece, Jeriko marom. Arus atga urau arau, um apan an neom u intakata has is ethi, nidan Rehab, um amen eahki.

² Eris asaig ehele natimarid Jeriko, um ika, Erau mun ham a nup Isreel et ero an jupura inigki par ahilek inpece.

³ Is abraig pan atimi ehele Rehab a natimarid Jeriko, um ika, Imialau ijo natimi erahki erau mun ham ehelum arau, um amen anliin neom unyum: erau mun ham arau par ehilek inpece asega.

⁴ Is leh natimi is ero erahki a intakata iyehki, um adenaig rau, um ika, Erau mun ham ehelek natimi et ero, ja ek eti ato ainyak nuarin inig erus ahes iran arau:

⁵ erau mun alau ijo arau an jupura an nopan atapnes an neucse nathatahau: ek eti ato ainyak nuarin inig erau mun han iran ahwatatimi erahki: auroauro um apitac rau; akupu uhum pan rau aijaua.

⁶ Ja is imiapan rau ijinies an neom aien, um adenaig rau irai cei flaks, is aehiaig ijinies an neom aien.

⁷ Eris apitac rau natimi an nefalaig alaig pan Jortan, um yetpan irai uarin algauwaig: eris wat apan itac a ilpu atimi apitac rau, eris atapnes an neucse nathatahau.

⁸ Erus eti fi asjeucse arau, ja is aridjipan ehele rau aien ijinies an neom;

⁹ is tas ehele ohwat atimi erahki aien, um ika, Ek ato ainyak mika is alupai caua inpece inigki a Ihova, ecra lep imtitaig caua aijama, et lep auatialidi inliinmopoi atimi asega an pece vai caua.

¹⁰ Ecris atahaijeg aijama mika is ika a Ihova yi ame Injap cap vai caua, an nopan iyehki akis ahes an pece Ijipt aijaua; im lep nedo unyimia vai Saihon im Oc, ohwat atimarid u nup Emor, an nahaijin Jortan igcapan, akis auahas ehni rau aijaua.

¹¹ Ecris wat atahaijeg intas va nitai iji igki aijama, is auatialidi inliinmopoma aijama, is lep eti emda tah natimi vai caua: et Atua ijinies an nohatag, im lep sepamki an nobohtan, a Ihova Atua unyimia.

¹² Ek ugyi caurau ainyak, mika aru asaig intas aktit unyimirau ehelek aijaurau an nuhup u Ihova, mika aru ago nedo aiheuc vai ilpu atimi ehpan irak, va naiheuc unyak vai caurau, um alupai nyak nitai asjaaicniag inveijec:

¹³ um imialep etmak, im risik, im ilpu atamaig irak, im ilpu etwak, im niji itai asega ura, um imiatamaig cama mika ecri umumoh aijama.

¹⁴ Erus tas ehelen ahwat atimi erahki, um ika, El et mas aiek ecrupu lep emesmas aijumrau, jam jim asuptecnaig nauritai inigki unyimrau. Etu wit alupai cama inpece inigki a Ihova, ecrupu ago nedo upene vai euc aijama im nedo inveijec.

¹⁵ Is aiyihi se rau an jaula aien an mun neom: is eteuc neom o un ijinies an nathatahau an maliyum, is amen aien ijinies an nathatahau.

¹⁶ Is ika ehele rau aien, Arumu apan an lolan nedoon aijaurau, va eri jim ehtet iramirau a ilpu atimi ahilek caurau; um atpuh eahki ira adiat inyi eseij, um aitgaig nadumoij vaig u ilpu atimi ahilek caurau: ja par atga unyimirau aijaurau.

¹⁷ Erus ika ehelen ahwat atimi erahki, Ecrupu ipjin aijumrau vai intas aktit inigki unyimrau ehelum.

¹⁸ Ecru wit ham au pece inigki aijama, namu athai injaula u inya cap inigki an mun neom inig na mun aiyihi se cumrau iran aiek; namu lep asjapicnaig pam ehelum aiek anliin neom unyum etmam, im risum, im ilpu atamaig iram, im lep ra asega an nimnim u etmam.

¹⁹ El et ahes tah anliin neom unyum um alau ijo, um apan an nefalaig, uhmu atijai inmas o un iran, ecrupu upene aijumrau: ja el er auahas tah ra ehelum anliin neom, uhmu atijai inmas o un iramrau.

²⁰ Ja el et asuptecnaig nauritai inigki unyimrau aiek, ecrupu eti apol an tas upyi asaig unyimrau ehelum aijumrau.

²¹ Is ika aien, Etmu idivaig intas unyimirau. Is abraig pan rau aien, erus lep atga urau arau: is athai jaula cap an mun neom aien.

²² Erus atga arau, um apan an lolan nedoon, um amen eahki ira adiat is eseij, um aitgaig nadumoij vaig u ilpu atimi ahilek rau: eris ahilek rau an nefalaig asega a ilpu atimi ahilek rau, jam eti ecet rau.

²³ Erus adumoij ahwat atimi erahki, um asuo lan lolan nedoon, um algaunyi nofowai, um apan ehele Josua inhal u Nun, um asuptecnaig ehelen niji itai asega is yetpam ira rau:

²⁴ erus ika ehele Josua arau, Et mun idim atcijaig imi caija inpece asega iyehki a Ihova; era auatialidi natimi asega an pece vai caija.