Josua 13 - Intas Etipup

Nuarin tas alupas 13.

1 Niji ehni inpece er eti atoraliak. 8 Inpece u nup urai elcau et ero im nahaiji elcau. 14, 33 Era ohuun niji itai ahlap vai Ihova a ilpu mapoi Livai. 15 Niji ehni inpece u ilpu mapoi Ruben. 22 Era atgei Belam ara. 24 Niji ehni inpece u ilpu mapoi Cat, 29 im lep u nahaiji ilpu mapoi Manasi.

¹ IS efatimi a Josua um ahinag inmesese iran; is tas ehelen a Ihova, um ika, Na efatimi aiek um ahinag inmesese iram, ja et eteuc nahaijin pece alupas eris eti atoraliak.

² Eris eti atoraliak inpece iji igki: nikavaig, inpece asega u nup u Filistia, im inpece Cisur asega,

³ et ahes Saihor ubutpotet pan Ijipt, um yetpan an maliyum Ekron, an nuarin inig et ahes narutu iran, eris upyi ohuun a nup u Kenan: nelcau is faiv u nup u Filistia; nikavaig, nup u Cesa, im nup Astot, im nup Askelon, im nup u Cad, im nup Ekron, im lep nup Evai:

⁴ et lep ahes an nuarin inig et ahes nuritoga iran, inpece asega u nup u Kenan, im Meara ubutpotet pan Saiton, um yetpan Efek, um lep yetpan an nahaijin pece u nup u Eram:

⁵ im lep inpece u nup u Cibal, im Lebanon asega an ridjai o un, ahes Beal-cat ithan nedoon Hermon um yetpan Hemad.

⁶ Ekpu ahlo atimi asega irai lola edoon ainyak an nuhup u nup Isreel, ahes Lebanon um yetpam Misrifod-meem, nup u Saiton asega: namu lep ahaig aiek irai up Isreel irai itai asjaaicnaig, mika eri ohuun ara, et idivaig kis asaig ehelum ainyak.

⁷ Namu ahaig inpece inigki aiek irai up urai elcau et nain, im nup an nahaijin nelcau u Manasi,

⁸ eris leh nahaijin imi ra a ilpu mapoi Ruben im ilpu mapoi Cat, im nup an nahaijin nelcau u Manasi, is alupai ra a Moses, an nahaijin Jortan igcapan an ridjai o un, et idivaig is alupai ra a Moses naheca u Ihova;

⁹ ahes Aroer, an nahaijin nofowai Amon, im niji maliyum asega juju et arehed iran nofowai, im nuarin marara asega u Meteba im Taibon;

¹⁰ im niji maliyum asega u Saihon natimarid u nup Emor, is atimarid Hesbon aien, um yetpan an nahaijin pece u nup Amon;

¹¹ im Cileat, im inpece u nup u Cisur, im nup u Meaka, im nedoon Hermon asega, im Besan asega, um yetpan Salka;

¹² nelcau asega u Oc an pece Besan, is atimarid aien Astarod im Etreai, is umoh aien ache irai ahaiji ilpu atimi actalactal: is auud ra a Moses, um ahlo ra.

¹³ Ja eris eti ahlo nup u Cisur a nup Isreel, im nup u Meaka: ja era amen ehele nup Isreel a nup u Cisur im nup u Meaka um imihum pam an nopan inig.

¹⁴ Ja is eti alupai ilpu mapoi Livai inpece aien; erupu ohuun niji itai ahlap u Ihova Atua u nup Isreel ara er atnamud an cap ara, et idivaig is asaig ehele ra aien.

¹⁵ Is alupai ilpu mapoi Ruben inpece imi ra a Moses, is idivaig ilpu eteuc ira ra.

¹⁶ Is ahes inpece ura Aroer, an nahaijin nofowai Amon, im niji maliyum asega juju et arehed iran nofowai, im nuarin marara asega u Meteba;

¹⁷ im Hesbon, im niji maliyum asega an nuarin marara; im Taibon, im Bemod-beal, im Bed-beal-mion,

¹⁸ im Jahesa, im Ketemod, im Mifead,

¹⁹ im Kirjadeem, im Sibma, im Sered-Sehar an nedoon Enek,

²⁰ im Bed-pior, im Astod-pisca, im Bed-jesimod,

²¹ im niji maliyum asega an nuarin marara, im nelcau asega u Saihon natimarid u nup Emor, is atimarid an maliyum Hesbon aien, is auud yin a Moses pan irai ilpu atimi alupas Mitian, nan Ivai, im Rikem, im Sur, im Hur, im Riba, eris ilpu etwai Saihon ara, um amen an pece o un.

²² Eris lep atgei Belam inhal u Bior, natimi araces, a nup Isreel an nedoa pan ira ra eris atgei ra ara.

²³ Is yah Jortan an nahaijin pece u ilpu mapoi Ruben. Nahaijin u ilpu mapoi Ruben nigki, eris ohuun ara et idivaig ilpu eteuc ira ra, niji maliyum alupas iran, im niji maliyum haklin iran marom.

²⁴ Is alupai ilpu mapoi Cat nahaijin pece imi ra a Moses, imi nup u Cat asega, et idivaig ilpu eteuc ira ra.

²⁵ Eris ohuun Jeser ara, im niji maliyum asega Cileat, im nahaijin pece u nup Amon, um yetpan Aroer ubutpotet Raba;

²⁶ um lep ahes Hesbon um yetpan Remad-mispi, im Bitonim; um lep ahes Mahaneem um yetpan an nahaijin pece Tibir;

²⁷ im lep an niskanse, Bed-eram, im Bed-nimra, im Sukkod, im Sefon, nahaijin pece u nelcau u Saihon natimarid an maliyum Hesbon, im lep inpece an nahaijin Jortan, um yetpan u injap Kinered an nahaijin Jortan igcapan an ridjai o un.

²⁸ Inpece u ilpu mapoi Cat nigki, eri ohuun ara et idivaig ilpu eteuc ira ra, niji maliyum alupas im niji maliyum haklin.

²⁹ Is alupai nahaiji ilpu mapoi Manasi nahaijin pece imi ra a Moses: inpece u nahaiji ilpu mapoi Manasi nigki, eri ohuun ara et idivaig ilpu eteuc ira ra.

³⁰ Is ahes inpece ura irai Mahaneem, inpece Besan asega, nelcau asega u Oc natimarid Besan, im niji maliyum asega Jeer, an pece Besan, niji maliyum et sikste:

³¹ eris ohuun nahaijin Cileat, im Astarod, im Etreai, niji maliyum an nelcau u Oc natimarid an pece Besan, a ilpu mapoi Mekir inhal u Manasi, nahaiji ilpu mapoi Mekir marom et idivaig ilpu eteuc ira ra.

³² Is ahaig jipe inpece iji igki a Moses an nuarin marara Moab, an nahaijin Jortan igcapan, ubutpotet pan Jeriko, an ridjai o un.

³³ Ja is eti alupai ilpu mapoi Livai tah nuarin nobohtan a Moses: eris ilpu atimi u Ihova Atua u nup Isreel ara, et idivaig is asaig ehele ra aien.