Jona 3 - Intas Etipup

NUARIN TAS ALUPAS 3.

1 Et aketo a Atua um abraig pan Jona, et asuptecnaig intas ehele nup u Ninevi aien. 5 Era wat adumoij an liinmopora ara, 10 et adumoij an liinmopon a Atua.

¹ IS ecero yetpam intas o Ihova ehele Jona, um ika,

² Namu atidai aiek um apan Ninevi, inmaliyum alupas iyehki, um asuptecnaig ehele ra intas inig ekpu asaig ehelum ainyak.

³ Is um atidai a Jona, um apan Ninevi, is idivaig is asaig a Ihova. Is alupas acen inmaliyum iyehki Ninevi eris arehed han an nadiat is dri.

⁴ Is atupun a Jona um atga an nadiat is ethi an maliyum iyehki, um efehtas, um ika, Etu wit ti pan itac nadiat inyi forte, uhpu auahas Ninevi.

⁵ Eris um imiisjis ninveijec intas o Atua a nup u Ninevi, um ati nadiat atwakam, eris aso ra ira apelumai uucai ara, ahes irai ilpu atimi alupas um yetpan irai tup atimi.

⁶ Is idim yetpan intas ehele natimarid u nup u Ninevi; is um atidai a dorona o un aien, um atipagki napelumai itac han, um aso yin an napelumai uucai, um ateuc an nohpa.

⁷ Is ika aien eri asuptecnaig um imiapaahni an maliyum Ninevi intas alep u natimarid im ilpu atimi alupas o un, um ika, Erumu jim caig tah nitai natimi, im niji itai eklim edo irai pece, im kurimatau, im siip; erumu jim caig tah nitai ara, um jim umnyi wai.

⁸ Ja erumu aso ra an napelumai uucai natimi im lep niji itai eklim edo irai pece, um ahlaig emda vai Atua; erumu lep adumoij an nefalaig has ura natimi asega, um udei nedo ipjin u ikmara.

⁹ Kit etpu ahidaig pam yin a Atua, um adumoij an liinmopon, um atipagki intavaitap esjilid o un, vai ti jim emesmas akaija.

¹⁰ Is ahnoi nedo ura a Atua mika eris udei nedo has ura ara; is lep adumoij an liinmopoi Atua va nohocred iyehki, is ika aien yi ati ira ra; is um eti ati aien.