Josua 14 - Intas Etipup

Nuarin tas alupas 14.

1 Eri leh niji pece ura irai itai asjaaicnaig a nup urai elcau et nain im, nahaiji elcau. 6 Et leh Hibron a Keleb va naiheuc vai yin.

¹ ERIS ohuun inpece iji igki a nup Isreel an pece Kenan, eris ahaig jipe ira ra a Eliesar natimi ahlap, im Josua inhal u Nun, im ilpu atimi alupas esjilid irai iji elcau u nup Isreel.

² Eris ahaig inpece irai itai asjaaicnaig, irai elcau is nain im nahaijin, et idivaig is asaig a Ihova irai Moses.

³ Is alupai nup an nelcau is ero im nup an nahaijin nelcau inpece ura a Moses an nahaijin Jortan igcapan: ja is eti alupai ilpu mapoi Livai tah inpece imi ra pan ira ra.

⁴ Eris up urai elcau is ero a ilpu mapoi Josef, Manasi im Ifreem: eris lep eti alupai ilpu mapoi Livai tah nuarin eri ohuun ara an pece, niji maliyum ache par amen iran, im lep nobohtan arehed iran va niji itai eklim edo irai pece ura im niji itai ura.

⁵ Eris ago a nup Isreel, is idivaig is asaig a Ihova ehele Moses, um ahaig inpece.

⁶ Eris apan Cilcal ehele Josua a ilpu mapoi Juta: is tas ehelen a Keleb inhal u Jifunni nup u Kines, um ika, Na ato aiek nitai iyehki, is asaig a Ihova ehele Moses natimi u Atua vai nyak, im lep vai euc, Ketes-barnea.

⁷ Is eteuc inmesese is forte irak an nopan iyehki, is abrai nyak a Moses naheca u Ihova, mika ki ahes Ketes-barnea ainyak um apan um almaijidjid inpece; kis lep imiapan intas ehelen ainyak is idivaig is amen an liinmopok.

⁸ Ja eris auahas inliinmopoi atimi a ilpu etwak eris ahced nyak ara: ja kis apitac asega Ihova Atua unyak ainyak.

⁹ Is tas emda a Moses an nadiat iyehki, um ika, Napu idim ohuun inpece iyehki aiek as atga iran! aiek, im lep ilpu mapom irai iji mesese, as apitac asega Ihova Atua unyak aiek.

¹⁰ Is idim imiatumumoh nyak a Ihova irai mesese is forte im faiv, et idivaig is asaig aien, an nopan iyehki is asan tas inigki ehele Moses a Ihova, eris wat atga an namasacen a nup Isreel; et idim eteuc inmesese et eete im faiv irak an nadiat inigki.

¹¹ Ek lep emda ainyak an nadiat inigki, et idivaig kis emda ainyak an nopan iyehki is abrai nyak a Moses: et idivaig nemda unyak an nopan iyehki nemda unyak an nopan inig, par ago nedoa, im hal itai.

¹² Namu alupai nyak nedoon inigki aiek, is tas vaig a Ihova an nopan iyehki; as atahaijeg aiek an nopan iyehki mika eris amen eahki a nup Enak, um lep esjilid niji maliyum um eteuc nathatahau iran: el et amen ehelek a Ihova, ekpu emda ainyak par ahlo ra, et idivaig is asaig a Ihova.

¹³ Is asan tas acis yi alwai Keleb inhal u Jefunni a Josua, um alupai yin Hibron mika yi ohuun aien.

¹⁴ Is ohuun Hibron a Keleb inhal u Jefunni nup u Kines um imihum pam an nopan inig, va nedo o un, nikavaig, is apitac asega Ihova Atua u nup Isreel aien.

¹⁵ Nidai Hibron itu acen Kirjad-arba; is atimi emda a Arba irai up Enak. Is atumop inpece va nedoa.