Jona 1 - Intas Etipup

NUARIN TAS ALUPAS 1.

1 Et abraig Jona a Atua mika yi apan Ninevi, ja et ahapan Tarsis aien. 4 Et ati nehio a Atua um ehvaig nedo o Jona. 11 Era ethaigse yin an jap ara. 17 Et atleg yin numu alupas.

¹ IS yetpam intas o Ihova ehele Jona inhal u Amiteai, um ika,

² Namu atidai aiek, um apan Ninevi inmaliyum alupas iyehki, um efehtas ehele ra; et mun aridjipam nedo has ura an nuhup unyak.

³ Ja is atidai a Jona par ahapan Tarsis vai nesganimtai Ihova; is apok Jopa aien, um ecetai nelcau is ethi napan vaig Tarsis: is auanimtan naheldai yin vaig aien, um aridjai iran mika yi ahced ra, um apan Tarsis vai nesganimtai Ihova.

⁴ Ja is ati nimtinjap alupas a Ihova an jap, is um alupas injap; eris aktaktai ara mika etpu has nelcau.

⁵ Eris um imtitaig a ilpu atimi aheled an nelcau; eris ahlaig ara asega vai ilpu atmas ura, athi um athi ehni, um ethaigse an jap inpadiaig an nelcau, mika yi ehlohos nelcau: ja is asuol a Jona anliin nelcau, um asjeuc an nahaijin nelcau, um umjeg.

⁶ Is um apan ehelen a natimi alupas an necau, um ika ehelen, Na a uri aiek, ak natimi umjeg? atidai aiek, um ahlaig vai Atua unyum, kit etpu aktaktai vai caija a Atua vai ti jim emesmas akaija.

⁷ Eris tas jipe ara asega, um ika, Intumu ikni itai asjaaicnaig iraija akaija, par ato natimi inig, et yetpam nohocred inigki iraija va nedo o un. Eris ikni itai asjaaicnaig ira ra ara, is etjo nitai asjaaicnaig imi Jona.

⁸ Eris um ika ehelen ara, Namu idim asuptecnaig ehelema aiek, nikavaig, et yetpam nohocred inigki iraija vanhe? na ago inhe aiek? as ahes eda aiek? inpece unyum eda? na up eda aiek?

⁹ Is um ika ehele ra aien, Ek up u Hibru ainyak; ek imtitai Ihova ainyak, et Atua an nohatag aien, is ago injap aien im lep nobohtan.

¹⁰ Eris um imtitaig alupas natimi iji ehki, um ika ehelen, As a uri aiek par ago nedo inigki? eris idim ato ara vai intas asuptecnaig o un ehele ra mika is mun aha aien vai nesganimtai Ihova.

¹¹ Eris um ika ehelen ara, Ecri uauo euc aijama mika yi eropse injap vai cama? is achadaliek injap, um alupas acen.

¹² Is um ika ehele ra aien, Leh nyak aijaua, um ethaigse nyak an Jap; etpu eropse injap vai caua: ek idim ato ainyak mika, et mun yetpam nehio alupas inigki iramia va nedo unyak.

¹³ Eris um aheled emda natimi iji ehki mika eri apahai ara; ja is ehka vai ra: is achadaliek injap, um alupas acen, um atapnes ra.

¹⁴ Va nitai inigki eris ahlaig vai Ihova ara, um ika, Ecra ugyi euc aijama, ak Ihova, ecra ugyi euc aijama, mika ecri jim emesmas aijama vai natimi inigki, um jim aru irama inmas o un: ak Ihova, na mun idim ago nitai merit unyum aiek.

¹⁵ Eris leh Jona ara, um ethaigse yin an jap: is um eropse injap.

¹⁶ Eris um imtitai alupas Ihova ara, um ahlap au nitai ahlap vai Ihova, um asan tas upyi asaig.

¹⁷ Is ati numu alupas a Ihova, mika yi atleg Jona. Is amen a Jona an nipjinetgai numu an nadiat is dri im nepig is dri.