Josua 16 - Intas Etipup

Nuarin tas alupas 16.

1 Niji ehni inpece u ilpu mapoi Josef. 5 Nehni inpece u ilpu mapoi Ifreem. 10 Era eti esjilid irai up u Kenan ara.

¹ Et ahes nahaijin pece u ilpu mapoi Josef u Jortan ubutpotet pan Jeriko, um yetpan u inwai Jeriko an nahaijin namasacen an ridjai o un; um lep ahes Jeriko um yetpan an lolan nedoon Bedel,

² um ahes Bedel um yetpan Lus, um lep yetpan an nahaijin pece Arkai, um yetpan Atarod,

³ et lep asuol pan Jafletai an nete o un, um yetpan an nahaijin pece Bed-horon sepagko, um yetpan Ciser: et lep yetpan u injap.

⁴ Eris leh nahaijin pece ura a ilpu mapoi Manasi im Ifreem, ohwat halav atamaig u Josef.

⁵ Nahaijin pece u ilpu mapoi Ifreem nigki, et idivaig ilpu eteuc ira ra: is eteuc Atarod-atar an nahaijin an ridjai o un, um aridjipan Bed-horon ijinies;

⁶ Et lep apok nahaijin pece ura Mikmeda au nahaijin inig et ahes narutu iran; et lep apan Teanad-sailo an nahaijin an ridjai o un, um ahtaregdei an nahaijin an ridjai o un um yetpan Janoha;

⁷ et lep ahes Janoha um asuol pan Atarod, um yetpan Nearad, um yetpan Jeriko, um yetpan Jortan.

⁸ Et lep ahes nahaijin pece ura Tappua um yetpan an nofowai Kena an nete o un; um lep yetpan u unjap. Nahaijin pece u ilpu mapoi Ifreem nigki et idivaig ilpu eteuc ira ra.

⁹ Et lep eteuc nahaiji niji maliyum u ilpu mapoi Ifreem an nahaijin pece u ilpu mapoi Manasi, niji maliyum alupas asega im niji maliyum haklin iran.

¹⁰ Eris eti ahlo nup u Kenan ara eris amen Ciser ara: ja era amen a nup u Kenan ehele nup Ifreem um imihum pam an nopan inig, um alupai ra nimtan.