Josua 10 - Intas Etipup

Nuarin tas alupas 10.

1 Era ati nedoa vai nup u Cibeon a ilpu atimarid et faiv. 6 Et imiaras ra a Josua. 10 Et aat ira ra a Atua irai copda hat. 12 Et aiji nagesega im inmohoc an tas o Josua. 16 Er atapnes ilpu atimarid et faiv iji ehki an mun nij. 23 Er imialau ijo ra. 24 Er amcel vai ra, 26 um eijcei ra. 28 Era esjilid ara irai ilpu atimarid et seven et eche. 43 Et adumoij pan Cilcal a Josua.

¹ IS wat atahaijeg a Atoni-sitek natimarid an maliyum Jerusalem mika is atoraliak inmaliyum Eai a Josua, um auahas ehni; is ago nedo iyehki aien vai Eai im lep vai natimarid iran, is upyi ago aien vai Jeriko im lep vai natimarid iran; um ato mika eris asa nigpa a nup u Cibeon ehele nup Isreel, um amen ehele ra;

² eris imtitaig alupas ara, is maliyum alupas Cibeon, um idivaig tah irai maliyum u ilpu atimarid, is lep esjilid an maliyum Eai, eris emda natimi asega iran.

³ Is abraig pan atimi a Atoni-sitek natimarid Jerusalem ehele Hoham natimarid Hibron, im Pairam natimarid Jarmud, im Jafaia natimarid Lekis, im Tibir natimarid Eclon, um ika,

⁴ Akumu apam ehelek aijaua, um atau imi nyak, um auahas nup u Cibeon: eris asa nigpa ara ehele Josua im nup Isreel.

⁵ Eris asjapicnaig a ilpu atimarid is faiv u nup Emor, nan, natimarid u nup u Jerusalem, im natimarid u nup u Hibron, im natimarid u nup u Jarmud, im natimarid u nup u Lekis, im natimarid u nup Eclon, um aridjai, im lep ilpu eucsupo asega ura, um atumop ubutpotet pan Cibeon, um ago nedoa.

⁶ Eris abraig pan atimi ehele Josua a nup u Cibeon an nuarin amen o un Cilcal, um ika, Namu jim udei ilpu aheca unyum aiek, jam auroauro um aridjipam ehelema, um imiatamaig cama, um atau imi cama: era mun asjapicnaig a ilpu atimarid asega u nup Emor era amen irai lola edoon, par ago nedoa vai cama.

⁷ Is ahes Cilcal a Josua um aridjipan, im lep ilpu eucsupo asega, im ilpu atimi emda asega.

⁸ Is tas a Ihova ehele Josua, um ika, Namu jim imtitai ra aiek: ek mun ikni ra an nikmam ainyak; inyi eti aiji tah natimi ira ra an nuhup unyum.

⁹ Is auroauro a Josua um apan ehele ra, is ahes Cilcal aien um aridjipan an nepig asega.

¹⁰ Is ahlo ra a Ihova an nuhup u nup Isreel, um atgei atimi is ahinag ira ra Cibeon, um ahau ra an nefalaig et yetpan Bed-horon, um atgei ra um yetpan Asika, im Makita.

¹¹ Eris wat aha ara an nuhup u nup Isreel, um asuol pan Bed-horon, is ethaigse hat alupas a Ihova an nohatag ira ra um yetpan Asika, eris emesmas ara: eris emesmas natimi is ahinag va incopda hat irai ra sji ehki eris atgei ra a nup Isreel an nedoa.

¹² Is tas a Josua ehele Ihova an nopan yehki, is atcijaig nup Emor a Ihova an nuhup u nup Isreel: eris atahaijeg yin a nup Isreel is wat ika aien, Etmu amen laulau nagesega ijinies an maliyum Cibeon; im lep inmohoc ijinies an niskanse Ajalon.

¹³ Is amen laulau nagesega, is lep amen aktit inmohoc, um imihum pan an nopan iyehki eris ago neruvaig irai ilpu atimi tak atimi ira ra natimi. Eris aged intas vaig an nitaasviitai u Jeser: “Is amen laulau nagesega ijinies an nohatag, um eti fi ete an jupura.

¹⁴ Is eti upyi eteuc tah nadiat is idivaig iyehki, um eti lep eteuc, is atahaijeg intas o natimi a Ihova: is idim ago nedoa a Ihova vai nup Isreel.

¹⁵ Is adumoij pan Cilcal a Josua im lep nup Isreel asega, an nuarin amen ura.”

¹⁶ Ja eris aha a ilpu atimarid is faiv iji ehki, um atpuh an mun nij Makita.

¹⁷ Eris asaig ehele Josua, um ika, Er ecet ilpu atimarid et faiv iji ehki, era atpuh ara an mun nij Makita.

¹⁸ Is ika a Josua, Akumu atcelcaig pan hat alupas aijaua an neucse mun nij, um aniv atimi par aminjinai ra:

¹⁹ um jim atumop, jam ahlo ilpu atimi tak atimi iramia, um auud ra era apitac ara; erumu jim han irai iji maliyum ura ara: is ikni ra imi caua a Ihova.

²⁰ Is wat auud ehni atimi a Josua im nup Isreel, um atgei atimi is ahinag, um imihum pan an nopan iyehki eris atiih ara, ja eris apan irai iji maliyum is amen nathatahau iran nahaiji ra eris umumoh ara.

²¹ Eris adumoij igpa natimi asega an nuarin is amen iran a Josua Makita: is eti auoh tah intas vaig tah nup Isreel tah natimi.

²² Is ika a Josua, Asalgei neucse mun nij, um imialau ijo ehelek ilpu atimarid et faiv iji igki an mun nij.

²³ Eris ago ara, um imialau ijo ehelen ilpu atimarid is faiv iji ehki an mun nij, nan, natimarid u nup u Jerusalem, im natimarid u nup u Hibron, im natimarid u nup u Jarmud, im natimarid u nup u Lekis, im natimarid u nup Eclon.

²⁴ Eris wat imialau ijo ilpu atimarid iji ehki ehele Josua ara, is asjapicnaig nup Isreel asega a Josua, um ika ehele ilpu atimi atau irai ilpu eucsupo eris ahced yin ara, Apam ubutpotet, um atijai neduomia irai auiwai ilpu atimarid iji igki. Eris apan ubutpotet ara, um atijai neduora irai auiwara.

²⁵ Is ika ehele ra a Josua, Akumu jim imtitaig aijaua, um jim eucjeucjeucaij, etmu emda inliinmopomia aijaua um jim aua-tialidi: etpu uce nedo o Ihova vai ilpu atimi tak atimi iramia asega eka ago nedoa vai ra aijaua.

²⁶ Is par apitac a Josua um auud ra, um atgei ra, um eijcei ra ira auicai is faiv: eris amen ira auicai ara um yetpan an jupura.

²⁷ Is wat ete nagesega is asaig a Josua, mika eri iknise ra ira auicai ara, um ethaigse ra an mun nij iyehki eris atpuh iran ara, um ikni inhat alupas an neucse mun nij, et lep amen an nopan inig.

²⁸ An nadiat iyehki is atoraliak Makita a Josua, um atgei atimi iran an nedoa, is auahas ehni natimarid iran aien, im lep natimi asega; is eti imialep tah aien: is ago nedo iyehki aien vai natimarid u nup u Makita, is upyi ago aien vai natimarid u nup u Jeriko.

²⁹ Is ahes Makita a Josua, im nup Isreel asega ehelen, um yetpan Libna, um ago nedoa vai nup u Libna:

³⁰ is lep ati inmaliyum iyehki a Ihova im natimarid iran an nikmai nup Isreel; eris auahas inmaliyum ara, im lep atimi iran an nedoa; is eti imialep tah aien; is ago nedo iyehki vai natimarid iran, is upyi ago aien vai natimarid u nup u Jeriko.

³¹ Is ahes Libna a Josua, im lep nup Isreel asega ehelen, um yetpan Lekis, um amen ubutpotet pan o un, um ago nedoa vaig:

³² Is ati Lekis an nikmai nup Isreel a Ihova, is wat ti pan itac nadiat is ethi um lep lahlah an tak apnyin, eris atoraliak inmaliyum ara, um auahas an nedoa, im lep natimi asega iran, is idivaig nedo aesga o un vai Libna.

³³ Is aridjai a Horam natimarid u nup u Ciser par atau imi nup u Lekis; ja is atgei yin a Josua im lep ilpu atimi o un, is eti umoh tah.

³⁴ Is ahes Lekis a Josua um yetpan Eclon, im lep nup Isreel asega ehelen; eris amen ubutpotet o un ara, um ago nedoa vaig:

³⁵ eris atoraliak inmaliyum ara an nadiat iyehki, um auahas an nedoa, is auahas ehni natimi asega iran aien an nadiat iyehki, is idivaig nedo asega o un vai Lekis.

³⁶ Is ahes Eclon a Josua um aridjipan, im lep nup Isreel asega ehelen, um yetpan Hibron; um ago nedoa vaig:

³⁷ um atoraliak inmaliyum, um auahas an nedoa, im natimarid iran, im niji maliyum haklin iran, im lep natimi asega iran; is eti imialep tah aien, is idivaig nedo asega o un vai Eclon; is auahas ehni inmaliyum aien, im lep natimi asega iran.

³⁸ Is lep adumoij pan Tibir a Josua, im nup Isreel asega ehelen, um ago nedoa vaig:

³⁹ is atoraliak inmaliyum aien, im natimarid iran, im niji maliyum haklin asega iran; eris auahas an nedoa ara, um auahas ehni natimi asega iran; is eti imialep tah aien: is ago nedo iyehki Tibir aien, im lep vai natimarid iran, is upyi ago vai Hibron aien; is idivaig is lep ago vai Libna im lep vai natimarid iran.

⁴⁰ Is idim auud nup urai iji uari pece asega irai lola edoon a Josua, im niji uari pece an nuarin inig et ahes nuritoga iran, im niji uari pece an niskanse, im niji uari pece ui wai, im lep ilpu atimarid asega iran: is eti imialep tah aien, jam auahas niji itai umumoh asega, is idivaig is asaig a Ihova Atua u nup Isreel.

⁴¹ Is auud ra Ketes-barnea a Josua um yetpan Cesa, im lep nup uran pece Cosen asega, um yetpan Cibeon.

⁴² Is asjiraig ilpu atimarid iji ehki asega a Josua um ohuun inpece ura an nopan is ethi ache, is idim ago nedoa u nup Isreel a Ihova Atua ura.

⁴³ Is lep adumoij pan Cilcal a Josua, im nup Isreel asega ehelen, an nuarin amen ura.