Josua 17 - Intas Etipup

Nuarin tas alupas 17.

1 Inpece u ilpu mapoi Manasi. 7 Niji ehni iran. 12 Era eti ahlo pan nupu Kenan ara. 14 Era leh inpece et eche a ilpu mapoi Josef.

¹ Et lep eteuc nuarin nobohtan vai ilpu mapoi Manasi; is halav atamaig inmeto u Josef aien; nikavaig, vai Mekir marom inhalav atamaig inmeto u Manasi, etmai Cileat: is eucsupo a Cileat, va nitai inigki is leh Cileat im Besan aien.

² Is lep eteuc nuarin nobohtan vai nahaiji ilpu mapoi Manasi et idivaig ilpu eteuc ira ra; vai ilpu mapoi Ahiiser, im ilpu mapoi Hilek, im ilpu mapoi Asriel, im ilpu mapoi Sikem, im ilpu mapoi Hifer, im ilpu mapoi Semaita: eris ilpu halav atamaig u Manasi inhal u Josef ara sji igki is idivaig ilpu eteuc ira ra.

³ Ja eris eti eteuc a ilpu halav atamaig u Silofehat inhal u Hifer, inhal u Cileat, inhal u Mekir, inhal u Manasi, ilpu halav atahig ache: nidai ilpu halav atahig o un ji igki, nan, Mela, im Noa, im Hocla, im Milka, im Tirsa.

⁴ Eris apan ara an nuhup u Eliesar natimi ahlap, im Josua inhal u Nun, im ilpu atimi alupas esjilid, um ika, Is asaig a Ihova ehele Moses mika yi alupai cama nuarin nobohtan pan irai ilpu atimi ehpan irama. Va nitai inigki eris alupai ra nuarin nobohtan pan irai ilpu etwai etmara is idivaig is asaig a Ihova.

⁵ Eris leh nuarin nobohtan is ten a ilpu mapoi Manasi, im lep inpece Cileat im Besan, an nahaijin Jortan igcapan;

⁶ eris idim leh nuarin nobohtan imi ra a ilpu mapoi atahig u Manasi pan irai ilpu mapoi atamaig o un: eris lep leh inpece Cileat nahaiji ilpu mapoi atamaig u Manasi.

⁷ Is ahes nahaijin pece u ilpu mapoi Manasi irai Eser um yetpan Mikmeda, ubutpotet pan Sikem; is lep apan an nahaijin an matan um yetpan an nuarin amen u nup En-tappua.

⁸ Eris leh inpece Tappua a ilpu mapoi Manasi: ja era ohuun inmaliyum Tappua an nahaijin pece u ilpu mapoi Manasi a ilpu mapoi Ifreem;

⁹ is asuol nahaijin pece ura an nahaijin nofowai Kena an nahaijin inig et ahes nuritoga iran: et eteuc inmaliyum iji igki u ilpu mapoi Ifreem irai iji maliyum u ilpu mapoi Manasi: et lep eteuc nahaijin pece u ilpu mapoi Manasi an nahaijin nofowai inig et ahes narutu iran, um lep yetpok u unjap:

¹⁰ era ohuun nahaijin inig et ahes nuritoga iran a ilpu mapoi Ifreem, ja era ohuun nahaijin inig et ahes narutu iran a ilpu mapoi Manasi, et lep eteuc injap an na-haijin; et lep yetpan u inpece u ilpu mapoi Eser an nahaijin inig et ahes narutu iran, im Isakar an na-haijin an ridjai o un.

¹¹ Era lep ohuun a ilpu mapoi Manasi an nahaijin pece u ilpu mapoi Isakar, im ilpu mapoi Eser, Bed-sian im niji maliyum iran, im Ibleem im niji maliyum iran, im nup u Tor im niji maliyum iran, im nup Entor im niji maliyum iran, im nup u Teanak im niji maliyum iran, im nup u Mecitto im niji maliyum iran; nahaijin pece et eseij.

¹² Ja is ehka vai ilpu mapoi Manasi nahlo vaig nup urai maliyum iji igki; eris imiisjis a nup u Kenan par amen an pece iyehki.

¹³ Ja eris wat emda a nup Isreel eris aniv nimtan ehele nup u Kenan ara; ja eris eti ahlo upene ra ara.

¹⁴ Eris tas ehele Josua a ilpu mapoi Josef, um ika, As a uri aiek par alupai cama nahaijin pece et ethi ache im nuarin et ethi ache, ecra ahinag acen aijama, is aiheuc vai cama a Ihova um imihum pam an nopan inig?

¹⁵ Is tas ehele ra a Josua, um ika, El eka ahinag aijaua, akumu apan an nesei aijaua, um atai auicai vai caua an pece u nup u Piris, im ilpu atimi actalactal, el et haklin lola edoon Ifreem vai caua.

¹⁶ Eris ika a ilpu mapoi Josef, Et haklin vai cama inpece ijinies: et lep eteuc niji jariot aiurn u nup u Kenan asega era amen an pece sepagko ara; ara era amen Bed-sian ara im niji maliyum iran, im lep ra era amen an niskanse Jesriil ara.

¹⁷ Is tas a Josua ehele ilpu mapoi Josef, ilpu mapoi Ifreem im Manasi marom, um ika, Eka ahinag aijaua, um lep emda acen: akupu eti ohuun nahaijin pece et ethi ache;

¹⁸ akumu lep ohuun inlolan nedoon aijaua; et idim nesei, ja akumu acaldei aijaua: akumu ohuun niji uari pece iran aijaua: et eteuc niji jariot aiurn ura, era lep emda ara, ja er uauo, akupu ahlo nup u Kenan aijaua.