Jona 4 - Intas Etipup

NUARIN TAS ALUPAS 4.

1 Et has inliinmopoi Jona va nedo aiheuc u Atua, 4 et acaiji yin a Atua va nedo an nerero.

¹ IS has inliinmopoi Jona va nitai iyehki, um edemda alupas.

² Is um alaigaheni vai Ihova aien, um ika, Ak Ihova, kis wat amen an pece unyak ainyak, kis asaig intas inigki ainyak. Va imtai inigki kis ahapan Tarsis ainyak jin nopan iyehki: kis ato ainyak mika, na Atua aiheuc va atimi aiek, um eti eriss ira ra, um eti fi auroauro um edemda, et lep alupas naiheuc unyum, na adumoij an liinmopom aiek um eti aru nedo has.

³ Im lep inig, ak Ihova, ek ugyi euc ainyak, mika an asan mas unyak aiek; et upene vai nyak inmas vaig, jam eti upene numoh vaig.

⁴ Is ika a Ihova, Na edemda alupas aiek, ka oʼo?

⁵ Is ahes an maliyum a Jona, um apan um ateuc an nahaijin maliyum an ridjai o un, um ago niim araho eahki imi yin, um ateuc ithan naiyu, par almoi mika yi echamecha vai inmaliyum iyehki.

⁶ Is ati nerero a Ihova Atua, um ika yi yah an niim araho, um aiyu va nidjini Jona, um imicoho yin va nohocred o un. Is um imiacitak alupas a Jona va nerero.

⁷ Is wat lahlah an tak apnyin, is ati nages a Atua, is ages nerero ja is par imlai.

⁸ Is wat aridjai nagesega, is ati nimtinjap ihlup a Atua is ahes an ridjai o un; is aces nidjini Jona nagesega, is auatialidi aien, is merit aien mika yi mas, um ika, Et upene vai nyak inmas vaig, jam eti upene numoh vaig.

⁹ Is ika ehele Jona a Atua, Na edemda alupas aiek va nerero, ka oʼo? Is ika aien, Maiya, ek edemda alupas ainyak, um merit inmas vaig.

¹⁰ Is ika a Ihova, Na mun imiaras nerero inig aiek, na mun eti auritai iran aiek, et mun eti edel va nedo unyum; et mun edel an nepig et ethi, um lep imlai an nepig et ethi.

¹¹ Et idim uco, et upene mika ki imicoho Ninevi ainyak, inmaliyum alupas naico, era amen iran natimi et wun huntret im twente dausant, (120,000) um lep eled hal, era eti ato ikmara inmatara im ikmara inmauum ara; im lep niji itai eklim edo irai pece et ahinag.